យោងតាមសារព័ត៌មាន Paultan មានការភ្ញាក់ផ្អើលមួយបានកើតឡើង ខណៈដែលកំពុងតែស្វែងរកព័ត៌មានផ្សេងនៅលើគេហទំព័ររផ្លូវការរបស់ថៃ ស្រាប់តែលេចឃើញនៅព័ត៌មាននិយាយពីម៉ូដែលថ្មី Hilux GR Sport កាលពីម្សិលមិញនេះក្នុងរយៈពេលមួយថ្ងៃពេញ (ថ្ងៃទី២៤ ម្សិលមិញ) តែក្រោយមកក៏បានលប់ចេញវិញ។

វាច្បាស់ណាស់ថានេះមិនមែនជាចេតនានោះឡើយ ដោយសារតែអត្ថបទនៃសេចក្តី​ប្រកាស​ព័ត៌មានផ្លូវការនោះគឺធ្វើឡើងសម្រាប់ថ្ងៃទី២៥ ខែសីហា ឆ្នាំ២០២១។ តែទោះយ៉ាងណា ក៏យើងនៅតែអាចចាប់យកបាននៅរូបភាពមួយចំនួនខាងក្រោមស្តីពីម៉ូដែលថ្មីនេះ។

សម្រាប់ម៉ូដែលថ្មី Hilux GR Sport នេះត្រូវបានផលិតនៅទីផ្សារក្នុងស្រុកផ្ទាល់ប្រទេសថៃ ដោយបែងចែកជា២ ប្រភេទ គឺខ្ពស់ និងទាប។ អ្វីដែលគួរអោយចាប់អារម្មណ៌នោះគឺសម្រាប់ប្រភេទខ្ពស់ ត្រូវបានយកគំរូតាមលំនាំរថយន្ត LC300 GR Sport ដោយបានដាក់និមិត្តសញ្ញាក្បាលគោ ជំនួសដោយអក្សរ TOYOTA នៅចំកណ្តាលតែម្តង។ នៅផ្នែកចំហៀងវិញក៏បានលេងតែមឆ្នូត ដែលដំណាងអោយឡូហ្គូ GR Sport ពណ៌ខ្មៅ លាយក្រហម ហើយក៏មានបិតតែម GR Sport រួមជាយ៉ាន់កង់ស្ព័រថ្មី រំលេចដោយហ្វ្រាំងគៀប រំលេចដោយពណ៌ក្រហម និងអក្សរ GR Sport។ នៅផ្នែកខាងក្រោយក៏ដូចគ្នា គឺមានលេងតែមដូចនៅផ្នែកចំហៀងផងដែរគឺមានលេងតែម និងអក្សរ GR Sport។ អ្វីដែលពិសេសមួយទៀតនោះ គឺអង់តែនវិទ្យុលក្ខណៈព្រុយត្រីឆ្លាម Shark Fin។

យោងតាមគេហទំព័របស់ប្រទេសថៃចេញផ្សាយបាននិយាយថា GR Sport នេះនឹងមានលក្ខណៈពិសេសសំខាន់ៗដូចជា កាំម៉េរា ៣៦០ដឺក្រេ ប្រព័ន្ធផ្តល់សញ្ញានៅកញ្ចក់ចំហៀងសងខាង Blind Spot Monitor និង ប្រព័ន្ធផ្តល់សញ្ញាពេលចេញពីចំណតនៅផ្នែកខាងក្រោយ Rear Cross Traffic Alert។ ហើយលក្ខណៈពិសេសទាំងនេះ ត្រូវបានគេរំពឹងថានឹងបំពាក់នៅលើរថយន្ត Fortuner GR Sport ដែលគ្រោងនឹងចេញនៅថ្ងៃទី២៦ ខែសីហា ស្អែកនេះ។

ចូលទៅផ្នែកខាងក្នុងវិញ គឺបានផ្លាស់ប្តូរការរចនាកុងទ័រថ្មី ដៃចង្កូតថ្មី ប៉ូតុងចុចបញ្ឆេះម៉ាស៊ីន និងកៅអីស្បែកបែបស្ព័រ រំលេចដោយអក្សរ GR Sport។ ប៉ុន្តែអ្វីដែលចាប់អារម្មណ៌ខ្លាំងនៅលើដៃចង្កូតនោះគឺប្រព័ន្ធផ្លាស់ប្តូរលេខដៃលើចង្កូត Paddle Shift។ ទាក់ទងនឹងកម្លាំងម៉ាស៊ីន និងជើងក្រោមវិញ គឺមិនទាន់មានការបញ្ជាក់នៅឡើយទេ ហើយយើងនឹងធ្វើការចុះផ្សាយបន្ថែមទៀត នៅពេលមានព័ត៌មានច្បាស់ការ។

ផ្ទាំងផ្សាយពាណិជ្ជកម្ម

រថយន្តភីកអាប់អគ្គិសនី F-150 Lightning របស់ Ford ទទួលបានការកក់ទិញរហូតដល់ ១២ម៉ឺនគ្រឿង ដែលច្រើនលើសពីការរំពឹងទុក ហើយមានការរាយការណ៍ថាក្រុមហ៊ុនបានសម្រេចចិត្តបង្កើនការផលិតទ្វេរដង ដើម្បីបំពេញតាមតម្រូវការដ៏ច្រើនលើសលប់នេះ។

សារព័ត៌មាន Automotive News ដែលដកស្រង់សម្ដីពីប្រភពជិតស្និទ្ធ បានអះអាងថាក្រុមហ៊ុន Ford នឹងចំណាយលុយបន្ថែម ៨៥០លានដុល្លារ ដើម្បីបង្កើនទំហំផលិត។ ផែនការដើមគឺចង់បង្កើនការផលិតរថយន្តជាបន្តបន្ទាប់ឲ្យបានលើសពី ៤ម៉ឺនគ្រឿងនៅក្នុងឆ្នាំ២០២៤ ប៉ុន្តែពេលនេះក្រុមហ៊ុនបានដាក់គោលដៅយក ៨ម៉ឺនគ្រឿងវិញ។

យ៉ាងណាក្ដី ការផលិតរថយន្ត F-150 Lightning នឹងចាប់ផ្ដើមនាឆ្នាំក្រោយនេះ ពេលដែល Ford ដាក់ផែនការផលិតរថយន្តនេះឲ្យបានចំនួន ១៥ ០០០គ្រឿងសិនសម្រាប់ឆ្នាំដំបូង។ ប្រភពជិតស្និទ្ធបាននិយាយដែរថា ផែនការរបស់ Ford គឺចង់បង្កើនការផលិតដល់ ៥៥ ០០០គ្រឿងនៅឆ្នាំ២០២៣ មុនបង្កើនដល់៨ម៉ឺនគ្រឿងនៅឆ្នាំ២០២៤។

គួរចាប់អារម្មណ៍ផងដែរថា ការចុះផ្សាយរបស់ Automotive News បាននិយាយថារថយន្ត F-150 Lightning ជំនាន់ទីពីរគឺបានត្រៀមថានឹងប្រកាសចេញនៅចុងឆ្នាំ២០២៥រួចហើយ ដែលរថយន្តនេះនឹងមានគោលដៅលក់ប្រចាំឆ្នាំជិត ១៦ម៉ឺនគ្រឿងផងដែរ៕

ផ្ទាំងផ្សាយពាណិជ្ជកម្ម

ក្រុមហ៊ុនរថយន្តឥណ្ឌា Tata បានបង្ហាញចេញរូបភាពដំបូងនៃរថយន្ត SUV ខ្នាតតូចជាងគេបំផុតរបស់ខ្លួន ដែលមានឈ្មោះថា Punch ដែលរថយន្តនេះធ្លាប់បានបង្ហាញខ្លួនក្នុងនាមជារថយន្ត Concept ឈ្មោះ Tata HBX។

ការឌីហ្សាញរបស់រថយន្ត Punch មានលក្ខណៈទាន់សម័យគួរសម ដោយប្រើប្រាស់អំពូលភ្លើងឌីហ្សាញបែបភ្លោះ ស្រដៀងនឹងម៉ូដែល Harrier និងម៉ូដែល Safari ដែរ។ ចំណែកដំបូលមានការលាយបញ្ចូលគ្នារវាងពណ៌ស និងពណ៌ខ្មៅ ដែលជានិន្នាការនៃការឌីហ្សាញនាពេលបច្ចុប្បន្នសម្រាប់រថយន្ត SUV។

ក្រុមហ៊ុននិយាយថារថយន្ត Punch នេះគឺឌីហ្សាញឡើងសម្រាប់អ្នកប្រើប្រាស់ជំនាញថ្មី ដូចនេះគេរំពឹងថាអាចនឹងមានប្រើប្រាស់អេក្រង់ Touch លាយឡំនឹងកុងទ័រកូនកាត់ឌីជីថលដូចជារថយន្ត Concept ដែរ។

គូប្រជែងរបស់ Tata Punch នេះរួមមាន Renault Kwid, Maruti Suzuki Ignis និង Hyundai Casper ហើយតម្លៃរបស់វារំពឹងថាមានចាប់ពីប្រមាណខ្ទង់ ៦ពាន់ដុល្លារ នៅលើទីផ្សារប្រទេសឥណ្ឌា៕

ផ្ទាំងផ្សាយពាណិជ្ជកម្ម