GM គ្រោងយក SUV ខ្នាតធំទៅលក់នៅចិនជាលើកដំបូង

November 8, 2020

ក្រុមហ៊ុន General Motor ចង់ចាប់ផ្តើមលក់រថយន្ត SUV ខ្នាតធំរបស់ខ្លួននៅក្នុងប្រទេសចិន ជាលើកដំបូងបង្អស់ក្នុងប្រវត្តិសាស្រ្តរបស់ពួកគេ ដោយសង្ឃឹមថារថយន្តប្រភេទ Flagship ទាំងនេះនឹងជួយឲ្យចំនួនលក់កាន់តែប្រសើរ នៅក្នុងទីផ្សាររថយន្តធំបំផុតលើពិភពលោក។

យោងតាមប្រភពព័ត៌មានបានឲ្យដឹងថា GM គ្រោងនាំយករថយន្ត Chevrolet Tahoe និង Chevrolet Suburban ទៅលក់នៅទីនោះ ក៏ដូចជា Cadillac Escalade និង GMC Yukon Denali ផងដែរ។

គួរឲ្យដឹងថា ក្រុមហ៊ុនផលិតរថយន្តអាមេរិកខាងលើកំពុងតែបង្អួតរថយន្តទាំងប៉ុន្មានម៉ូដែលខាងលើ នៅឯកម្មវិធី China International Import Expo (CIIE) ក្នុងទីក្រុងសៀងហៃ។

គួរបញ្ជាក់ថា នៅក្នុងត្រីមាសទី៣ នៃឆ្នាំ២០២០ នេះ រថយន្ត SUV ខ្នាតមធ្យមរបស់ GM ដោយក្នុងនោះមានម៉ាក Buick និង Cadillac បានជួយឲ្យចំនួនលក់នៅក្នុងប្រទេសចិនរបស់ពួកគេ កើនឡើងរហូតដល់ទៅ ១២% ឯណោះ៕

ផ្ទាំងផ្សាយពាណិជ្ជកម្ម

ឡាន Sedan តម្លៃថោកបំផុត ឆ្នាំ២០២១ របស់ Nissan ចេញលក់ជាផ្លូវការ

November 7, 2020

ក្រុមហ៊ុន Nissan បានប្រកាសតម្លៃលក់នៃរថយន្ត Versa ស៊េរីឆ្នាំ២០២១ របស់ខ្លួនជាផ្លូវការ សម្រាប់ទីផ្សារសហរដ្ឋអាមេរិក ដោយក្នុងនោះវាបានឡើងថ្លៃបន្តិច។

រថយន្ត Sedan ខ្នាតតូច Nissan Versa ឆ្នាំ២០២១ ឥឡូវនេះមានតម្លៃចាប់ពី ១៤ ៩៣០ដុល្លារ សម្រាប់ម៉ូដែល Versa S ថ្លៃជាងស៊េរីមុន ២០០ដុល្លារ។ ចំណែកឯ Versa SV និង SR វិញ គឺឡើងថ្លៃ ១០០ដុល្លារដូចគ្នា។

គ្រប់ម៉ូដែល Versa ទាំងអស់នឹងបំពាក់ម៉ាស៊ីនសាំងចំណុះ ១,៦លីត្រ ទំហំ ៤ស៊ីឡាំង មានកម្លាំង ១២២សេះ ហើយមានទាំងជម្រើសប្រអប់លេខដៃ ៥វគ្គ និងអូតូ Xtronic CVT។ ចំពោះកម្រិតស៊ីសាំងវិញគឺ ៧,៣លីត្រ/ក្នុងក្រុង , ៥,៩លីត្រ/ក្រៅក្រុង និង ៦,៧លីត្រ/ជាមធ្យម សម្រាប់ការបើកបរចម្ងាយ ១០០គីឡូម៉ែត្រ។

លក្ខណៈពិសេសមួយចំនួននៅលើរថយន្ត Nissan Versa ឆ្នាំ២០២១ នេះមានដូចជា Nissan Safety Shield 360, អេក្រង់ Touchscreen ទំហំ ៧អ៊ីញ, មុខងារម៉ាស៊ីនត្រជាក់អូតូ, យ៉ាន់ Alloy ទំហំ ១៧អ៊ីញ និង ចង្កៀងមុខ LED ជាដើម៕

ផ្ទាំងផ្សាយពាណិជ្ជកម្ម

Hyundai Santa Fe ទំនងជាដណ្ដើមបានតំណែងដែល Toyota Fortuner កាន់កាប់អស់ជិត១០ឆ្នាំនៅវៀតណាម

November 7, 2020

ចាប់ពីឆ្នាំ ២០១១ ដល់ឆ្នាំ ២០១៩ រថយន្ត Toyota Fortuner បានកាន់កាប់ជាប់នូវតំណែងជារថយន្ត SUV ដែលលក់ដាច់ជាងគេក្នុងប្រទេសវៀតណាម។ យ៉ាងណាក្ដីតំណែងនេះ ទំនងជាត្រូវគូប្រជែងដែលជា Hyundai Santa Fe ដណ្ដើមបានក្នុងឆ្នាំ ២០២០ នេះ។

ខាងក្រោមនេះគឺជាតួលេខបង្ហាញអំពីរថយន្ត SUV ដែលលក់ដាច់ជាងគេក្នុងរយៈពេល៩ខែដំបូងនៃឆ្នាំ ២០២០ នៅវៀតណាម ៖

១. Hyundai Santa Fe ៖ ៧ ០៣០គ្រឿង

២. Hyundai Tucson ៖ ៦ ៦៨២គ្រឿង

៣. Mazda CX-5 ៖ ៦ ៣៨០គ្រឿង

៤. Honda CR-V ៖ ៦ ១៧៤គ្រឿង

៥. Toyota Fortuner ៖ ៥ ១៥៨គ្រឿង

ផ្ទាំងផ្សាយពាណិជ្ជកម្ម

ឡាន Hyundai គូប្រជែង Camry ឆ្នាំ២០២១ ចេញតម្លៃខ្លួនជាផ្លូវការហើយ

November 7, 2020

កាលពីដើមឆ្នាំកន្លងទៅនេះ ក្រុមហ៊ុន Hyundai បានបង្ហាញរថយន្ត Sonata ប្រភេទ N Line ស៊េរីឆ្នាំ២០២១ ហើយឥឡូវនេះក្រុមហ៊ុនក៏បានប្រកាសពីតម្លៃរបស់វាជាផ្លូវការ។

រថយន្ត Hyundai Sonata N Line នឹងមានតម្លៃចាប់ពី ៣៣ ២០០ដុល្លារ នៅលើទីផ្សារសហរដ្ឋអាមេរិក។ វាមានបំពាក់ម៉ាស៊ីនសាំងចំណុះ ២,៥លីត្រ turbocharged ទំហំ ៤ស៊ីឡាំង មានកម្លាំង ២៩០សេះ ដំណើរការដោយប្រអប់លេខអូតូ ៨វគ្គ ប្រភេទ dual-clutch។

រថយន្ត Sedan ស្ព័រនេះក៏មានបំពាក់មកជាមួយមុខងារ Launch Control និង N Power Shift ផងដែរ។ ក្រៅពីនោះវាក៏បានអាប់ដេតប្រព័ន្ធចង្កូត និងប្រព័ន្ធជើងក្រោម ព្រមទាំងដងរែងទប់លំនឹង និង ហ្វ្រាំងធំជាងមុនទៀតផង។

បើនិយាយពីការឌីហ្សាញវិញ Sonata N Line បានកែកុនផ្នែកខាងមុខឲ្យមើលទៅរឹតតែស្ព័រជាងមុន, លេងពណ៌ខ្មៅរលោង និងយ៉ាន់ទំហំ ១៩អ៊ីញថ្មី ខុសប្លែកពី Sonata ធម្មតា។ មិនតែប៉ុណ្ណោះ វាក៏មានដំបូល Panoramic Sunroof, ប្រព័ន្ធបំពង់ស៊ីម៉ាំង៤ និង ចង្កៀងមុខ LED។ ចំណែកឯផ្នែកខាងក្នុង វាបំពាក់កុងទ័រឌីជីថលទំហំ ១២,៣អ៊ីញ និង អេក្រង់កម្សាន្ត ១០,២៥អ៊ីញ ព្រមទាំងកន្លែងសាកថ្មទូរសព្ទឥតប្រើខ្សែផងដែរ។

ចំពោះផ្នែកសុវត្ថិភាពវិញ Sonata N Line មានមុខងារជំនួយការបើកបរជាច្រើន ដូចជា Forward Collision-Avoidance Assist with Pedestrian Detection, Smart Cruise Control with Stop & Go, Blind-Spot Collision-Avoidance Assist with Rear Cross-Traffic Collision-Avoidance Assist, High Beam Assist, Lane Keeping Assist, Lane Follow Assist និង Safety Exit Warning៕

ផ្ទាំងផ្សាយពាណិជ្ជកម្ម

ក្រុមហ៊ុនឡានធំមួយបែរជាចំណេញខ្លាំងអំឡុងវិបត្តិកូវីដ១៩ ដោយសារឡាន២ប្រភេទនេះ

November 7, 2020

ប្រាក់ចំណូលរបស់ក្រុមហ៊ុនរថយន្ត General Motors ប្រចាំត្រីមាសទីបីនៃឆ្នាំ ២០២០ នៅលើទីផ្សារអាមេរិកខាងជើង មានលទ្ធផលល្អលើសពីការរំពឹងទុករបស់ Wall Street។

អំឡុងត្រីមាសទីបី ប្រតិបត្តិការនៅអាមេរិកខាងជើងរបស់ក្រុមហ៊ុន GM អាចរកប្រាក់ចំណូលបាន ៤,៣៧ពាន់លានដុល្លារ ដែលមានការកើនឡើងរហូតដល់ ៤៤% បើធៀបនឹងពេលដួចគ្នាកាលពីឆ្នាំ ២០១៩។

ដោយឡែកប្រាក់ចំណូលសរុបដែលក្រុមហ៊ុនអាចរកបានពីទីផ្សារជុំវិញពិភពលោកគឺមានចំនួន ៣៥,៤៨ពាន់លានដុល្លារ។ ក្នុងនោះប្រាក់ចំណេញគឺមានចំនួន ៤,០៥ពាន់លានដុល្លារ ដែលមានការកើនឡើង ៧៤% បើធៀបនឹងប្រាក់ចំណេញកាលពីត្រីមាសបីនៃឆ្នាំ ២០១៩ ដែលមានចំនួន ២,៣៥ពាន់លានដុល្លារ។

General Motors CEO Mary Barra answers questions from the media Wednesday, October 1, 2014, after presenting the company’s customer-focused strategic plan to become the most valued automotive company, at a conference of investors and financial analysts at the General Motors Milford Proving Grounds in Milford, Michigan. (Photo by Steve Fecht for General Motors)

ក្រុមហ៊ុន General Motors ដែលមានកាន់កាប់ម៉ាករថយន្តធំៗដូចជា Chevrolet, Buick, GMC និង Cadillac បាននិយាយថាការលក់នៅសហរដ្ឋអាមេរិក និងប្រទេសចិនចាប់ផ្ដើមមានភាពល្អប្រសើរឡើងលឿនជាងការរំពឹងទុក ហើយតម្រូវការលើរថយន្តភីកអាប់ខ្នាតធំ និងរថយន្ត SUV ជាកត្តាជួយឲ្យក្រុមហ៊ុនរីកចម្រើនក្នុងអំឡុងវិបត្តិកូវីដ១៩៕

ផ្ទាំងផ្សាយពាណិជ្ជកម្ម

Infiniti Q60 ឆ្នាំ២០២១ រាងនៅតែអេម តែកាន់តែថ្លៃជាងមុន

November 6, 2020

ក្រុមហ៊ុន Infiniti ដែលជាមែកធាងរបស់ក្រុមហ៊ុន Nissan បានប្រកាសចេញរថយន្ត Q60 ស៊េរីឆ្នាំ២០២១ របស់ខ្លួនជាផ្លូវការ ដែលទទួលបានការអាប់ដេតមួយចំនួន ប៉ុន្តែនៅតែរក្សារូបរាងដ៏ស្រស់ស្អាតរបស់វា ហើយបានបន្ថែមពណ៌ថ្មី គឺ Grand Blue និង Slate Gray។

ថ្វីបើមានការផ្លាស់ប្តូរតិចតួច ប៉ុន្តែតម្លៃរបស់វាបានហក់ឡើង ដោយឥឡូវនេះ Infiniti Q60 Pure ឆ្នាំ២០២១ មានតម្លៃចាប់ពី ៤១ ៦៥០ដុល្លារ ថ្លៃជាងស៊េរីមុន ៣០០ដុល្លារ។ វាមានបំពាក់ម៉ាស៊ីនចំណុះ ៣,០លីត្រ twin-turbo ទំហំ ៦ស៊ីឡាំង មានកម្លាំង ៣០០សេះ ដំណើរការដោយប្រអប់លេខអូតូ ៧វគ្គ ហើយក៏មានជម្រើសប៉ុងពីរ AWD ដែរ តែត្រូវថែមលុយ ២ ០០០ដុល្លារទៀត។

បន្ទាប់មកទៀតគឺ Q60 Luxe មានតម្លៃចាប់ពី ៥០ ២០០ដុល្លារ ថ្លៃជាងមុន ៤ ៧០០ដុល្លារ និង ចុងក្រោយបង្អស់គឺ Q60 Red Sport 400 ថ្លៃជាងមុន ៩៥០ដុល្លារ ពោលគឺតម្លៃចាប់ពី ៥៨ ១០០ដុល្លារ។ វាមានបំពាក់ម៉ាស៊ីនចំណុះ ៣,០លីត្រ twin-turbo ទំហំ ៦ស៊ីឡាំងដូចគ្នា តែមានកម្លាំងដល់ ៤០០សេះ។

បច្ចុប្បន្ននេះ រថយន្ត Infiniti Q60 ឆ្នាំ២០២១ កំពុងដាក់ឲ្យបញ្ជាទិញ ហើយនឹងមានលក់នៅលើទីផ្សារសហរដ្ឋអាមេរិក មុនដាច់ឆ្នាំនេះ៕

ផ្ទាំងផ្សាយពាណិជ្ជកម្ម

ទំនើបបែបនេះទើប Genesis G80 ឆ្នាំ២០២១ ហ៊ានលក់នៅប្រទេសមួយ តម្លៃ៦ម៉ឺនដុល្លារ

November 6, 2020

រថយន្ត Genesis G80 ស៊េរីឆ្នាំ២០២១ បានបង្ហាញខ្លួនជាផ្លូវការនៅក្នុងប្រទេសអូស្ត្រាលី ជាមួយនឹងតម្លៃចាប់ពី ៨៤ ៩០០ដុល្លារអូស្ត្រាលី ឬប្រហែលខ្ទង់ ៦០ ០០០ដុល្លារអាមេរិក។

រថយន្ត Sedan ប្រណីតរបស់កូរ៉េនេះនឹងចែកចេញជា ២ ម៉ូដែល គឺ G80 2.5T និង G80 3.5T។ G80 2.5T បំពាក់ម៉ាស៊ីនចំណុះ ២,៥លីត្រ turbocharged ទំហំ ៤ស៊ីឡាំង មានកម្លាំង ៣០០សេះ ដំណើរការដោយប្រអប់លេខអូតូ ៨វគ្គ និងប៉ុងមួយវិលកង់ក្រោយ។

G80 2.5T មានបំពាក់យ៉ាន់ Alloy ទំហំ ១៩អ៊ីញមកស្តង់ ជាមួយនឹងដំបូល Panoramic Sunroof, ឃ្លុបក្រោយអូតូ, ពូកស្បែក, អេក្រង់កម្សាន្ត Touchscreen ១៤,៥អ៊ីញ ព្រមទាំងបច្ចេកវិទ្យា Genesis Active Safety Control ដែលក្នុងនោះរួមមានមុខងារ Forward Collision-Avoidance Assist system, Driver Attention Warning, Blind-Spot Collision Avoidance-Assist, Smart Cruise Control with Stop & Go និង Surround View Monitor with 3D Function។

ដោយឡែកចំពោះ G80 3.5T វិញបំពាក់ម៉ាស៊ីនចំណុះ ៣,៥លីត្រ twin-turbocharged ទំហំ ៦ស៊ីឡាំង មានកម្លាំង ៣៧៥សេះ ដំណើរការដោយប្រអប់លេខអូតូ ៨វគ្គ និងប្រព័ន្ធប៉ុងពីរ AWD។ វាបន្ថែមមុខងារស្តង់ដារ ដូចជា Genesis Adaptive Control Suspension ជាមួយ Advanced Road Preview ក៏ដូចជាបំពាក់យ៉ាន់ទំហំ ២០អ៊ីញទៀតផង។

ក្រៅពីនោះ 2.5T និង 3.5T មានបំពាក់កុងទ័រឌីជីថល ទំហំ ១២,៣អ៊ីញ, ម៉ាស៊ីនត្រជាក់ ៣តំបន់, ទ្វារបឺត, កៅអីអ្នកដំណើរអាសារ៉េបាន ១៨ទិស ហើយមានមុខងារម៉ាស្សាផងដែរ៕

ផ្ទាំងផ្សាយពាណិជ្ជកម្ម

Ford Ranger ប្ដូរមុខមាត់ថ្មី លេចវត្តមាននៅប្រទេសថៃ

November 6, 2020

រថយន្ត Ford Ranger ស៊េរីថ្មីដែលមានការផ្លាស់ប្ដូរការឌីហ្សាញមុខមាត់ថ្មីបានបង្ហាញវត្តមានជាផ្លូវការនៅប្រទេសថៃ ដែលនឹងជាស៊េរីឆ្នាំ ២០២១ សម្រាប់ទីផ្សារប្រទេសថៃ។

ការកែប្រែដែលគេសម្គាល់ឃើញច្បាស់ជាងគេនៅត្រង់រន្ធខ្យល់ពណ៌ខ្មៅដែលមានរចនាបថថ្មី មើលទៅស្រដៀងនឹងរថយន្ត Ford Thunder ស៊េរីផលិតមានកំណត់ដែលចេញលក់នៅអឺរ៉ុបនាដើមឆ្នាំ ២០២០។ ផ្នែកជាច្រើននៃរថយន្តឃើញមានរំលេចដោយពណ៌ខ្មៅ មាននៅលើកញ្ចក់មើលចំហៀង ដៃទ្វារ និងយ៉ាន់ពណ៌ខ្មៅផងដែរ។

ចំពោះផ្នែកខាងក្នុង និងផ្នែកម៉ាស៊ីនមិនមានការផ្លាស់ប្ដូរនោះទេ គឺមានបំពាក់ម៉ាស៊ីនចំណុះ ២,២លីត្រ ឬចំណុះ ២,០លីត្រ ដែលមានភ្ជាប់នឹងប្រអប់លេខស្វ័យប្រវត្តិ១០វគ្គ។

ក្រុមហ៊ុនបានបន្ថែមនូវ Ford Ranger XL Street ដ៏ពិសេសមួយ ដែលការរចនារូបរាងខុសពីធម្មតា ហើយមានទ្វារតែពីរប៉ុណ្ណោះ។ Ford បានដាក់លក់រថយន្ត Ranger ស៊េរីថ្មីនេះក្នុងតម្លៃចាប់ពីប្រមាណ ២១ ៦០០ដុល្លារ សម្រាប់ប្រភេទ XL Street ហើយប្រភេទ Wildtrak វិញគឺមានចាប់ពីប្រមាណ ៣១ ៦០០ដុល្លារ៕

ផ្ទាំងផ្សាយពាណិជ្ជកម្ម

Bentley នឹងឈប់ផលិតឡានប្រើសាំងសុទ្ធ ចាប់ពីឆ្នាំ ២០២៦

November 6, 2020

ក្រុមហ៊ុន Bentley បានប្រើប្រាស់កម្មវិធី Beyond 100 របស់ខ្លួន ដើម្បីបង្ហាញអំពីមហិច្ឆតាដ៏អស្ចារ្យសម្រាប់ថ្ងៃអនាគតខាងមុខ។

Bentley បានរៀបចំផែនការនឹងបញ្ឈប់ការផលិតរថយន្តដែលប្រើប្រាស់ថាមពលប្រេងឥន្ធនៈសុទ្ធចាប់ពីឆ្នាំ ២០២៦ តទៅ ដោយនឹងមានតែប្រភេទរថយន្ត PHEV (Plug-in Hybrid) និងរថយន្តអគ្គិសនីតែប៉ុណ្ណោះ។ តដល់ត្រឹមឆ្នាំ ២០៣០ ក្រុមហ៊ុនក៏មានបំណងវិវត្តន៍ខ្លួនទៅជាម៉ាករថយន្តអគ្គិសនីសុទ្ធ មិនមានប្រភេទ PHEV ទៀតនោះទេ។

នេះគឺជាផែនការនៃការផ្លាស់ប្ដូរដ៏ធំមួយ ដោយសារតែ Bentley គឺជាក្រុមហ៊ុនផលិតរថយន្តម៉ាស៊ីន ១២ស៊ីឡាំងដ៏ធំជាងគេមួយក្នុងលោក ប៉ុន្តែរថយន្តប្រភេទនេះនឹងត្រូវបាត់ស្រមោលក្នុងពេលមិនដល់១០ឆ្នាំទៀតនោះទេ។

គួរដឹងដែរថា Bentley បានប្ដេជ្ញាថានឹងផ្ដល់ជម្រើស PHEV លើរថយន្តគ្រប់ម៉ូដែលរបស់ខ្លួននៅត្រឹមឆ្នាំ ២០២៣ ហើយក្រុមហ៊ុននឹងបញ្ចេញរថយន្តប្រើថាមពលអគ្គិសនីសុទ្ធជាលើកដំបូងនៅក្នុងឆ្នាំ ២០២៥ ផងដែរ៕

ផ្ទាំងផ្សាយពាណិជ្ជកម្ម

តោះបងប្អូន ជិតដល់ថ្ងៃផុតកំណត់បង់ពន្ធផ្លូវយានយន្តប្រចាំឆ្នាំ២០២០ ហើយ!

November 6, 2020

យោងតាមសេចក្តីប្រកាស និងការរំលឹក របស់អគ្គនាយកដ្ឋានពន្ធដារ ដល់ម្ចាស់យានយន្តទាំងអស់ ស្តីពីការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ ការប្រមូលពន្ធប្រភេទនេះនឹងត្រូវបិទបញ្ចប់ជាស្ថាពរនៅថ្ងៃទី៣០ ខែវិច្ឆិកា ឆ្នាំ២០២០ ខាងមុខនេះ អនុលោមតាមប្រកាសលេខ ៥៣១ សហវ.ប្រក ចុះថ្ងៃទី៣០ ខែឧសភាព ឆ្នាំ២០១៨ របស់ក្រសួងសេដ្ឋកិច្ចនិងហិរញ្ញវត្ថុ។

អ្នកទាំងអស់គ្នាអាចរួសរាន់អញ្ជើញមកប្រកាសបង់ពន្ធ ត្រឹមថ្ងៃទី៣០ ខែវិច្ឆិកា ឆ្នាំ២០២០ នៅសាខាពន្ធដារខេត្ត ខណ្ឌ ឬនៅធនាគារ កាណាឌីយ៉ា ក.អ ឬនៅធនាគារ អេស៊ីលីដា ភីអិលស៊ី ឬនៅធនាគារ កម្ពុជាសាធារណៈ ភីអិលស៊ី ឬនៅធនាគារ វឌ្ឍនៈ ឬនៅធនាគារ ជេ ត្រាស់ រ៉ូយ៉ាល់ ឬនៅធនាគារ ស្ថាបនា ភីអិលស៊ី ឬនៅធនាគារដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ច និងហិរញ្ញវត្ថុ ដើម្បីចៀសវាងនូវការកកស្ទុះ និងការប្រជ្រៀតគ្នាមកប្រកាសបង់បន្ធ។

ខាងក្រោមនេះជាសេចក្តីប្រកាសទាំងស្រុង៖