Ford Territory EV ឆ្នាំ២០២០ សាកភ្លើងម្តងជិះបានជិត ៥០០គ.ម៉ តម្លៃតែជាង២ម៉ឺនដុល្លារ

September 19, 2020

ក្រុមហ៊ុន Ford បានប្រកាសចេញរថយន្ត Territory EV ដែលដំណើរការដោយថាមពលអគ្គិសនី ស៊េរីឆ្នាំ២០២០ របស់ខ្លួនជាផ្លូវការ នៅក្នុងប្រទេសចិន ដោយវាបានបំពាក់កញ្ចប់អាគុយថ្មីផងដែរ។

រថយន្ត Ford Territory EV ឆ្នាំ២០២០ អាចបើកបរបានចម្ងាយ ៤៣៥គីឡូម៉ែត្រ រាល់ពេលសាកភ្លើងពេញម្តង តាមរយៈអាគុយអគ្គិសនីកម្លាំង ៦០,៤គីឡូវ៉ាត់ម៉ោង ដែលផ្តល់ថាមពលឲ្យទៅម៉ូទ័រអគ្គិសនីមួយ ដែលបង្កើតកម្លាំងបានសរុប ១៦១សេះ។

បន្ថែមពីនេះ Territory EV ថ្មីក៏អនុញ្ញាតឲ្យម្ចាស់រថយន្ត ប្រើស្មាតហ្វូនរបស់ពួកគេ ដើម្បីចាក់ និងបើកសោររថយន្តផងដែរ។ ក្នុងនោះវាបំពាក់កុងទ័រឌីជីថល ១០,២៥អ៊ីញ និងអេក្រង់កម្សាន្តទំហំ ១០អ៊ីញ ដែលមានមុខងារផែនទី និងអាចបញ្ជាដោយប្រើសំឡេង បានផងដែរ។

មិនតែប៉ុណ្ណោះ បច្ចេកវិទ្យាសុវត្ថិភាព Co-Pilot360 ត្រូវបានបំពាក់មកស្តង់ដារ ដោយក្នុងនោះរួមមានមុខងារ ដូចជា blind spot monitoring, front collision warning, lane departure warning និង active park assist ជាដើម។

Ford កំពុងដាក់លក់ Territory EV ចំនួន ២ប្រភេទ ដោយមានតម្លៃចាប់ពី ២៦ ៣៦០ដុល្លារ និង ២៨ ២៦៥ដុល្លារ៕

ផ្ទាំងផ្សាយពាណិជ្ជកម្ម

Toyota Yaris ក្លាយជាឡានដំបូង ចូលធ្វើតេស្តបែបថ្មីរបស់ Euro NCAP ឆ្នាំ២០២០

September 19, 2020

Toyota Yaris ជំនាន់ទី៤ បានក្លាយជារថយន្តដំបូងគេបង្អស់ ដែលបានចូលធ្វើតេស្តបែបថ្មីរបស់ Euro NCAP ឆ្នាំ២០២០ ដោយក្នុងនោះមានការធ្វើតេស្ត Frontal Offset ថ្មី ដែលជំនួសការធ្វើតេស្តចាស់ ប្រើតាំងពីឆ្នាំ១៩៩៧។

ក្នុងនោះដែរ រថយន្ត Yaris ទទួលបានពិន្ទុល្អ ក្នុងអំឡុងពេលធ្វើតេស្ត អរគុណដល់បច្ចេកវិទ្យា Safety Sense ជំនាន់ចុងក្រោយរបស់ Toyota ដែលអាចឲ្យរថយន្តឈប់ភ្លាមៗនៅពេលបត់ ដើម្បីគេចពីគ្រោះថ្នាក់ ប្រសិនបើមានរថយន្តផ្សេងមកពីមុខ។

គួរឲ្យដឹងថា ក្នុងការធ្វើតេស្តទាំង ៤ ប្រភេទធំៗ រថយន្ត Toyota Yaris ខាងលើ ទទួលបានពិន្ទុ ៨៦ ក្នុងប្រភេទ Adult Occupant, ពិន្ទុ ៨១ ក្នុងប្រភេទ Child Occupant, ពិន្ទុ ៧៨ ក្នុងប្រភេទ Vulnerable Road Users និង ពិន្ទុ ៨៥ ក្នុងប្រភេទ Safety Assist៕

ចង់ដឹងយ៉ាងណា សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

Ford បញ្ជាក់ថាឡាន F-150 ប្រភេទអគ្គិសនី នឹងមានកម្លាំងលើសពី ៤៥០សេះ

September 18, 2020

Ford បានបញ្ចេញវីដេអូ Teaser ថ្មីមួយសម្រាប់រថយន្ត F-150 អគ្គិសនី និងបានប្រកាសពីផែនការផលិតរថយន្តនេះនៅរោងចក្រថ្មីក្នុងរដ្ឋ Michigan សហរដ្ឋអាមេរិកផងដែរ ដែលនឹងចាប់ផ្ដើមពីពាក់កណ្ដាលឆ្នាំ ២០២២។

ក្រុមហ៊ុនរថយន្តអាមេរិកនេះមិនបាននិយាយអ្វីច្រើនអំពីរថយន្តភីកអាប់អគ្គិសនីរបស់ខ្លួននោះទេ ប៉ុន្តែបានបញ្ជាក់ថាវានឹងមានបំពាក់នូវម៉ូទ័រអគ្គិសនីចំនួនពីរ ដែលអាចផលិតកម្លាំងបានលើសពីរថយន្ត F-150 ដែលមាននាពេលបច្ចុប្បន្នទៅទៀត។

នេះមានន័យថា F-150 អគ្គិសនី នឹងមានកម្លាំងខ្លាំងជាងរថយន្ត F-150 Raptor ឆ្នាំ ២០២០ ដែលមានម៉ាស៊ីន EcoBoost ៣,៥លីត្រ ៦ស៊ីឡាំង ផលិតកម្លាំងបាន ៤៥០សេះ។ Ford បានសន្យាថារថយន្ត F-150 ប្រភេទអគ្គិសនីនឹងបង្កើនសន្ទុះបានលឿន ហើយអាចសណ្ដោងបានធ្ងន់ទៀតផង៕

ផ្ទាំងផ្សាយពាណិជ្ជកម្ម

Nissan Z Proto បង្ហាញមុខជាផ្លូវការ ឌីហ្សាញបែប Retro ស្អាតប្លែក

September 18, 2020

ក្រុមហ៊ុន Nissan បានប្រកាសចេញរថយន្តស្ព័រ Z Proto ស៊េរីថ្មីរបស់ខ្លួនជាផ្លូវការ ដែលជាអ្នកស្នងតំណែង ម៉ូដែល 370Z។

រថយន្ត Nissan Z Proto ទទួលបានការឌីហ្សាញថ្មីទាំងស្រុង តាមបែប Retro យ៉ាងទាក់ទាញ គួបផ្សំទាំងពណ៌ថ្នាំលឿងខ្ចី និងចង្កៀងមុខ LED រាងតំណក់ទឹកភ្នែក កាត់តាមម៉ូដែល 240ZG កាលឆ្នាំ១៩៧០។

ចំណែកឯផ្នែកខាងក្រោយ វាមានការឌីហ្សាញរាងទំនើបបន្តិច ដោយកាត់តាមម៉ូដែល 300ZX ហើយបំពាក់ចង្កៀងក្រោយយ៉ាងស្រស់ស្អាតផងដែរ។ ក្រៅពីនោះ វាក៏បំពាក់យ៉ាន់ Alloy ១៩អ៊ីញ, ប្រព័ន្ធបំពង់ស៊ីម៉ាំងភ្លោះ និង កាងកាត់ខ្យល់ខាងមុខ-ក្រោយ-ចំហៀង ផលិតពី Carbon Fiber ជាដើម។

រថយន្តស្ព័រ Z Proto មានប្រវែង ៤ ៣៨២មីល្លីម៉ែត្រ ទទឹក ១ ៨៤៩មីល្លីម៉ែត្រ និងកម្ពស់ ១ ៣១១មីល្លីម៉ែត្រ។ កាប៊ីនខាងក្នុងរបស់វាមានបំពាក់កុងទ័រឌីជីថល ១២,៣អ៊ីញ និងប្រព័ន្ធកម្សាន្តកាន់តែទំនើបជាងមុន។

Nissan បានបញ្ជាក់ថា Z Proto នឹងប្រើម៉ាស៊ីន Twin-Turbo V6 ជាមួយប្រអប់លេខដៃ ៦វគ្គ ប៉ុន្តែមិនបានបញ្ជាក់ពីកម្លាំងជាក់លាក់ឡើយ៕

ផ្ទាំងផ្សាយពាណិជ្ជកម្ម

ផ្ទាំងប៉ាណាមុខឡាន Hyundai Tucson ឆ្នាំ២០២២ ពិសេសប្លែកខុសពីឡានដទៃ

September 18, 2020

រថយន្ត Hyundai Tucson ស៊េរីឆ្នាំ២០២២ បានបង្ហាញខ្លួនជាផ្លូវការ ដោយបានផ្លាស់ប្តូរការឌីហ្សាញថ្មីទាំងស្រុង ទាំងផ្នែកខាងក្រៅ និងខាងក្នុង មើលទៅរឹតតែអង់អាច។

រថយន្ត Tucson ជំនាន់ទី៤ នេះបានបំពាក់ផ្ទាំងប៉ាណាមុខដ៏ពិសេសមួយ ហៅថា Parametric Hidden Lights ដែលវានឹងងងឹតឈឹងពេលរថយន្តរលត់ ហើយបញ្ចេញភ្លើងបំភ្លឺពេលថ្ងៃ (DRL) នៅពេលរថយន្តដំណើរការ។

គួរឲ្យដឹងថា SUV នេះនឹងផ្តល់ជម្រើសពណ៌រហូតដល់ទៅ ៧ មានដូចជា White Cream, Phantom Black, Shimmering Silver, Nocturne Gray, Amazon Gray, Flame Red និង Intense Blue។ វាមានបំពាក់អេក្រង់ទំហំ ១០,២៥អ៊ីញ និង ៨អ៊ីញ ដែលអាចភ្ជាប់ជាមួយមុខងារ Apple CarPlay និង Android Auto ហើយអាចភ្ជាប់ Bluetooth ម្តង២ក្នុងពេលតែមួយ។

រថយន្ត Hyundai Tucson នឹងប្រើម៉ាស៊ីនសាំងចំណុះ ២,៥លីត្រ ទំហំ ៤ស៊ីឡាំង មានកម្លាំង ១៨៧សេះ និងប្រអប់លេខអូតូ ៨វគ្គ។ វានឹងចេញលក់នៅក្នុងឆ្នាំ២០២១ ខាងមុខ៕

ផ្ទាំងផ្សាយពាណិជ្ជកម្ម

ឡានចិនមួយ ចម្លងម៉ូដតាម Ford F-150 Raptor

September 17, 2020

រថយន្តម៉ូដែល Da Jiang Jun របស់ក្រុមហ៊ុនរថយន្តចិន Foton គ្រោងនឹងបង្ហាញវត្តមានជាផ្លូវការក្នុងកម្មវិធីតាំងបង្ហាញរថយន្ត Being Auto Show នាថ្ងៃទី ២៦ ខែកញ្ញានេះ ដែលរូបរាងរបស់វាមើលទៅមានលក្ខណៈស្រដៀងគ្នាខ្លាំងនឹងរថយន្ត Ford F-150 Raptor។

បើផ្អែកតាមវិបសាយ Ford Authority បានឲ្យដឹងថារថយន្ត Da Jiang Jun នេះគឺមានទំហំដែលស្រដៀងនឹង Ford Ranger ជាជាង Ford F-150 Raptor គ្រាន់តែវាមានការឌីហ្សាញទំនោរទៅតាម Ford F-150 Raptor។

រថយន្ត F-150 Raptor បំពាក់ដោយម៉ាស៊ីន Twin-Turbocharged ចំណុះ ៣,៥លីត្រ ៦ស៊ីឡាំង ចំណែករថយន្ត Da Jiang Jun វិញមានបំពាក់ម៉ាស៊ីន Turbocharged ចំណុះ ២,០លីត្រ ៤ស៊ីឡាំង ហើយវាក៏មានជម្រើសម៉ាស៊ីនម៉ាស៊ូតចំណុះ ២,០លីត្រ និង ២,៥លីត្រផងដែរ៕

ផ្ទាំងផ្សាយពាណិជ្ជកម្ម

Volvo ចេញបច្ចេកវិទ្យាដំបូងបង្អស់លើលោកមួយ ជួយកាត់បន្ថយខ្យល់ពុលក្នុងកាប៊ីនឡាន

September 17, 2020

កាលពីអំឡុងឆ្នាំ១៩៨០ គេចាប់ផ្តើមបំពាក់ប្រព័ន្ធម៉ាស៊ីនត្រជាក់នៅក្នុងរថយន្ត។ ស្របពេលដែលបច្ចេកវិទ្យាកាន់តែដើរទៅមុខពីមួយថ្ងៃទៅមួយថ្ងៃ ប្រព័ន្ធម៉ាស៊ីនត្រជាក់អូតូសព្វថ្ងៃនេះ អាចរក្សាកម្រិតសីតុណ្ហភាព នៅក្នុងតំបន់ខុសៗគ្នា ដើម្បីតម្រូវតាមចិត្តអ្នកដំណើរជាក់លាក់ណាមួយ។

ឥឡូវនេះ Volvo បានធ្វើឲ្យប្រព័ន្ធម៉ាស៊ីនត្រជាក់រឹតតែទំនើប ដោយចេញនូវបច្ចេកវិទ្យាដំបូងបង្អស់លើលោកមួយ ហៅថា Advanced Air Cleaner ដែលជួយវាស់កម្រិតគុណភាពខ្យល់ PM 2.5 នៅក្នុងកាប៊ីនរថយន្ត។

Volvo អះអាងថា មុខងារនេះអាចកម្ចាត់ កម្រិត PM 2.5 ដែលគ្រោះថ្នាក់ រហូតដល់ទៅ ៩៥ភាគរយ ចេញពីក្នុងកាប៊ីនរថយន្ត តាមរយៈការបំពាក់តម្រងសសៃ Fiber។ គួរឲ្យដឹងថា បច្ចេកវិទ្យានេះមានបំពាក់លើត្រកូល 60 និង 90 ទាំងអស់របស់ Volvo រួមទាំងម៉ូដែល S60 និង XC90 ផងដែរ៕

ផ្ទាំងផ្សាយពាណិជ្ជកម្ម

ក្រុមហ៊ុនឡានវៀតណាមបោះលុយ ទិញយកកន្លែងតេស្តឡានធំមួយនៅអូស្រ្តាលី

September 16, 2020

ត្បិតថាជាក្រុមហ៊ុនរថយន្តដែលទើបបង្កើតឡើងកាលពីខែកក្កដា ឆ្នាំ ២០១៩ មែនពិត ប៉ុន្តែក្រុមហ៊ុនរថយន្តរបស់វៀតណាម Vinfast មានដំណើរការលឿនបំផុត។

កាលពីសប្ដាហ៍កន្លងទៅ ក្រុមហ៊ុន Vinfast បានទិញយកកន្លែងធ្វើតេស្តរថយន្ត Lang Lang Proving Ground របស់ក្រុមហ៊ុន Holden ដែលមានទីតាំងនៅរដ្ឋ Victoria ប្រទេសអូស្ត្រាលី ដែលនេះជាផ្នែកមួយនៃផែនការពង្រឹងកិត្តិនាមលើទីផ្សារអន្តរជាតិរបស់ក្រុមហ៊ុន Vinfast។

Lang Lang Proving Ground ជាមជ្ឈមណ្ឌលធ្វើតេស្តរថយន្តចំណាស់ជាងគេមួយ ហើយក៏មានភាពទំនើបខ្លាំងផងដែរ ដែលមានផ្ទៃដីទំហំ ៨៧២ហិតា។ វាមានផ្លូវកៅស៊ូ និងផ្លូវមិនមានក្រាលកៅស៊ូសរុបប្រវែងជាង ៤៤គីឡូម៉ែត្រ សម្រាប់ធ្វើតេស្តរថយន្តគ្រប់ស្ថានភាពផ្លូវ។

ក្រុមហ៊ុន Vinfast បានប្រាប់ឲ្យដឹងថានាពេលបច្ចុប្បន្ននេះការស្រាវជ្រាវនិងការអភិវឌ្ឍន៍លើផលិតផលរបស់ Vinfast មានសន្ទុះលឿនខ្លាំង ហើយការដែលមានមជ្ឈមណ្ឌលធ្វើតេស្តទំនើបនេះបានចូលរួមចំណែកជួយបានយ៉ាងច្រើនដល់សកម្មភាពរបស់ Vinfast៕

ផ្ទាំងផ្សាយពាណិជ្ជកម្ម

Kia ត្រៀមផលិតឡានប្រជែងនឹង Toyota Land Cruiser

September 15, 2020

តាមការចុះផ្សាយរបស់ Motoring.com បានឲ្យដឹងថាក្រុមហ៊ុនកូរ៉េខាងត្បូង Kia កំពុងត្រៀមរថយន្ត SUV ខ្នាតធំដើម្បីប្រកួតប្រជែងនឹងរថយន្ត Toyota Prado ហើយវាក៏អាចជាគូប្រជែងរបស់ Toyota Land Cruiser ផងដែរ។

ជាមួយការប្រើប្រាស់ប្រព័ន្ធបើកបរប៉ុងពីរថ្មី និងការប្រើប្រាស់នូវគ្រោងឆ្អឹងរបស់រថយន្តភីកអាប់អនាគតរបស់ Kia អាចឲ្យគេបង្កើតបាននូវរថយន្ត SUV ដែលមានកម្លាំងខ្លាំង អាចបើកបរលើគ្រប់ស្ថានភាពផ្លូវ មិនចាញ់រថយន្ត Toyota Land Cruiser ឡើយ។

លោក Roland Rivero ជានាយកផ្នែកផលិតផលរបស់ Kia ប្រចាំនៅប្រទេសអូស្ត្រាលីធ្លាប់បាននិយាយអំពីមហិច្ឆតាចង់ផលិតរថយន្ត SUV កម្លាំងខ្លាំង ដែលលោកបានបង្ហាញក្ដីរំពឹងថារថយន្តប្រភេទនេះអាចនឹងបង្ហាញមុខលើទីផ្សារនាឆ្នាំ ២០២៣៕

ផ្ទាំងផ្សាយពាណិជ្ជកម្ម

Honda Passport ឆ្នាំ២០២១ ចេញតម្លៃលក់ផ្លូវការ ចាប់ពីខ្ទង់ ៣ម៉ឺនដុល្លារ

September 15, 2020

រថយន្ត Honda Passport ស៊េរីឆ្នាំ២០២១ បានចេញលក់នៅលើទីផ្សារសហរដ្ឋអាមេរិក ជាផ្លូវការ ដោយនឹងមានតម្លៃចាប់ពី ៣២ ៥៩០ដុល្លារ។

បើប្រៀបធៀបទៅនឹងឆ្នាំមុន Passport ថ្មីមានតម្លៃថ្លៃជាងមុន ៦០០ដុល្លារ ប៉ុន្តែមានបំពាក់អេក្រង់កម្សាន្តទំហំ ៨អ៊ីញមកស្តង់ដារ ដែលអាចភ្ជាប់ជាមួយមុខងារ Android Auto និង Apple CarPlay បាន។ ក្រៅពីនោះ វាក៏មានបំពាក់ចង្កៀងមុខ LED, កញ្ចក់ក្រោយខ្មៅ, យ៉ាន់ ២០អ៊ីញ, ប្រព័ន្ធម៉ាស៊ីនត្រជាក់ ៣តំបន់ និង Speaker ៧គ្រាប់ បូក Subwoofer មួយផងដែរ។

ចំពោះប្រព័ន្ធសុវត្ថិភាពវិញ វាមានបំពាក់មុខងារដូចជា adaptive cruise control, auto high-beam headlights, collision mitigation braking system, multi-angle rearview camera, forward collision warning, lane keeping assist, lane departure warning និង road departure mitigation system ទៀតផង។