Genesis បង្ហើបរូបរាងឡាន SUV ទីពីររបស់ខ្លួន

September 29, 2020

Genesis បានបង្ហាញរូបភាពដំបូងនៃរថយន្ត GV70 ដែលជារថយន្ត SUV របស់ម៉ាករថយន្តប្រណីតកូរ៉េខាងត្បូងមួយនេះ បន្ទាប់ពីរថយន្ត GV80។

រូបភាពបានបង្ហាញថារថយន្ត GV70 នឹងមានរូបរាងដូចជា GV80 ហើយក៏មានការឌីហ្សាញរាងស្លីមជាងផងដែរ ដែលគេប្រើប្រាស់នូវការឌីហ្សាញមានឈ្មោះថា Athletic Elegance។ អំពូលខាងមុខជាប្រភេទ Quad Lamps ស្រដៀងនឹងរថយន្ត Genesis ដទៃទៀតដូចជា G70, G80 និង G90 ជាដើម។

មើលពីចំហៀងឃើញថា GV70 គឺមានតួខ្លួនខ្លីជាង GV80 ហើយដំបូលខាងលើហាក់មានរាងកោងខ្លាំង។ នៅផ្នែកខាងក្រោយវិញមានបំពាក់នូវអំពូល Quad Lamps ដែលហាក់មិនខុសពីរថយន្តស៊េរីថ្មីដទៃទៀតរបស់ Genesis។

Genesis នៅមិនទាន់បានប្រកាសនៅឡើយទេថារថយន្ត GV70 នឹងបង្ហាញវត្តមានជាផ្លូវការនៅពេលណានោះ៕

ផ្ទាំងផ្សាយពាណិជ្ជកម្ម

មានតែប្រទេសនេះប៉ុណ្ណោះ ដែលមានលក់ឡាន Audi Q5L តួវែង

September 28, 2020

ក្រុមហ៊ុន Audi បានប្រកាសចេញរថយន្ត Q5L Sportback តួវែង ស៊េរីឆ្នាំ២០២១ របស់ខ្លួនជាផ្លូវការ សម្រាប់តែទីផ្សារប្រទេសចិនផ្តាច់មុខតែម្តង។

រថយន្ត Audi Q5L Sportback មានប្រវែងពីកង់មុខទៅកង់ក្រោយ ២ ៩០៨មីល្លីម៉ែត្រ វែងជាងម៉ូដែល Q5 ស្តង់ដារ ៨៩មីល្លីម៉ែត្រ។ សរុបមកវិញ ទំហំរបស់វាទាំងមូលគឺ ប្រវែង ៤ ៧៧៨មីល្លីម៉ែត្រ ទទឹង ១ ៨៩២មីល្លីម៉ែត្រ និង កម្ពស់ ១ ៦៦៦មីល្លីម៉ែត្រ។

រថយន្ត SUV តួវែងនេះ ផ្តល់នូវកន្លែងដាក់ជើងកាន់តែធំទូលាយ សម្រាប់អ្នកដំណើរកៅអីខាងក្រោយ ហើយក៏ខ្ពស់ជាងមុន មិនទើសក្បាលផងដែរ។ ចំពោះជម្រើសម៉ាស៊ីនវិញមាន២ គឺ 40 TFSI និង 45 TFSI ដែលប្រើម៉ាស៊ីនចំណុះ ២,០លីត្រ turbocharged ទំហំ ៤ស៊ីឡាំង មានកម្លាំង ១៨៤សេះ និង ២១៧សេះ។

Audi Q5L Sportback នឹងចេញលក់នៅត្រីមាសទី១ ឆ្នាំ២០២១ ខណៈតម្លៃរបស់វានឹងត្រូវប្រកាសនៅពេលជិតចេញលក់៕

ផ្ទាំងផ្សាយពាណិជ្ជកម្ម

ដឹងពេលដែលឡាន Rolls-Royce អត់ប្រើសាំងដំបូងបង្អស់ អាចបង្ហាញខ្លួនហើយ!

September 28, 2020

ស្របពេលដែលទីក្រុងធំៗជាង ២០ នៅទូទាំងពិភពលោក បានប្រកាសពីគម្រោងហាមឃាត់រថយន្តប្រើសាំង និងម៉ាស៊ូត ពីទឹកដីរបស់ខ្លួនទាំងស្រុង នៅឆ្នាំ២០៣០ ក្រុមហ៊ុនផលិតរថយន្តត្រូវតែដើរឲ្យទាន់ពេលនោះ។

ជាក់ស្តែង Rolls-Royce ដែលបានទទួលស្គាល់ថា ខណៈមិនទាន់មានតម្រូវការសម្រាប់កំពូលរថយ្តអគ្គិសនីប្រណីត ពួកគេនៅតែត្រូវការផលិតវា ដើម្បីត្រៀមសម្រាប់ការហាមឃាត់នោះ។

ខណៈពេលក្រុមហ៊ុនរថយន្តជាច្រើនបានបញ្ចេញរថយន្ត Hybrid និង Plug-in Hybrid មកបណ្តើរៗ មុនពេលចេញរថយន្តអគ្គិសនី ក្រុមហ៊ុន Rolls-Royce ឯណេះវិញ នឹងរំលងប្រភេទរថយន្តទាំងនោះ ហើយចាប់ផ្តើមចេញរថយន្តអគ្គិសនីយកតែម្តង។

គេជឿជាក់ថា រថយន្ត Rolls-Royce ប្រើអគ្គិសនីនឹងជំនួសកន្លែង Wraith និង Dawn ដែលកំពុងខិតជិតដល់ថ្ងៃអវសានរបស់ខ្លួន ហើយអាចនឹងប្រើគ្រោងឆ្អឹងដូចម៉ូដែលដទៃបច្ចុប្បន្ន។

គួរឲ្យដឹងថា Rolls-Royce បានបង្ហាញពីគំនិត និងគម្រោងផលិតរថយន្តអគ្គិសនី តាំងពីជាង១០ឆ្នាំមុនម្ល៉េស ដោយបានដាក់បង្ហាញគំរូរថយន្ត Rolls-Royce 102EX Concept ក្នុងកម្មវិធី 2011 Geneva Motor Show ដែលផលិតផ្អែកតាមម៉ូដែល Phantom។ 102EX Concept មានចម្ងាយបើកបរ ២០០គីឡូម៉ែត្រ និងកម្លាំង ៣៨៩សេះ ហើយមានល្បឿនអតិបរមា ១៦០គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

ស្អាតប្លែក! Concept រថយន្តអគ្គិសនីរបស់ Honda

September 28, 2020

ក្នុងកម្មវិធីតាំងបង្ហាញរថយន្ត Beijing Auto Show ឆ្នាំ ២០២០ ក្រុមហ៊ុន Honda បានដាក់តាំងបង្ហាញនូវរថយន្ត Honda SUV e:concept ដែលជាការបង្ហាញអំពីរថយន្តអគ្គិសនីដំបូងរបស់ Honda សម្រាប់ទីផ្សារប្រទេសចិន។

Honda មិនបាននិយាយច្រើនអំពីលក្ខណៈសម្បត្តិរបស់រថយន្តអគ្គិសនីដែលគ្រោងផលិតលក់លើទីផ្សារនេះទេ ប៉ុន្តែបាននិយាយថាវានឹងបំពាក់នូវបច្ចេកវិទ្យាសុវត្ថិភាព Honda Sensing ជំនាន់ចុងក្រោយ រួមជាមួយប្រព័ន្ធកម្សាន្ត Honda Connect ផងដែរ។

ក្រៅពីរថយន្ត SUV e:concept នេះ Honda ក៏បានដាក់តាំងបង្ហាញនូវ CR-V PHEV ដែលជារថយន្តដំបូងរបស់ Honda នៅទីផ្សារប្រទេសចិនមានប្រើប្រព័ន្ធ Plug-in Hybrid។ រថយន្តនេះគ្រោងចេញលក់នៅខែមករាឆ្នាំ ២០២១៕

ផ្ទាំងផ្សាយពាណិជ្ជកម្ម

រថយន្តល្អបំផុតប្រចាំឆ្នាំ២០២០ សម្រាប់បើកបរក្នុងក្រុង

September 28, 2020

យោងតាមគេហទំព័រដ៏ល្បី Carbuzz បានធ្វើការបញ្ចេញនៅតារាង រថយន្តដ៏ល្អបំផុតសម្រាប់ការបើកបរក្នុងទីក្រុង ប្រចាំឆ្នាំ ២០២០ ដោយក្នុងនោះរួមមានរថយន្តដូចជា៖

Mazda CX-30

Toyota Corolla Hybrid

Lexus UX Hybrid

Honda Insight

Honda Fit

Mini Cooper Hardtop

Nissan Leaf

Kia Soul

Jeep Wrangler

Toyota 86

ផ្ទាំងផ្សាយពាណិជ្ជកម្ម

Ford រំពឹងថាអ្នកកក់ឡាន Bronco ចំនួន ៧៥% នឹងសម្រេចទិញយក

September 28, 2020

Ford បានបង្ហាញការជឿជាក់ថាអ្នកកក់រថយន្ត Bronco ប្រមាណជាង ៧៥% នឹងសម្រេចចិត្តទិញយករថយន្ត SUV ខ្លាំងខាង Off-Road មួយនេះ។

បន្ទាប់ពីបានបង្ហាញចេញរថយន្ត Bronco ស៊េរីឆ្នាំ ២០២១ រួចមក Ford បានចាប់ផ្ដើមបើកទទួលការកក់រថយន្តនេះ ដែលតម្រូវឲ្យតម្កល់ប្រាក់ ១០០ដុល្លារ ដែលទឹកប្រាក់នេះអាចដកយកមកវិញបាន។ បើគិតត្រឹមខែសីហានេះ មានការកក់លើរថយន្ត Bronco និង Bronco Sport ចំនួនប្រមាណ ១៦៥ ០០០គ្រឿង។

គួរដឹងថាវិបសាយកុម្ម៉ង់រថយន្ត Bronco ជាផ្លូវការ ដែលមានបើកឲ្យជ្រើសរើស Option ផ្សេងៗនឹងបើកដំណើរការក្នុងខែតុលា ដែល Ford បានរំពឹងថានឹងចាប់ផ្ដើមការដឹកជញ្ជូនរថយន្ត Bronco ថ្មីជូនអតិថិជននៅចុងត្រីមាសទីមួយនៃឆ្នាំ ២០២១ ខាងមុខ៕

ផ្ទាំងផ្សាយពាណិជ្ជកម្ម

នេះជាឡានកម្លាំងខ្លាំងបំផុត ដែល Peugeot ធ្លាប់ផលិត

September 26, 2020

ក្រុមហ៊ុនបារាំង Peugeot បានដាក់ដំណើរការជាផ្លូវការនូវសាខាថ្មីឈ្មោះថា Peugeot Sport Engineered (PSE) ជាមួយនឹងការបង្ហាញចេញរថយន្តថ្មីម៉ូដែល 508 PSE ប្រភេទ Plug-in Hybrid។

រថយន្ត 508 PSE ប្រភេទ Plug-in Hybrid ធ្លាប់បានបង្ហាញមុខក្នុងនាមជារថយន្ត Concept នៅកម្មវិធីតាំងបង្ហាញរថយន្ត Geneva Motor Show ឆ្នាំមុន ដែលវាគឺជារថយន្តកម្លាំងជាងគេដែល Peugeot បានផលិត។

រថយន្ត 508 PSE មួយប្រភេទនេះ មានបំពាក់ម៉ាស៊ីន Turbocharged ចំណុះ ១,៦លីត្រ អមដោយម៉ូទ័រអគ្គិសនីពីរ ប្រើប្រអប់លេខអូតូ៨វគ្គ និងប្រើប្រព័ន្ធបើកបរវិលកង់ទាំងបួន ដែលវាអាចផលិតកម្លាំងសរុបបាន ៣៥៥សេះ។

ជាលទ្ធផលរថយន្តនេះអាចស្ទុះពី ០-១០០គ.ម/ម៉ ក្នុងពេលត្រឹម ៥,២វិនាទី ហើយការជាន់ពី ៨០-១១៩គ.ម/ម៉ ចំណាយពេលត្រឹម ៣វិនាទី ជាមួយល្បឿនអតិបរមាគឺបានកំណត់នៅត្រឹម ២៥០គ.ម/ម៉។ ចំពោះកម្រិតស៊ីប្រេងជាមធ្យមគឺស៊ីប្រេង ២លីត្រ ក្នុងចម្ងាយ ១០០គីឡូម៉ែត្រ។

គួរដឹងថារថយន្ត 508 PSE នេះនឹងមានដាក់លក់នៅតាមហាងនៅឆមាសទីមួយនៃឆ្នាំ ២០២១ ដែលមិនទាន់មានការបញ្ជាក់អំពីតម្លៃនៅឡើយទេ៕

ផ្ទាំងផ្សាយពាណិជ្ជកម្ម

មើលឡានមហាកម្លាំងមួយជាន់លើផ្លូវប្រវែង ៤០០ម៉ែត្រ ប្រើពេលជាង៩វិនាទី

September 26, 2020

ក្រោយពី Tesla បានអះអាងថារថយន្ត Model S Plaid អាចរត់លើផ្លូវប្រវែង ៤០០ម៉ែត្រ ដោយចំណាយពេលមិនដល់ ៩វិនាទី ក្រុមហ៊ុនរថយន្តអគ្គិសនី Lucid បានបង្ហោះវីដេអូមួយលើ Twitter បង្ហាញអំពីសមត្ថភាពរថយន្ត Lucid Air ប្រភេទម៉ូទ័របី ដែលរត់លើផ្លូវប្រវែងដូចគ្នា ប្រើពេល ៩,២៤៥វិនាទី។

ការអះអាងរបស់ Tesla ចំពោះរថយន្ត Model S Plaid គឺអស្ចារ្យ ប៉ុន្តែកុំគិតថារថយន្ត Lucid Air មានសមត្ថភាពខ្សោយនោះ។ សម្រាប់រយៈពេល ៩,២៤៥វិនាទីនេះ អាចឲ្យវាក្លាយជារថយន្តស្ទុះលឿនជាងគេបំផុតប្រសិនបើវាចេញលក់នាពេលនេះ ដែលបានយកឈ្នះ Supercar ដទៃទៀតមួយចំនួនធំ ដោយយកឈ្នះបានយ៉ាងហោចណាស់ ១វិនាទីដែរ។

Performance testing of the #LucidAir platform continues. As we push Lucid's in-house developed EV powertrain tech to new heights, today we share our latest work-in-progress: A 9.245 second 1/4 mile @ 157.26 mph. Stay tuned for more. pic.twitter.com/7OQQodTjuk

— Lucid Motors (@LucidMotors) September 24, 2020

គួរដឹងដែរថារថយន្ត Lucid Air ប្រភេទបំពាក់ម៉ូទ័រអគ្គិសនីបី គឺកំពុងស្ថិតនៅក្នុងការធ្វើតេស្តដោយក្រុមហ៊ុននៅឡើយ ដូចនេះគេនៅមិនច្បាស់ថាផលិតផលសម្រេចនឹងមានសមត្ថភាពដូចគ្នា ឬអាចខ្លាំងលើសនេះ។

ចំពោះលក្ខណៈសម្បត្តិរបស់ Lucid Air ប្រភេទប្រើម៉ូទ័រអគ្គិសនីបីនេះមិនទាន់ដឹងថាវាអាចផលិតកម្លាំងបានប៉ុន្មានសេះនៅឡើយទេ។ ប៉ុន្តែសម្រាប់ Lucid Air ដែលប្រើម៉ូទ័រអគ្គិសនីពីរអាចផលិតកម្លាំងបាន ១០៨០សេះ៕

ផ្ទាំងផ្សាយពាណិជ្ជកម្ម

Ford Mustang Mach-E GT បង្ហាញមុខនៅអឺរ៉ុប ជាឡានអាចជាន់ស្ទុះលឿនបំផុត

September 26, 2020

ក្រុមហ៊ុន Ford បានប្រកាសចេញរថយន្តអគ្គិសនី Mustang Mach-E GT របស់ខ្លួនជាផ្លូវការនៅអឺរ៉ុប ដែលវានឹងចេញលក់នៅចុងឆ្នាំ២០២១។ បើយោងតាមក្រុមហ៊ុនរថយន្តអាមេរិកខាងលើ អះអាងថា Mach-E GT គឺជារថយន្តអាចជាន់ស្ទុះលឿនបំផុត នៅក្នុងថ្នាក់របស់វា។

រថយន្ត Mach-E GT មានបំពាក់ម៉ូទ័រអគ្គិសនី ២ ដែលបង្កើតកម្លាំងបានសរុប ៤៥៨សេះ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៧វិនាទី។ ជាមួយគ្នានេះ វាបំពាក់កញ្ចប់អាគុយអគ្គិសនីកម្លាំង ៨៨គីឡូវ៉ាត់ម៉ោង ដែលអាចឲ្យវាបើកបានចម្ងាយ ៥០០គីឡូម៉ែត្រ នៅពេលសាកភ្លើងពេញម្តង។

លក្ខណៈពិសេសមួយចំនួនលើ Mach-E GT មានដូចជា ប្រព័ន្ធបូម MagneRide adaptive suspension, យ៉ាន់ Alloy ២០អ៊ីញ ហើយមានពណ៌ខ្លួនពិសេស ដូចជា ខៀវ Grabber Blue និង ទឹកក្រូច Cyber Orange ជាដើម។ ចំណែកឯផ្នែកខាងក្នុងវិញ មានអេក្រង់ Full HD ទំហំ ១៥,៥អ៊ីញ, កៅអី Ford Performance និង ដៃចង្កូតយ៉ាងពិសេស ទៀតផង៕

ផ្ទាំងផ្សាយពាណិជ្ជកម្ម

Infiniti ចេញគំរូឡាន QX60 ថ្មី ឌីហ្សាញទាក់ទាញខ្លាំង

September 26, 2020

រថយន្ត Infiniti QX60 មានអាយុកាលជិត ១០ឆ្នាំទៅហើយ ប៉ុន្តែវានៅតែជារថយន្តដែលលក់ដាច់បំផុតមួយរបស់ម៉ាកជប៉ុននេះ។ ដោយសារតែមូលហេតុនេះ ទើប Infiniti បានចេញគំរូរថយន្ត QX60 ថ្មី ហៅថា QX60 Monograph។

QX60 Monograph ត្រូវបានក្រុមហ៊ុនពិព័រនាថា “លើសពីការសិក្សាលើការឌីហ្សាញ” ឬ “គំរូរថយន្ត” ដោយផ្តល់នូវការឌីហ្សាញស្ទើររួចរាល់ទាំងស្រុង (Production Model) ដែលនឹងបង្ហាញខ្លួនជាផ្លូវការនៅឆ្នាំក្រោយ។

ទោះជាយ៉ាងណាក៏ដោយ ក្រុមហ៊ុនរថយន្តជប៉ុនខាងលើ មិនបានបង្ហាញឲ្យឃើញនូវទិដ្ឋភាពផ្នែកខាងក្នុងឡើយ ប៉ុន្តែបញ្ជាក់ថា QX60 នឹងនៅតែផ្តល់កៅអី ៣ជួរ។ មិនតែប៉ុណ្ណោះ គេសន្និដ្ឋានថា វាអាចនឹងប្រើម៉ាស៊ីនចំណុះ ២,០លីត្រ VC-Turbo ទំហំ ៤ស៊ីឡាំង មានកម្លាំង ២៦៨សេះ ថែមទៀតផង។