ស្ងាត់ៗ មេ Tesla ប្រកាសក្តែងៗថា ផ្លូវក្រោមដីសម្រាប់ឡានអត់មនុស្សបើក ជិតរួចរាល់ហើយ!

September 21, 2020

មេក្រុមហ៊ុនរថយន្តអគ្គិសនីអាមេរិក Tesla លោក Elon Musk បានបង្ហោះសារលើបណ្តាញសង្គមរបស់ខ្លួន ដោយអះអាងថា ផ្លូវក្រោមដីដំបូងបង្អស់របស់ក្រុមហ៊ុន The Boring Company នៅក្នុងទីក្រុង Las Vegas ត្រូវបានសាងសង់ជិតរួចរាល់ហើយ។

ផ្លូវក្រោមដីចំនួន ២ ដែលសាងសង់ដោយក្រុមហ៊ុន The Boring Company ស្ថិតនៅក្រោមមជ្ឈមណ្ឌល Las Vegas Convention Center ហើយនឹងអនុញ្ញាតឲ្យធ្វើដំណើរពីចុងម្ខាងនៃមជ្ឍមណ្ឌល ទៅចុងម្ខាងទៀត ក្នុងរយៈពេលមិនដល់ ២នាទីឡើយ ខណៈការធ្វើដំណើរថ្មើរជើងធម្មតា គឺប្រើពេល ១៥នាទី។

គួរឲ្យដឹងថា ការជីកផ្លូវក្រោមដីបានរួចរាល់ជាស្ថាពរ កាលពីខែឧសភា ហើយគម្រោងបានកំណត់ឲ្យប្រព័ន្ធផ្លូវក្រោមដីបើកដំណើរការ សម្រាប់ព្រឹត្តិការណ៍ 2021 Consumer Electronics Show (CES) ក្នុងខែមករា ឆ្នាំ២០២១។

ផ្លូវក្រោមដីខាងលើត្រូវបានសាងសង់អស់ទឹកប្រាក់ ៥២,៥លានដុល្លារ ហើយនៅពេលដែលរួចរាល់ វានឹងអាចឲ្យដឹកអ្នកដំណើរដល់ទៅ ៤ ៤០០នាក់ក្នុងមួយម៉ោង៕

ផ្ទាំងផ្សាយពាណិជ្ជកម្ម

មើលកម្រិតស៊ីប្រេងឡាន SUV ប្រណីតរបស់កូរ៉េ

September 21, 2020

ស្ថាប័ន EPA បានបង្ហាញចេញកម្រិតស៊ីប្រេងរបស់រថយន្ត Genesis GV80 ស៊េរីឆ្នាំ ២០២១ មុនពេលរថយន្តនេះចេញលក់ជាផ្លូវការនៅលើទីផ្សារសហរដ្ឋអាមេរិក។

ចំពោះប្រភេទម៉ាស៊ីន Turbocharged ចំណុះ ២,៥លីត្រ ៤ស៊ីឡាំង ប្រើប្រព័ន្ធបើកបរវិលកង់ក្រោយ មានកម្រិតស៊ីប្រេង ១១,២លីត្រ/១០០គ.ម សម្រាប់ការបើកក្នុងក្រុង និងការបើកក្រៅក្រុងស៊ីជាមធ្យម ៩,៤លីត្រ ហើយសរុបជារួមស៊ីជាមធ្យម ១០,២២លីត្រ។ ចំពោះម៉ាស៊ីន ២,៥លីត្រ ដែលប្រើប្រព័ន្ធបើកបរវិលកង់ទាំងបួនវិញមាន កម្រិតស៊ីប្រេង ១១,២លីត្រ/ក្នុងក្រុង និង ៩,៤លីត្រ/ក្រៅក្រុង ហើយសរុបជារួមគឺស៊ី ១០,៦៩លីត្រ។

សម្រាប់ប្រភេទម៉ាស៊ីន Twin-Turbocharged ចំណុះ ៣,៥លីត្រ ៦ស៊ីឡាំង ដែលផលិតកម្លាំងបាន ៣៧៥សេះ និងប្រើប្រព័ន្ធបើកបរវិលកង់ទាំងបួន ស៊ីប្រេង ១៣,០៦លីត្រ/ក្នុងក្រុង និងស៊ីប្រេង ១០,២២លីត្រ/ក្រៅក្រុង ដែលសរុបជារួមគឺ ១១,៧៦លីត្រ។

គួរដឹងថានៅសហរដ្ឋអាមេរិក រថយន្ត GV80 នឹងមានតម្លៃចាប់ពី ៤៨ ៩០០ដុល្លារ ដល់ថ្លៃបំផុតគឺ ៧០ ៩៥០ដុល្លារ៕

ផ្ទាំងផ្សាយពាណិជ្ជកម្ម

Volkswagen ចង់លក់ម៉ាក Bugatti ទៅឲ្យក្រុមហ៊ុនមួយ

September 21, 2020

ផ្អែកតាមការចុះផ្សាយរបស់ Car Magazine បានឲ្យដឹងថាសម្ព័ន្ធ Volkswagen Group បានសម្រេចចិត្តលក់ម៉ាករថយន្ត Bugatti ទៅឲ្យក្រុមហ៊ុនផលិតរថយន្តអគ្គិសនីរបស់ក្រូអាតឈ្មោះថា Rimac Automobili។

បើផ្អែកតាមប្រភពដែលជិតដិតនឹងរឿងនេះបានបញ្ជាក់ឲ្យដឹងថា ការជួញដូរត្រូវទទួលបានការអនុញ្ញាតពីសំណាក់ថ្នាក់ដឹកនាំ VW Group កាលពីសប្ដាហ៍កន្លងទៅ ប៉ុន្តែប្រធានក្រុមប្រឹក្សាភិបាលនៅមិនទាន់បោះត្រាអនុញ្ញាតនៅឡើយទេ។ ទោះបីជាលក់ចេញមែន ប៉ុន្តែមួយផ្នែកនៃ Bugatti នឹងត្រូវមានទំនាក់ទំនងជាមួយ VW Group ដដែល ដោយសារម៉ាក Porsche មានកាន់កាប់ភាគហ៊ុន ១៥,៥% ក្នុងក្រុមហ៊ុន Rimac Automobili។

បញ្ជាក់ដែរថា ការចុះផ្សាយរបស់ Car Magazine បានឲ្យដឹងថាម៉ាករថយន្តផ្សេងទៀតដែលជ្រកក្រោមដំបូល VW Group មានដូចជា Lamborghini, SEAT, Italdesign និង Ducati ក៏កំពុងស្ថិតក្រោមពិចារណាលក់ចេញឲ្យក្រុមហ៊ុនដទៃផងដែរ៕

ផ្ទាំងផ្សាយពាណិជ្ជកម្ម

តោះមកមើលសកម្មភាពបើកបរសាកល្បងរថយន្ត Ford Ecosport នៅលើទីលានបើកបរយានយន្ត យ៉ាម៉ាម៉ូតូទំាងអស់គ្នា

September 21, 2020

កាលពីថ្ងៃទី ១២ ខែកញ្ញា ឆ្នាំ២០២០ ក្រុមហ៊ុន អ អិម អេ ខេមបូឌា ដែលជាក្រុមហ៊ុននាំចូល និងចែកចាយផ្ដាច់មុខនូវរថយន្ត Ford គ្រប់ប្រភេទក្នុងទីផ្សារប្រទេសកម្ពុជាបានរៀបចំកម្មវិធីបើកបរសាកល្បងរថយន្ត Ford Ecosport នៅទីលានបើកបរយានយន្ត យ៉ាម៉ាម៉ូតូ ដែលស្ថិតក្នុងតំបន់អភិវឌ្ឍន៍កសិទេសចរណ៍ ម៉ុង ឬទ្ធី សែនជ័យ ខេត្តកំពង់ស្ពឺ។

កម្មវិធីនេះបើកទទួលស្វាគមន៍សាធារណៈជនចូលរួមដោយសេរី និងទទួលបានការញុំាអាហារថ្ងៃត្រង់ដោយឥតគិតថ្លៃ។ មិនតែប៉ុណ្ណោះអ្នកចូលរួមបើកបរសាកល្បងថែមទាំងទទួលបានការបណ្តុះបណ្តាលថ្មីៗ និងអត្ថប្រយោជន៍ជាច្រើនដូចជា៖

ចូលរួមបើកបរសាកល្បងរថយន្ត Ford Ecosport ដោយឥតគិតថ្លៃ
ទទួលបានបទពិសោធន៍នៃការបើកបរ និងការបណ្តុះបណ្តាលផ្ទាល់ជាមួយអ្នកជំនាញ ឯកទេសរបស់ ក្រុមហ៊ុន Ford
យល់ដឹងអំពីប្រព័ន្ធសុវត្ថិភាព និងបច្ចេកទេសនៃការបើកបររថយន្ត
យល់ដឹងអំពីបច្ចេកទេសនៃការថែទាំយានយន្ត
យល់ដឹងអំពីបច្ចេកវិទ្យា និងអត្ថប្រយោជន៍នៃរថយន្ត Ford Ecosport

កម្មវិធីនេះបែងចែកជា២វគ្គ គឺជាដំបូងមុនពេលបើកបរសាកល្បងអ្នកបើកបរទំាងអស់ត្រូវបានទទូលការបណ្តុះបណ្តាលផ្នែកទ្រឹស្តីយ៉ាងម៉ត់ចត់ពីអ្នកជំនាញបច្ចេកទេសរបស់ក្រុមហ៊ុនហ្វដ

បន្ទាប់មកទទួលបានការបង្ហាត់បង្ហាញ និងបានអនុវត្តន៍ផ្ទាល់ផ្នែកដៃចង្កូតនៅទីលានដែលទាក់ទងទៅនឹង ការបើកបរលើផ្លូវកោង ផ្លូវបត់ ការតេស្តទៅលើប្រព័ន្ធហ្វ្រាំង ABS EBD ប្រព័ន្ធទប់លំនឹងសម្រាប់បើកបរលើផ្លូវកោង ឬផ្លូវរអិល និងបញ្ចៀសការក្រឡាប់ ESP ជាដើម។ អ្នកបើកបរទំាងអស់ទទួលបានការបើកបរសាកល្បងស្របទៅតាមស្តង់ដាបច្ចេកទេស និងទទួលបានបទពិសោធន៍ពិតនៃការបើកបររថយន្ត Ford Ecosport ផ្ទាល់ជាមួយនឹងអ្នកជំនាញបច្ចេកទេស។

ក្នុងកម្មវិធីការបើកបរសាកល្បងរថយន្ត Ford Ecosport នេះក៏មានការផ្តល់កិត្តិយសអញ្ជើញចូលរួមពីសំណាក់ ឯកឧត្តមបណ្ឌិត ម៉ុង ឫទ្ធី និងលោកជំទាវផងដែរ។

លើសពីនេះទៅទៀតភ្ញៀវដែលអញ្ជើញចូលរួមក៏បានទស្សនាសកម្មភាពបើកបររថយន្តនៅលើទីលានប្រណាំង ទទួលទានអាហារសម្រន់រួមទាំងភេសជ្ជះ និងការដាក់តំាងបង្ហាញនូវរថយន្ត Ford Ecosport ថ្មីទាំង ៧ពណ៍រួមមានស ខ្មៅ ប្រផេះ ទឹកប្រាក់ ខៀវ ក្រហម និងទឹកក្រូចក្រម៉ៅ ថែមទំាងទទួលបានការប្រឹក្សាយោបល់អំពីរថយន្ត Ford Ecosport ពីទីប្រឹក្សាផ្នែកលក់រថយន្ត ហ្វដ នៅទីលានបើកបរយានយាន្ត យ៉ាម៉ាម៉ូតូនេះផ្ទាល់តែម្តង។

កម្មវិធីនេះមិនមែនត្រឹមតែជាកម្មវិធីបើកបរសាកល្បងរថយន្ត Ford Ecosport ធម្មតានោះទេ តែក៏ជាឪកាសល្អមួយក្នុងការរៀនបន្ថែមទៅលើបច្ចេកទេសបើកបរ បច្ចេកវិទ្យានៃរថយន្ត និងការអនុវត្តន៍បើកបរផ្ទាល់ជាមួយអ្នកជំនាញបច្ចេកទេសផងដែរ។ តោះអញ្ចឹងសូមអញ្ជើញទស្សនានូវបណ្តុំរូបភាព និងវីដេអូនៃកម្មវិធីការបើកបរសាកល្បងរថយន្ត Ford Ecosport ទំាងអស់គ្នា។

សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

អាចកក់បានហើយ Hilux Revo Rally ឆ្នាំ ២០២១ ជាមួយតម្លៃធូរជាងមុន ៦០០ដុល្លារ

September 21, 2020

អ្វីដែលគ្រប់គ្នាទន្ទឹងរង់ចាំនោះបានមកដល់ហើយ! រថយន្តដែលស្ថិតក្នុងចំណាត់កំពូលរថយន្ត Pick-Up របស់តូយ៉ូតា នៅកម្ពុជា គឺ Hilux Revo Rally ឆ្នាំ ២០២១ ត្រូវបានក្រុមហ៊ុនផ្លូវការប្រកាសអោយអតិថិជនរបស់ខ្លួនធ្វើការកក់ចាប់ពីពេលនេះតទៅ។ តាមរយៈការសាកសួរបានបញ្ជាក់ថា រថយន្តនេះមានតម្លៃប្រហែល ៥៣ ៣០០ ដុល្លារ សម្រាប់ពណ៌ទូរទៅ លើកលែងពណ៌សកាំម៉ៃដែលតម្រូវអោយអតិថិជនបង់ប្រាក់ ៦០០ ដុល្លារបន្ថែម។ យោងតាមព័ត៌មាននេះបានបញ្ជាក់ថា ម៉ូឌែល ២០២១ នេះមានតម្លៃធូរជាងម៉ូឌែល២០២០ ដល់ទៅ ៦០០ដុល្លារឯណោះ។

រថយន្ត Hilux Revo Rocco ២០២១ របស់ប្រទេសថៃ (រូបតំណាង)

យ៉ាងណាមិញ យើងមិនទាន់ដឹងថា រថយន្តដែលនឹងមកដល់កម្ពុជានោះ មានលក្ខណៈបច្ចេកទេស និងលក្ខណៈពិសេសបែបណានោះទេ។ ក៏ប៉ុន្តែលោកអ្នក អាចស្វែងយល់បន្ថែមពីម៉ូឌែលថ្មីនេះពីប្រទេសថៃ ដែលក្រុមការងារ ខេមបូអូតូ បានសរសេរតាមរយៈអត្ថបទ Review+ ដែលលោកអ្នកអាចចុចមើលបាននៅទីនេះ!

គួរបញ្ជាក់ផងដែរថា នៅកម្ពុជាយើងសង្កេតឃើញថារថយន្ត Pick-Up គឺមានការគាំទ្រច្រើនជាងគេ បើមើលទៅតាមការចរាចរណ៌នៅលើដងផ្លូវ ដែលមានទាំងរថយន្តថ្មី និងរថយន្តមួយទឹកពីបរទេស។

ផ្ទាំងផ្សាយពាណិជ្ជកម្ម

ហេតុអ្វីបានជារថយន្ត MG RX5 ក្លាយជារថយន្តប្រភេទ SUV ដែលពេញនិយមនៅប្រទេសកម្ពុជា

September 21, 2020

រថយន្តប្រភេទ SUV ដែលផ្តល់ជូននូវកន្លែងអង្គុយសម្រាប់អ្នកបើកបរខ្ពស់ល្មម ដែលអាចឱ្យអ្នកបើកបរមើលឃើញផ្លូវនៅខាងមុខបានប្រសើរជាងមុន។ រថយន្តប្រភេទ SUV ក៏មានកម្ពស់ពីដីខ្ពស់ផងដែរដើម្បីធ្វើឱ្យការបើកបរលើដីមានភាពងាយស្រួល ហើយក៏សាកសមសម្រាប់ស្ថានភាពផ្លូវដែរ។ នៅប្រទេសកម្ពុជាឥឡូវនេះប្រជាជនមិនសូវត្រូវការរថយន្តណាដែលមានកម្លាំងខ្ពស់ពេកទេ ហើយពួកគេព្រមទទួលយករថយន្តប្រភេទ SUV ដែលមានម៉ាស៊ីនតូចជាងមុនដែល ជាហេតុធ្វើអោយរថយន្តដែលមានបំពាក់បន្ថែមនូវតួបូរបានផ្លាស់ប្តូរចិត្តរបស់ពួកគេ ហើយពួកគេក៏មិនសូវជាពេញនិយមរថយន្តដែលម៉ាស៊ីនធំដូចជាម៉ាស៊ីន V6 ដែលស៊ីសាំងច្រើនរួមជាមួយថ្លៃពន្ធផ្លូវខ្ពស់នោះទេ។

ទន្ទឹមនឹងនេះ MG Cambodia ដែលជាយីហោរថយន្តរបស់ប្រទេសអង់គ្លេសកំពុងបន្តគ្របដណ្តប់លើទីផ្សាររថយន្តប្រភេទ SUV នៅកម្ពុជាដោយសាររថយន្តមានតំលៃសមរម្យ ជាពិសេសវាមិនមានផលប៉ះពាល់ចំពោះបរិស្ថានដោយសារ វាប្រើប្រាស់ប្រភេទម៉ាស៊ីនសាំង ហើយម៉ូឌែលរថយន្ត SUV របស់ MG គឺកំពុងតែពេញនិយមនៅក្នុងទីផ្សារប្រទេសកម្ពុជានាពេលបច្ចុប្បន្ន។ ខាងក្រោមនេះគឺជាចំណុចសំខាន់ៗជាច្រើនដែលធ្វើអោយរថយន្ តMG RX5 ក្លាយជារថយន្តដែលលក់ដាច់និងពេញនិយមនៅប្រទេសកម្ពុជា ៖
១. មុខងារ : ជារថយន្តប្រភេទម៉ាស៊ីនសាំង ១.៥លីត្រ បន្ថែមជាមួយ turbocharger ដែលផ្តល់អោយរថយន្តមានកម្លាំងខ្លាំង ១៦៩សេះ និងកម្លាំងបង្វិល ២៥០Nm ហើយបំពាក់ជាមួយប្រអប់លេខអូតូ ៧វគ្គ។ ក្នុងពេលជាមួយគ្នានេះដែរបើនិយាយអំពីការស៊ីប្រេងឥន្ធនៈវិញក៏គួរឱ្យចាប់អារម្មណ៍ត្រឹមតែ ៧លីត្រ ក្នុងចម្ងាយ ១០០ គីឡូម៉ែត្រ។ រថយន្ត MG RX5 មានការរចនានិងមុខងារយ៉ាងល្អឥតខ្ចោះ។
២. បច្ចេកវិទ្យា : និយាយពីបច្ចេកវិទ្យាវិញ គឺមានមុខងារឆ្លាតវៃជាច្រើននៅក្នុងរថយន្ត MG RX5។ អេក្រង់ពណ៌ទំហំ ៨អ៊ីញ ដែលអាចភ្ផាប់ជាមួយទូរស័ព្ទស្មាតហ្វូនរបស់អ្នក និងផ្តល់ជូននូវការកម្សាន្តក្នុងរថយន្តដូចជា Apple Car Play, កៅអីអូតូស្វ័យប្រវត្តិ, smart key។ ដូច្នេះមិនថាអ្នកបើកបរផ្លូវឆ្ងាយអ្នកនៅតែអាចកម្សាន្តជាមួយតន្ត្រីដែលលោកអ្នកត្រូវការនៅពេលធ្វើដំណើរ ហើយព្រមទាំងងាយស្រួលប្រតិបត្តិការផងដែរ។

៣. ប្រព័ន្ធសុវត្តិភាព : រថយន្ត MG RX5 ត្រូវបានបំពាក់ដោយពោងសុវត្ថិភាពចំនួន៦, កាមេរ៉ាសម្រាប់ពេលចតរថយន្ត និងប្រព័ន្ធហ្វ្រាំងឆ្លាតវៃ។ ជាមួយនឹងម៉ូឌែល RX5 ត្រូវបានធានាយ៉ាងត្រឹមត្រូវរយៈពេល៣ឆ្នាំ ឬ ១០០ ០០០គីឡូម៉ែត។ ទីតាំងអង្គុយរបស់អ្នកបើកបរខ្ពស់ដែលជាទិដ្ឋភាពប្រសើរជាងមុនសម្រាប់ការមើលអំពីចរាចរណ៍និងស្ថានភាពផ្លូវ។
៤. តម្លៃ : ជាទូទៅរថយន្តធំគឺមានតម្លៃខ្ពស់ប៉ុន្តែរថយន្ត MG RX5 មានតម្លៃសមរម្យក្នុងការស្ថាបនារថយន្តមួយនេះអោយកាន់តែមានការពេញនិយមជាមួយតម្លៃសមរម្យជាងមុនត្រឹមតែ ៣៨ ០០០ដុល្លារជាមួយនឹងកាដូថែមជូនជាច្រើនមុខទៀត ហើយចំណុចដែលធ្វើអោយរថយន្ត MG RX5 ពិតជាឈ្នះដៃគូរប្រកួតប្រជែងគឺការសន្សំសំចៃប្រេងឥន្ធនៈព្រមជាមួយនឹងភាពទាក់ទាញនៃរូបរាង។

៥. ផាសុកភាព : អំពូលភ្លើងមុខបន្ថែមនូវភាពទាក់ទាញទៅលើរូបរាងដ៏ប្រណីតហើយបន្ថែមទៀតនោះ គឺមានបំពាក់ជាមួយដំបូលលើដែលផ្តល់ថាមពលដល់ ផ្នែកខាងក្នុងនៃរថយន្តអោយកាន់តែមានផាសុកភាព និងមានបរិយាកាសល្អឥតខ្ចោះក្នុងពេលបើកបរ។ រថយន្ត MG RX5 មានសមត្ថភាពអាចផ្ទុកសម្ភារៈជាច្រើន និងកៅអីខាងក្រោយដែលអាចផ្លាស់ប្តូរបាន ឬបត់បែនបានយ៉ាងល្អដែលនឹងផ្តល់ភាពងាយស្រួលដល់លោកអ្នក។

រថយន្ត MG RX5 គឺជារថយន្តប្រភេទ SUV ដ៏មានប្រជាប្រិយមួយនៅក្នុងប្រទេសកម្ពុជាដែលផ្តល់ជូនលោកអ្នកនូវផាសុកភាព អត្ថប្រយោជន៍សន្សំ ក៏ដូចជាភាពរស់រវើកនៃរូបរាងគួរអោយទាក់ទាញ និងមុខងារប្រើប្រាស់ទំនើបៗសម្រាប់គ្រួសាររបស់អ្នកដែលជាហេតុធ្វើឲ្យក្រុមហ៊ុនរថយន្ត MG បានបង្កើនការលក់សម្រាប់ឆ្នាំ២០២០នេះដោយលក់រថយន្ត SUV ចំនួនប្រមាណ៣៥០គ្រឿងដែលកើនឡើង៨៩ភាគរយ បើប្រៀបធៀបទៅនឹងលទ្ធផលការលក់កាលពីឆ្នាំមុន។

ផ្ទាំងផ្សាយពាណិជ្ជកម្ម

រថយន្តប្រភេទ Blacked Out ល្អបំផុតប្រចាំឆ្នាំ២០២០

September 20, 2020

ជារៀងរាល់ឆ្នាំ នៅក្នុងឧស្សាហកម្មយានយន្តតែងតែផលិតរថយន្តលំដាប់ប្រភេទ មានចំនួនកំណត់ (Limited Edition) ឬក៏ជាប្រភេទពិសេស ដើម្បីជាផ្នែកមួយជួយជំរុញទៅដល់ទីផ្សារលក់រថយន្តរបស់ខ្លួនផងដែរ។ ហៅនៅពេលថ្មីៗនេះក៏ចាប់ផ្តើម មានពាក្យជាច្រើនដូចជា៖ Black Edition, Midnight Edition, Dark Shadow ឬ Nightshade Edition។ ហេតុនេះហើយ ថ្ងៃនេះយើងនឹងបង្ហាញអ្នកទាំងអស់គ្នាអោយឃើញនូវប្រភេទរថយន្តខ្មៅពិសេស ឬហៅថាជា Blacked Out ល្អបំផុតប្រចាំឆ្នាំ២០២០ នេះ ដែលមានដូចជា៖

BMW X7 Dark Shadow Edition រថយន្តអាចនិយាយថាជារថយន្តថ្មីបំផុតជាងគេ ដែលទើបតែផលិតបាន ៦០០គ្រឿងប៉ុណ្ណោះ។

Ram Heavy Duty Limited Black Edition

Audi e-tron Black Edition

Honda CR-V Black Edition

Lexus GS Black Edition

BMW 2 Series Gran Coupe Black Shadow

Toyota 86 Black Limited

Rolls-Royce Cullinan Black Badge

Chevrolet Silverado Midnight Edition

Toyota Avalon Nightshade Edition

ផ្ទាំងផ្សាយពាណិជ្ជកម្ម

រថយន្ត Ferrari Portofino មួយប្រភេទនេះនឹងមានកំលាំង ៦១២សេះ

September 20, 2020

យើងម្នាក់ៗបានដឹងរួចមកហើយថារថយន្ត Ferrari Portofino ឆ្នាំ២០២១ នឹងធ្វើការផ្លាស់ប្តូរតែផ្នែកខាងមុខប៉ុណ្ណោះ តាមរយះរូបភាពដែលពួកយើងលួចថតបាន ពេលកំពុងបើកសាកល្បងនៅឯទីក្រុង Maranello ប្រទេសអុីតាលីកាលពីពេលកន្លងទៅនេះ។ ពេលនេះក្រុមហ៊ុន Ferrari ក៏បានបញ្ចេញរថយន្តកំរឹតទាបមួយប្រភេទទៀតនៃរថយន្ត Ferrari Portofino ដែលមានឈ្មោះថា Portofino M។ អក្សរ M នេះ គឺមកពីពាក្យ “Modificata” បញ្ជាក់ពីការអភិវឌ្ឍន៌នៃរូបរាងដែលមើលទៅកាន់តែស្ព័របន្ថែមទៀត។

រថយន្ត Ferrari Portofino M នេះបំពាក់ជាមួយម៉ាស៊ីន ៣,៩លីត្រ ស៊ីឡាំង ៨ម៉ាស៊ីន ប្រើប្រាស់ទែកប៊ូភ្លោះ ផលិតកំលាំងបាន ៦១២សេះ លើសពីរថយន្ត Portofino កំរឹតធម្មតាដែលកំលាំងចាប់ពី ៥៩១សេះប៉ុណ្ណោះ។ រថយន្តនេះអាចមានសន្ទុះល្បឿន ១០០គ.ម/ម៉ (62 mph) ប្រើប្រាស់រយៈពេលត្រឹមតែ ៣,៤៥វិនាទី និងអាចរត់ដល់ល្បឿនពេញ ៣២០គ.ម/ម៉ (198 mph)។

ទោះជាយ៉ាងណាសម្រាប់រថយន្ត Ferrari Portofino M មិនទាន់មានតម្លៃនូវឡើយទេ ខណៈ Ferrari Portofino មានតម្លៃចាប់ពី ២១៥ ០០០ ដុល្លារ។

ផ្ទាំងផ្សាយពាណិជ្ជកម្ម

ដឹងពេលប្រកាសឡាន Range Rover ប្រភេទអគ្គិសនីសុទ្ធឆ្នាំនេះ

September 19, 2020

ជំងឺរាតត្បាតកូវីដ១៩បានធ្វើឲ្យប៉ះពាល់ដល់ឧស្សាហកម្មជាច្រើនរួមទាំងឧស្សាហកម្មយានយន្ត ដែលធ្វើឲ្យការប្រកាសចេញរថយន្តថ្មីៗត្រូវពន្យារពេលជាច្រើនខែ។ នាឆ្នាំ ២០២០ នេះ ក្រុមហ៊ុន Jaguar Land Rover នឹងបង្ហាញចេញរថយន្ត Jaguar XJ អគ្គិសនីជំនាន់ថ្មី និងរថយន្ត Range Rover អគ្គិសនីដំបូងបំផុតផងដែរ ដែលត្រូវពន្យារពេលបន្តិចបន្តួចព្រោះជំងឺកូវីដ១៩។

ដើមឡើយរថយន្ត Jaguar XJ ថ្មី និងរថយន្ត Range Rover អគ្គិសនីគ្រោងបង្ហាញវត្តមាននៅក្នុងខែសីហា និងខែកញ្ញា ប៉ុន្តែបើតាមការចុះផ្សាយរបស់ Autocar បានឲ្យដឹងថារថយន្តអគ្គិសនីទាំងពីរនឹងលើកពេលប្រកាសចេញនៅក្នុងខែតុលា និងខែវិច្ឆិកាវិញ។ នេះបើផ្អែកតាមការលើកឡើងរបស់លោក Adrian Mardell ប្រធានផ្នែកហិរញ្ញវត្ថុប្រចាំក្រុមហ៊ុន Jaguar Land Rover។

រថយន្តអគ្គិសនីទាំងពីរនឹងផលិតឡើងដោយប្រើប្រាស់គ្រោងឆ្អឹងថ្មីរបស់ JLR មានឈ្មោះថា MLA។ ការចុះផ្សាយរបស់ Autocar បានអះអាងថារថយន្ត Jaguar XJ ថ្មីនឹងមានម៉ូទ័រអគ្គិសនីចំនួនបួន ដែលផលិតកម្លាំងបានសរុប ៨០០សេះ ដែលវានឹងក្លាយជារថយន្តកម្លាំងខ្លាំងជាងគេរបស់ម៉ាក Jaguar៕

ផ្ទាំងផ្សាយពាណិជ្ជកម្ម

ឡានភីកអាប់ Ram 1500 TRX មានបង្កប់រូបភាពឌឺដងដល់ F-150 Raptor

September 19, 2020

ក្នុងវីដេអូមួយដែលបង្ហោះនៅលើ Instagram បានបង្ហាញអំពីរូបភាពសត្វដាយណឺស័រ Tyrannosaurus Rex ត្របាក់សត្វដាយណឺស័រ Velociraptor ដែលមាននៅលើគម្របម៉ាស៊ីនរថយន្ត Ram 1500 TRX។

រូបភាពនេះគេអាចដឹងយ៉ាងច្បាស់ថាសត្វដាយណឺស័រ Tyrannosaurus Rex គឺចង់តំណាងឲ្យរថយន្ត 1500 TRX ចំណែកសត្វដាយណឺស័រ Velociraptor គឺតំណាងឲ្យ Ford F-150 Raptor ដែលចង់មានន័យថា F-150 Raptor មិនអាចស៊ូនឹង 1500 TRX បានឡើយ។

View this post on Instagram

TRX Easter Egg ??? . . #ramtrx #hatersgonnahate #raptorkiller #ramtrucks

A post shared by Midwest Offroad Expeditions (@catchmeoffroad) on Sep 13, 2020 at 9:02am PDT

គួរដឹងថា F-150 Raptor មានម៉ាស៊ីន Twin-Turbo ចំណុះ ៣,៥លីត្រ ៦ស៊ីឡាំង ដែលផលិតកម្លាំងបាន ៤៥០សេះ។ ចំណែកឯ 1500 TRX វិញមានបំពាក់ម៉ាស៊ីន Supercharged ចំណុះ ៦,២លីត្រ ៨ស៊ីឡាំង ដែលផលិតកម្លាំងបានដល់ ៧០២សេះឯណោះ៕

ផ្ទាំងផ្សាយពាណិជ្ជកម្ម