១០ម៉ាស៊ីនដូចគ្នា Lexus LFA និង Audi R8 V10 Spyder ប្រណាំងផ្លូវលាត មួយណាឈ្នះ? (មានវីដេអូ)

September 8, 2020

Lexus LFA ត្រូវបានគេចាត់ទុកថាជារថយន្ត Supercar ដ៏អស្ចារ្យបំផុតមួយ ប៉ុន្តែវាត្រូវបានគេឈប់ផលិតនៅចុងឆ្នាំ២០១២ ក្រោយផលិតបានត្រឹម ៥០០គ្រឿងប៉ុណ្ណោះ។

Lexus LFA បំពាក់ម៉ាស៊ីន V10 ចំណុះ ៤,៨លីត្រ មានកម្លាំង ៥៥២សេះ ដែលសហការណ៍ផលិតដោយ ក្រុមហ៊ុន Yamaha។ វាអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៣,៨វិនាទីប៉ុណ្ណោះ ហើយមានល្បឿនអតិបរមាដល់ ៣២៥គីឡូម៉ែត្រក្នុងមួយម៉ោង។

ដោយឡែក រថយន្ត Audi R8 V10 Spyder ក៏បំពាក់ម៉ាស៊ីន V10 ដែរ តែចំណុះ ៥,២លីត្រ naturally aspirated មានកម្លាំងខ្លាំងជាង គឺ ៦១១សេះ ហើយអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,២វិនាទី និងមានល្បឿនអតិបរមា ៣២៨គីឡូម៉ែត្រក្នុងមួយម៉ោង។

ទោះជាយ៉ាងណា ថ្វីបើមានកម្លាំងខ្សោយជាងមែន ប៉ុន្តែ Lexus LFA មានទម្ងន់ស្រាលជាង Audi R8 ដល់ទៅ ២៩០គីឡូក្រាមឯណោះ៕

ចង់ដឹងថា រត់លើផ្លូវលាតមួយស្មើរថយន្តណាឈ្នះ ទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

ខ្លាំងបាត់! យកឡាន Ford Raptor ច្នៃចេញជាឡាន Tesla Cybertruck

September 8, 2020

ផ្អែកតាមការចុះផ្សាយរបស់ Reuters បានឲ្យពីការកែច្នៃរថយន្ត Ford F-150 Raptor ចេញជារថយន្ត Tesla Cybertruck ជារថយន្តភីកអាប់អគ្គិសនីដែលមិនទាន់មានចេញលក់លើទីផ្សារនៅឡើយ។

រថយន្តកែច្នៃដែលមានរូបរាងស្ទើរតែដូចគ្នាបេះដាក់ទៅនឹង Cybertruck នេះគឺចំណាយពេលផលិតរយៈពេល ៨ខែ និងមានការចូលរួមពីអ្នកជំនាញ និងក្រុមវិស្វករជាច្រើនពីក្រុមហ៊ុន Stark Solutions។ គួរដឹងថាបុរសដែលបានកុម្ម៉ង់ឲ្យក្រុមហ៊ុនជំនាញកែច្នៃរថយន្ត Ford F-150 Raptor ទៅជា Cybertruck គឺជាម្ចាស់ក្រុមហ៊ុន Stark Solutions ផ្ទាល់ ដែលរូបលោកជាអ្នកគាំទ្រ Ford ផង និងជាអ្នកគាំទ្រ Tesla ផង។

Mario Coric ដែលជាអ្នកចាត់ការនៅក្រុមហ៊ុន Stark Solutions នៃប្រទេស Bosnia បានឲ្យដឹងថា ពេលបើកលើដងផ្លូវមានមនុស្សជាច្រើនសម្លឹងមើលរថយន្ត Cybertruck ដែលកែច្នៃនេះ ហើយមានមួយចំនួនគិតថាវាជារថក្រោះ ដោយសារពួកគេមិនស្គាល់ពី Cybertruck៕

ផ្ទាំងផ្សាយពាណិជ្ជកម្ម

មកមើលតម្លៃឡាន Bugatti Veyron By Mansory មួយទឹក កំពុងដាក់លក់

September 8, 2020

រថយន្ត Bugatti Veyron ស៊េរីឆ្នាំ២០០៨ មួយគ្រឿង ដែលបានកែដោយក្រុមហ៊ុន Mansory កំពុងត្រូវគេដាក់លក់ នៅក្នុងទីក្រុង Los Angeles សហរដ្ឋអាមេរិក។

រថយន្ត Bugatti Veyron ដែលមានពណ៌ក្រហមនេះ ត្រូវបានគេលេងផ្នែកខាងមុខ ជាពិសេសប៉ាណាមុខ និងគម្របម៉ាស៊ីន Carbon Fiber តែម្តង។ មិនតែប៉ុណ្ណោះ ផ្នែកចំហៀង ដំបូល និងផ្នែកខាងក្រោយ ក៏ត្រូវបានលេងកាង Carbon Fiber យ៉ាងទាក់ទាញផងដែរ ដែលធ្វើឲ្យរថយន្តនេះ កាន់តែលេចធ្លោពីគេ។

អ្វីដែលរឹតតែពិសេសនោះគឺ គេក៏បានលេងកាប៊ីនខាងក្នុងរបស់វាដែរ ដោយរំលេចដោយ Carbon Fiber លើដៃចង្កូត, តាប្លូកណ្តាល, ចង្កឹះលេខ, ចង្កឹះលេខដៃលើចង្កូត និងដៃទ្វារ ផងដែរ។

គួរឲ្យដឹងថា រថយន្ត Bugatti Veyron នេះមានលេខតួ ១១៥ ហើយជារថយន្ត Veyron ទី៣៨ ដែលបានលក់នៅសហរដ្ឋអាមេរិក។ កំពូលរថយន្តស្ព័រនេះទើបតែត្រូវប្រើបានចម្ងាយក្រោម ១៤ ០០០ម៉ាយ៍ ឬក្រោម ២២ ៥៣០គីឡូម៉ែត្រប៉ុណ្ណោះ។ វាត្រូវបានដាក់លក់ក្នុងតម្លៃ ១,២៥លានដុល្លារ៕

ផ្ទាំងផ្សាយពាណិជ្ជកម្ម

ឡានមួយទឹក Tesla ប្រើពេលជាមធ្យមមួយខែ ទើបអាចលក់ចេញ

September 7, 2020

ការវិភាគលើរថយន្តថ្មី និងរថយន្តមួយទឹកជាង ៤,៤លានគ្រឿង ដែលលក់ចេញនៅសហរដ្ឋអាមេរិកចាប់ពីខែមីនា ដល់ខែមិថុនា ឆ្នាំ ២០២០ ដែលធ្វើឡើងដោយ iSeeCars បានរកឃើញថាគិតជាមធ្យមរថយន្តមួយទឹកប្រើប្រាស់ពេល ៦៨,៩ថ្ងៃ ដើម្បីអាចលក់ចេញ។ ប៉ុន្តែមានរថយន្តមួយចំនួនអាចលក់ចេញបានលឿនជាងនេះ។

រថយន្តមួយទឹកដែលលក់ចេញបានលឿនជាងគេគឺ Tesla Model 3 ដែលប្រើពេលជាមធ្យម ២៩,៣ថ្ងៃ។ ចំណែករថយន្តបន្ទាប់គឺ BMW X6 ដែលចំណាយពេលជាមធ្យម ៤៣ថ្ងៃ និងមានរថយន្ត Subaru BRZ ដែលប្រើពេលជាមធ្យម ៤៤,៥ថ្ងៃ។

មានរថយន្ត Tesla ពីរទៀតដែលស្ថិតក្នុងតំណែងកំពូលរថយន្តមួយទឹកលក់ដាច់លឿនជាងគេទាំង១០ គឺមាន Model X ស្ថិតនៅលេខ៦ ដែលចំណាយពេលជាមធ្យម ៤៧,៦ថ្ងៃ និង Model S ស្ថិតនៅលេខ១០ ប្រើពេលជាមធ្យម ៥០,៧ ថ្ងៃ៕

ផ្ទាំងផ្សាយពាណិជ្ជកម្ម

VW គិតថាអាចតាមទាន់ការផលិតឡានអគ្គិសនីរបស់ Tesla នៅត្រឹមឆ្នាំ ២០២៣

September 7, 2020

លោក Bernd Osterloh ប្រធានផ្នែកការងារប្រចាំ Volkswagen Group ជឿជាក់ថាក្រុមហ៊ុនរបស់ខ្លួននឹងអាចតាមទាន់ទំហំផលិតរបស់ក្រុមហ៊ុន Tesla នៅត្រឹមឆ្នាំ ២០២៣ ឬឆាប់ជាងនេះ ដែល Tesla អាចផលិតរថយន្តអគ្គិសនីបានចន្លោះពី ៩០ម៉ឺន ទៅ ១,៥លានគ្រឿងក្នុងមួយឆ្នាំ។

លោក Bernd បាននិយាយដូចនេះថា ៖ “ប្រសិនបើ Tesla មានរោងចក្រផលិតចំនួនបី ដែលអាចផលិតរថយន្តបានពី ៣០ម៉ឺន ទៅ ៥០ម៉ឺនគ្រឿង មានន័យថា Tesla អាចផលិតរថយន្តបានចន្លោះពី ៩០ម៉ឺន ទៅ ១,៥លានគ្រឿង។ យើងចង់ធ្វើឲ្យបានដូចជា Tesla នៅក្នុងឆ្នាំ ២០២៣ ឬអាចលឿនជាងនេះ។”

បន្ថែមពីលើការផលិតហើយនោះលោក Bernd បានបង្ហាញក្ដីរំពឹងថាក្រុមវិស្វករសម្រាប់គម្រោងការ Artemis ក៏អាចនឹងជួយឲ្យ Volkswagen Group តាមទាន់ Tesla លើផ្នែកបច្ចេកវិទ្យាផងដែរ។ នេះបើតាមការចុះផ្សាយរបស់សារព័ត៌មាន Autonews Europe៕

ផ្ទាំងផ្សាយពាណិជ្ជកម្ម

Volkswagen Arteon ឆ្នាំ២០២១ ចេញតម្លៃលក់ខ្ទង់ ៤ម៉ឺនដុល្លារ

September 7, 2020

ក្រុមហ៊ុន Volkswagen បានប្រកាសចេញលក់រថយន្ត Arteon ស៊េរីឆ្នាំ២០២១ ជាផ្លូវការ សម្រាប់ទីផ្សារប្រទេសអង់គ្លេស ដោយវាទទួលបានការអាប់ដេតលើការឌីហ្សាញមួយចំនួន, ជម្រើសម៉ាស៊ីនថ្មី និង បន្ថែមម៉ូដែលគូទហើម Shooting Brake ទៀតផង។

រថយន្ត Volkswagen Arteon ឆ្នាំ២០២១ ចែកចេញជា ៣ម៉ូដែល គឺ SE Nav (Base Model), Elegance និង R-Line ដែលមានតម្លៃចាប់ពី ៤៧ ០០០ដុល្លារ និង ៥០ ០០០ដុល្លារ។

ក្នុងនោះវាមានបំពាក់លក្ខណៈពិសេសមកស្តង់ដារ ដូចជា យ៉ាន់ Alloy ទំហំ ១៧អ៊ីញ, ចង្កៀងមុខ-ក្រោយ LED, សេនស័រចូលចតមុខ-ក្រោយ, ប្រព័ន្ធម៉ាស៊ីនត្រជាក់ 3-zone, អេក្រង់កម្សាន្ត ៨អ៊ីញ និងកៅអីអ្នកបើកបរសារ៉េបាន ៦បែប ជាដើម។

Arteon SE Nav បំពាក់ម៉ាស៊ីនម៉ាស៊ូតចំណុះ ២,០លីត្រ TDI ទំហំ ៤ស៊ីឡាំង មានកម្លាំង ១៤៨សេះ ខណៈ Arteon Elegance និង Arteon R-Line ប្រើម៉ាស៊ីនសាំងចំណុះ ២,០លីត្រ TSI កម្លាំង ១៨៧សេះ។ ពួកវាសុទ្ធតែប្រើប្រអប់លេខអូតូ ៧វគ្គ ប្រភេទ DSG dual-clutch៕

ផ្ទាំងផ្សាយពាណិជ្ជកម្ម

ដាក់ផ្ទឹមឡាន Mercedes-Benz S-Class ឆ្នាំ២០២១ និង២០២០ មើលចំណុចខុសគ្នា

September 7, 2020

ក្រុមហ៊ុន Mercedes-Benz បានបង្ហាញចេញជាផ្លូវការ នូវកំពូលរថយន្ត Sedan ដ៏ប្រណីតជំនាន់ថ្មី S-Class ស៊េរីឆ្នាំ ២០២១ ដែលវានឹងមានដាក់លក់លើទីផ្សារជាមួយជម្រើសច្រើនប្រភេទផ្សេងគ្នា។ សម្រាប់នៅអឺរ៉ុប វាមានប្រភេទម៉ាស៊ីនម៉ាស៊ូត S450, S500, S350d, S350d 4Matic និង S400d 4Matic ហើយនិងម៉ាស៊ីនសាំង S450 និង S500។ ចំណែកនៅអាមេរិកវិញ វាមាន S500 4MATIC និង S580 4MATIC។

S-Class ឆ្នាំ២០២១ ទទួលបានការឌីហ្សាញថ្មីទាំងស្រុង ទាំងផ្នែកខាងមុខ ខាងក្រោយ ចំហៀង និងកាប៊ីនខាងក្នុងផងដែរ។ វាមានប្រវែង ៥ ១៧៩មីល្លីម៉ែត្រ ទទឹង ១ ៩២១មីល្លីម៉ែត្រ កម្ពស់ ១ ៥០៣មីល្លីម៉ែត្រ និង ប្រវែងពីកង់មុខទៅកង់ក្រោយ ៣ ១០៦មីល្លីម៉ែត្រ។ បើប្រៀបធៀបនឹងស៊េរីឆ្នាំ២០២០ គឺ ប្រវែង ៥ ១១៦មីល្លីម៉ែត្រ ទទឹង ១ ៨៩៩មីល្លីម៉ែត្រ កម្ពស់ ១ ៤៩៦មីល្លីម៉ែត្រ និង ប្រវែងពីកង់មុខទៅកង់ក្រោយ ៣ ០៣៥មីល្លីម៉ែត្រ ។

ក្រឡេកមកមើលផ្នែកខាងក្នុងវិញ Mercedes-Benz S-Class ថ្មី បានបំពាក់កុងទ័រឌីជីថលទំហំ ១២,៣អ៊ីញ និង អេក្រង់កម្សាន្តប្រភេទ OLED Touchscreen ទំហំ ១២,៨អ៊ីញ ដែលដំណើរការដោយប្រព័ន្ធ MBUX ជំនាន់ចុងក្រោយ ព្រមទាំងអេក្រង់នៅកៅអីក្រោយ២ ទំហំ ១១,៦អ៊ីញ និងថេប្លេតមួយទៀតផង។

រថយន្ត Sedan ប្រណីតនេះត្រូវគេរំពឹងថានឹងចេញលក់នៅក្នុងត្រីមាសទី១ នៃឆ្នាំ២០២១ ខាងមុខ ខណៈតម្លៃនឹងត្រូវប្រកាសនាពេលក្រោយ៕

ផ្ទាំងផ្សាយពាណិជ្ជកម្ម

រថយន្ត Audi Q2 សេរ៊ីឆ្នាំ២០២១ បង្ហាញរូបរាងថ្មីកាន់តែទាក់ទាញ

September 7, 2020

រថយន្ត Audi Q2 សេរ៊ីឆ្នាំ២០២១ ដែលទើបបង្ហាញវត្តមាននៅក្នុងប្រទេសអាល្លឺម៉ង់ជាមួយ រូបរាងថ្មី នឹងប្រភេទម៉ាស៊ីនថ្មី នាពេលថ្មីៗកន្លងទៅនេះបានបំពាក់ជាមួយម៉ាស៊ីន ១,៥ លីត្រ TFSI កម្លាំង ១៤៨សេះ និងកម្លាំងរមួល ២៥០Nm មានជម្រើសប្រអប់លេខចំនួន២ គឺលេខដៃ ៦វគ្គ និង៧វគ្គស្វ័យប្រវត្តិ ព្រមទាំងមានតម្លៃចាប់ពី ២៩ ៩៦២ដុល្លាសម្រាប់ទីផ្សារប្រទេសអាល្លឺម៉ង់។

រថយន្ត Audi Q2 មានជម្រើសថ្មី ៥ពណ៍ដូចជា Apple Green, Manhattan Gray, Navarra Blue, Arrow Gray និងTurbo Blue ក្រៅពីនេះវាក៏បានបំពាក់ជាមួយលក្ខណៈបច្ចេកទេសស្តង់ដា ចង្កៀងមុខភ្លើងប្រភេទ LED និងជម្រើសចង្កៀងមុខភ្លើងប្រភេទ Matrix LED ជាមួយមុខងារហ្វាកូដស្វ័យប្រវត្តិ។

រីឯផ្នែកខាងក្នុងគឺពុំមានការផ្លាស់ប្តូរខ្លាំងឡើយ ដោយមានការឌីហ្សាញបន្ថែមអោយកាន់តែទំនើបទៅលើ រន្ធខ្យល់ម៉ាស៊ីនត្រជាក់។ ចង្កឹះលេខក៏ផ្លាស់ប្តូរការបំពាក់ពីលក្ខណះទន់ ប្រភេទ Alcantara ជំនួសដោយមីក្រូហៃប័រ Dinamica ព្រមទាំង អេក្រង់កំសាន្តទំហំ ៨,៣អ៊ីញ ដាក់លើតាប្លូយ៉ាងស្រស់ស្អាត និងទាក់ទាញ។

Audi Q2 ឆ្នាំ២០២១នេះក៏មានមុខងារស្តង់ដារជាច្រើនដូចជា ប្រអប់លេខអូតូ, Adaptive Cruise Assist System, MMI Navigation plus និងVirtual Cockpit (កុងទ័រ) ផងដែរ។

ផ្ទាំងផ្សាយពាណិជ្ជកម្ម

រថយន្តSUV Jeep ដែលទទួលជោគជ័យខ្លាំងត្រៀមខ្លួនបង្ហាញម៉ូឌែល ២០២២

September 6, 2020

រថយន្ត SUV របស់ Jeep គឺម៉ូឌែល Jeep Grand Cherokee ដែលត្រូវបានចាត់ទុកថាជារថយន្តទទួលបានជោគជ័យខ្លាំងលើទីផ្សារអាមេរិច ដោយចំនួនលក់ប្រមាណជាង ១,៧លាន គ្រឿង ចាប់តាំងពីការបង្ហាញខ្លួនដំបូងនៅជំនាន់ទី១ ក្នុងឆ្នាំ ២០១១ ឥឡូវនេះកំពុងត្រូវបានគេគិតថានឹងបង្ហាញខ្លួននៅដើមឆ្នាំក្រោយជាម៉ូឌែលឆ្នាំ២០២២។

ចំពោះលក្ខណះលម្អិតនៃរថយន្តនឹងត្រូវបង្ហាញនៅជិតដល់ថ្ងៃនៃការលក់ក្នុងឆ្នាំ២០២១ ដោយយើងមិនទាន់មានព័ត៌មានច្បាស់លាស់ណាមួយដើម្បីធ្វើការបង្ហាញនូវឡើយ។ ប៉ុន្តែយើងមានរូបប៉ុន្មានសន្លឹកដើម្បីបង្ហាញនៅផ្នែកខាងក្រៅ ហើយសម្រាប់ខាងក្នុងវិញមើលទៅហាក់ដូចជាមានភាពធំទូរលាយជាងមុន។

មួយវិញទៀតគេរំពឹងថា រូបរាងប៉ាណាដែលមាន ៧ប្រលោះនឹងនៅតែរក្សាជាអត្តសញ្ញាណរបស់វាដ៏ដែល ជាមួយជម្រើសកៅអី ២ជូរ និង៣ជួរ តាមរយះរូបភាពរចនាកុំព្យូទ័រដែលបានបង្ហាញ។ សម្រាប់តម្លៃក៏យើងមិនទាន់មានព័ត៌មានច្បាស់ការណាបង្ហាញដែល ប៉ុន្តែសម្រាប់ម៉ូឌែលបច្ចុប្បន្នរថយន្តមាននេះមានតម្លៃចាប់ពី ៣៤ ៤០០ដុល្លារ។

រថយន្ត Jeep Grand Cherokee ជម្រើស ៣ជួរដែលគេលួចថតបាន ប្រភពរូប៖ Motor1

ផ្ទាំងផ្សាយពាណិជ្ជកម្ម

កូវីដ១៩ប៉ុណ្ណេះហើយ Volvo នៅអាចលក់ឡានបានច្រើនជាងមុនទៀត

September 5, 2020

ទោះបីជាពិភពលោកកំពុងជួបប្រទះនឹងវិបត្តិកូវីដ១៩ក៏ដោយក្ដី ក៏ក្រុមហ៊ុន Volvo នៅអាចលក់រថយន្តដាច់នៅទូទាំងពិភពលោកបានច្រើនជាងមុនសម្រាប់ខែសីហា ដែលមានកំណើន ៧,២% បើធៀបនឹងខែសីហាឆ្នាំមុន។

ចំនួនលក់នៅអឺរ៉ុបរបស់ Volvo ប្រចាំខែសីហាគឺមាន ១៧ ៤៥៨គ្រឿង មានកំណើន ៤,៩% ធៀបនឹងខែសីហាឆ្នាំមុន។ បើនៅប្រទេសចិនវិញមានកំណើនចំនួនលក់ ១១,៤% ដែលអាចលក់ចេញបាន ១៥ ៨៣៥គ្រឿង។

នៅទីផ្សារសហរដ្ឋអាមេរិកឯណោះមានកំណើនចំនួនលក់ ១២,៩% អាចលក់ចេញបាន ១០ ៣៧៨គ្រឿង។ រថយន្តដែល Volvo អាចលក់ចេញបានច្រើនជាងគេគឺ SUV ខ្នាតកណ្ដាល XC60 តាមពីក្រោយដោយរថយន្ត SUV ខ្នាតតូច XC40 និងរថយន្ត SUV ធំជាងគេ ថ្លៃជាងគេ XC90 ស្ថិតនៅលំដាប់លេខបី។