Land Rover ផលិតឡាន Defender អត់ទាន់តម្រូវការ!

May 24, 2021

ក្រុមហ៊ុន Land Rover កំពុងតែពិបាកចិត្តរឿងផលិតឡាន Defender ស៊េរីថ្មីមិនទាន់តាមតម្រូវការអតិថិជន ស្របពេលដែលកំពុងជួបបញ្ហាខ្វះបន្ទះឈីបអេឡិចត្រូនិច។

នៅពេលនិយាយក្នុងអំឡុងពេលនៃការចេញផ្សាយប្រាក់ចំណូលប្រចាំត្រីមាសរបស់ក្រុមហ៊ុនផលិតរថយន្តអង់គ្លេសខាងលើ ប្រធានផ្នែកហិរញ្ញវត្ថុរបស់ក្រុមហ៊ុន Jaguar Land Rover លោក Adrian Mardell បានឲ្យដឹងថា បញ្ជីរង់ចាំសម្រាប់ម៉ូដែលកូនកាត់ Plug-in Hybrid របស់ Jaguar Land Rover ជិតឈានដល់ ១២ ខែហើយ។

លោក Mardell បានលើកឡើងទៀតថា កង្វះខាតបន្ទះឈីប និងការលំបាកក្នុងការផលិតរថយន្ត Plug-in Hybrid របស់ម៉ាកនេះ ព្រមទាំងបញ្ហារបស់អ្នកផ្គត់ផ្គង់បន្ទះឈីបផង គឺជាកត្តារួមចំណែកដ៏ធំ។

ជាមួយគ្នានេះដែរ នាយកប្រតិបត្តិក្រុមហ៊ុន Jaguar Land Rover លោក Thierry Bollare បានបន្ថែមថា ក្រុមហ៊ុនលោកខកខានផលិតរថយន្តចំនួន ៧ ០០០ គ្រឿងក្នុងត្រីមាសទី១ ដោយសារបញ្ហាខ្វះបន្ទះឈីបអេឡិចត្រូនិកនេះ។

ក្នុងនោះផងដែរ លោក Mardell ក៏បានបង្ហើបឲ្យដឹងថា ការបញ្ជាទិញលើម៉ូដែល Defender ថ្មី មានរហូតដល់លើស ២០ ០០០ គ្រឿង ខណៈការលក់រាយនៃម៉ូដែលនេះ មានចំនួនជិត ៧ ០០០ គ្រឿងក្នុងមួយខែ៕

ផ្ទាំងផ្សាយពាណិជ្ជកម្ម

លក្ខណៈពិសេស ៩មុខ ដែលមាននៅលើ Ford F-150 Lightning

May 24, 2021

ចេញមកលើកនេះ ពិតជាធ្វើអោយម្នាក់ៗចាប់អារម្មណ៌ និងភ្ញាក់ផ្អើលខ្លាំងទៅលើរថយន្តអគ្គិសនីភីកអ៊ាប់ដំបូងរបស់ Ford គឺ F-150 Lightning ទាំងរូបរាង និងបច្ចេកវិទ្យា។ ហើយវាពិតជាអ្វី ដែលគ្រប់គ្នាសម្លឹងឃើញសម្រាប់អនាគតនៃឡានអគ្គិសនី។ ឥឡូវនេះយើងមកមើលពីចំណុចនៃលក្ខណៈពិសេស ៩មុខ ដែលបានបំពាក់យ៉ាងពិសេសសម្រាប់រថយន្តនេះ។

១. ថាមពលកម្លាំង

នៅពេលខាងមុខ រថយន្ត Ford F-150 Lightning នឹងមាន ៤ប្រភេទ ដោយបច្ចុប្បន្នមានឈ្មោះតែ ៣ប្រភេទសិនប៉ុណ្ណោះគឺ XLT, Lariat និង Platinum ដែលជាប្រភេទប៉ុង២ ជម្រើសអាគុយអគ្គិសនី ២ប្រភេទ។

ម៉ូឌែលប្រភេទ Standard range ដំណើរការដោយម៉ូទ័រអគ្គិសនីចំនួនពីរ អាចផលិតកម្លាំងសរុបបាន ៤២៦សេះ និងកម្លាំងរមួល ប្រហែលជាង 1050 ញ៉ូតុនម៉ែត្រ។ នឹងអាចបើកបរបានចម្ងាយ ៣៨៦គីឡូម៉ែត្រនៅពេលសាកថ្មពេញម្តង។
ម៉ូឌែលប្រភេទ Extended range ដំណើរការដោយម៉ូទ័រអគ្គិសនីចំនួនពីរ ដែលអាចផលិតកម្លាំងសរុបបាន ៥៦៣សេះ និងកម្លាំងរមួល ប្រហែលជាង 1050 ញ៉ូតុនម៉ែត្រ នឹងអាចបើកបរបានចម្ងាយជិត ៥០០គីឡូម៉ែត្រ នៅពេលសាកថ្មពេញម្តង។

២. សមត្ថភាពបើកបរ

រថយន្តនេះអាចមានសន្ទុះល្បឿនពី ០-៩៦គ.ម/ម៉ ត្រឹមតែរយៈពេល ៤វិនាទីប៉ុណ្ណោះ។ អ្វីដែលពិសេសនោះគឺអាចអូសណ្តោងរហូតដល់ជាង ៤,៥តោនឯណោះ ភ្ជាប់ដោយមុខងារបញ្ជារ និងគ្រប់គ្រងផងដែរ។

៣. បច្ចេកវិទ្យាបើកបរស្វ័យប្រវត្តិ BlueCruise

Ford ជឿជាក់ថាបច្ចេកវិទ្យាបើកបរលើផ្លូវហាយវ៉េ ដោយមិនប្រើដៃបានត្រៀមរួចជាស្រេចសម្រាប់ពេលវេលាដ៏សំខាន់។ ជាមួយគ្នាដែររថយន្ត Mustang Mach-E Blue Blue វាក៏នឹងមាននៅលើ F-150 Lightning នៅពេលបំពាក់ជាមួយបច្ចេកវិទ្យា Ford Co-Pilot360 Active 2.0 Prep។ ប្រព័ន្ធនេះប្រើបច្ចេកវិទ្យាកាមេរ៉ា និងរ៉ាដាកម្រិតខ្ពស់ ដើម្បីបង្កើតប្រព័ន្ធឆ្លាតវៃ បើកបរដោយវាងវៃតត្រឹមត្រូវតាមគន្លងផ្លូវ និងត្រួតពិនិត្យទៅលើស្លាកសញ្ញាកំណត់ល្បឿន បានដោយស្វ័យប្រវត្តិ។

៤. មុខងារត្រួតពិនិត្យការដឹក

វាពិតជាមានសារៈសំខាន់ណាស់ ព្រោះវាជារថយន្តប្រភេទដឹកខ្នាតធំ ហេតុនេះហើយ Ford ក៏មិនភ្លេចបច្ចេកវិទ្យាថ្លឹងទម្ងន់ ដោយបំពាក់ដោយសេនស័រ យ៉ាងឆ្លាតវៃ អាចអោយយើងបានដឹងពីទម្ងន់ដែលបានដាក់ ដើម្បីការពារការដឹកធ្ងន់លើសទម្ងន់។

៥. មុខងារគ្រប់គ្រងការអូសសណ្តោង Pro Trailer Hitch Assist

Ford’s Pro Trailer Hitch Assist ជាមុខងារគ្រប់គ្រងការអូសសណ្តោងយ៉ាងទំនើប ដែលអាចធ្វើការសិក្សារ និងអភិវឌ្ឍន៌ប្រព័ន្ធបានតាមរយៈប្រព័ន្ធអុីនធឺណែត។

៦. បច្ចេកវិទ្យាផ្គត់ផ្គង់ភ្លើង Ford Intelligent Backup Power

វាពិតជាមានសារៈប្រយោជន៌ខ្លាំងណាស់ ដោយរថយន្តនេះអាចក្លាយជាម៉ាស៊ីនភ្លើងមួយ សម្រាប់ការប្រើប្រាស់ចាំបាច់ផ្សេង ជាក់ស្តែងដូចជាពេលថ្មីៗនេះ ដោយរដ្ឋតិចសាសដាច់ភ្លើងគ្មានអីប្រើ។ ដោយរថយន្តនេះអាចផ្គត់ផ្គង់ភ្លើងថាមពល ៩,៦គីឡូវ៉ាត់ សម្រាប់ប្រើប្រាស់ក្នុងពេលចាំបាច់ណាមួយ ឬទៅដំណើរកំសាន្តដោយគ្មានក្តីបារម្ភ។

៧. Mega Power Frunk

យើងគួរនិយាយថា “Mega Power Frunk” ជារបស់ក្រុមហ៊ុន Ford ព្រោះវាពិតជាពិសេស ដោយត្រង់កន្លែងដាក់ម៉ាស៊ីណរបស់រថយន្តប្រើប្រាស់ឥន្ទនៈពេលនេះជាកន្លែងអាចយកមកប្រើប្រាស់បានសម្រាប់ការផ្ទុកអីវ៉ានផ្សេង ឬមានភ្លើងសម្រាប់ផ្គត់ផ្គង់បានផងដែរ។ វាមានទំងន់ ១៤,១ ហ្វីតគូប និងបន្ទុក ៤០០ ផោនដូច្នេះអ្នកអាចដាក់អីវ៉ាន់នៅចុងសប្តាហ៍ ជាឧបករណ៍បោះជំរុំ រឺក៏សំភារៈវាយកូនហ្គោល ២ ឈុត។

៨. បច្ចេកវិទ្យា Sync 4A

ប្រើប្រាស់បច្ចេកវិទ្យា SYNC4 ដែលមានអេក្រង់ទំហំធំចាប់ពី ១២ ដល់ ១៥,៥ អីញ ភ្ជាប់ដោយមុខងារ Apple CarPlay និង Android Auto មុខងារផែនទី រួមជាមួយកុងទ័រឌីជីថលទំហំ ១២អុីញ។

៩. Ford Intelligent Power

ថាមពលឆ្លាតវៃរបស់ Ford គឺជាមុខងារដែលយើងនឹងឃើញបន្ថែមនៅពេលក្រោយទៀត។ ម្ចាស់រថយន្ត F-150 Lightning នឹងអាចប្រើឡាននេះដើម្បីផ្តល់ថាមពលដល់ផ្ទះក្នុងកំឡុងពេលម៉ោងដែលមានថាមពលប្រើប្រាស់ខ្ពស់ ហើយបន្ទាប់មកប្រើអត្រាទាបក្នុងមួយយប់ដើម្បីបញ្ចូលរថយន្តនៅពេលព្រឹក។ ក្រុមហ៊ុន Ford បាននឹងកំពុងធ្វើការជាមួយក្រុមហ៊ុនថាមពលពន្លឺព្រះអាទិត្យ SunRun ដើម្បីធ្វើឱ្យការតំឡើងប្រព័ន្ធបញ្ចូលភ្លើង ៨០ អំពែ និងប្រព័ន្ធបញ្ចូលថាមពលប្រើប្រាស់ក្នុងផ្ទះមានភាពងាយស្រួល។ ក្រុមហ៊ុន Ford ក៏បាននិយាយទៀតថា“ តាមរយៈកិច្ចសហការនេះ អតិថិជនក៏នឹងមានឱកាសតំឡើងថាមពលពន្លឺព្រះអាទិត្យនៅលើគេហដ្ឋានរបស់ពួកគេ ដែលអាចផ្តល់ផ្គត់ផ្គង់អគ្គិសនីប្រើប្រាស់ដល់គ្រួសាររបស់ពួកគេ ដោយថាមពលស្អាត ក្នុងតំលៃសមរម្យ និងអាចសាកភ្លើង F-150 Lightning របស់ពួកគេដោយថាមពលព្រះអាទិត្យ” ។

ផ្ទាំងផ្សាយពាណិជ្ជកម្ម

អីយ៉ាស់! ឡាន Rolls-Royce របស់ចិននឹងចេញលក់នៅលើទីផ្សារប្រទេសជប៉ុន

May 24, 2021

រថយន្តប្រណិតរបស់ប្រទេសចិន Hongqi H9 គ្រោងនឹងបង្ហាញខ្លួនលើទីផ្សារប្រទេសជប៉ុននាពេលឆាប់ៗនេះ បន្ទាប់ពីបានធ្វើការតេស្តសាកល្បងនៅ Nagoya ប្រទេសជប៉ុននាពេលកន្លងទៅ។

នេះគឺជាម៉ូឌែលដំបូងហើយសម្រាប់ក្រុមហ៊ុន Hongqi ដែលនឹងមានវត្តមានលក់នៅលើទីផ្សារប្រទេសជប៉ុន។ ហើយវានឹងក្លាយជាគូប្រជែងរបស់ Mercedes E-Class, Audi A6 និង BMW 5-Series។

រថយន្តម៉ូដែល H9 ត្រូវបានឌីហ្សាញឡើងដោយអ្នកឌីហ្សាញឈ្មោះ Giles Taylor ដែលជាអតីតបុគ្គលិករបស់ក្រុមហ៊ុនរថយន្តអង់គ្លេស Rolls-Royce។ ដូចនេះហើយ រូបរាងរបស់វាមើលទៅហាក់ស្រដៀងនឹងរថយន្ត Rolls-Royce អ៊ីចឹងដែរ។ វាមានប្រវែងសរុប ៥,២ ម៉ែត្រ និងប្រវែងពីកង់មុខ ដល់ កង់ក្រោយ ៣ម៉ែត្រ។

សម្រាប់រូបរាងផ្នែកខាងក្រៅនៃរថយន្ត បានបំពាក់ជាមួយប៉ាណាក្រូមទំហំធំអមដោយភ្លើង LEDព័ទ្ធជុំវិញ រួមជាមួយ ចង្កៀងមុខប្រភេទ Matrix LED និងថាសកង់ទំហំ ២០អ៊ីញ។ រីឯផ្នែកខាងក្នុងបំពាក់ជាមួយអក្រង់បង្ហាញ និងអេក្រង់កម្សាន្តទំហំធំ និងឧបករណ៍កាត់បន្ថយសម្លេងផងដែរ។

រថយន្ត Hongqi H9 ដំណើការដោយម៉ាស៊ីនសាំងចំណុះ ២,០លីត្រ Turbocharged ទំហំ ៤ស៊ីឡាំង បង្កើតកម្លាំងបាន ២៥២សេះ និងកម្លាំងរមួល ៣៨០ញ៉ូតុនម៉ែត្រ ឬ ម៉ាស៊ីនសាំងចំណុះ ៣,០លីត្រ Supercharged ទំហំ ៦ស៊ីឡាំង បង្កើតកម្លាំងបាន ២៧២សេះ និងកម្លាំងរមួល ៤០០ញ៉ូតុនម៉ែត្រ។ វាអាចស្ទុះពីល្បឿន ០-១០០គីឡូម៉ែត្រក្នុងមួយម៉ោង ប្រើពេល ៨វិនាទី៕

ផ្ទាំងផ្សាយពាណិជ្ជកម្ម

គូប្រជែង Aston Martin Vantage ចេញលក់លើទីផ្សារប្រទេសវៀតណាមផ្លូវការ

May 23, 2021

កាលពីថ្ងៃទី ២១កន្លងទៅ ក្រុមហ៊ុន Ferrari បានធ្វើការប្រកាសចេញលក់នូវរថយន្ត Ferrari Roma លើទីផ្សារប្រទេសវៀតណាមជាផ្លូវការ ជាមួយតម្លៃចាប់ពី ៩០០ ០០០ដុល្លារ។

រថយន្តនេះមានប្រវែងសរុប ៤ ៦៥៦មម, ទទឹងប្រវែង ១ ៩៧៤មម, កម្ពស់ ១ ៣០១មម, ប្រវែងពីកង់មុខ ដល់ កង់ក្រោយ ២ ៦៧០មម និងទម្ងន់ ១ ៥៧០គីឡូក្រាម។

រថយន្ត Ferrari Roma ដំណើការដោយម៉ាស៊ីនចំណុះ ៣,៩លីត្រ twin-Turbo V8 មានកម្លាំង ៦១២សេះ និងកម្លាំងរមួល ៧៥៩ញ៉ូតុនម៉ែត្រ ភ្ជាប់ជាមួយប្រអប់លេខ Dual-clutch ៨វគ្គអូតូ។ វាអាចស្ទុះពីល្បឿន ០-១០០គីឡូម៉ែត្រក្នុងមួយម៉ោង ប្រើពេល ៣,៤វិនាទី និងមានល្បឿនអតិបរមា ៣២០ គីឡូម៉ែត្រក្នុងមួយម៉ោង។

សម្រាប់រូបរាងផ្នែកខាងក្រៅ Roma ត្រូវបានឌីស្សាញឡើងតាមលក្ខណ: Aerodynamic និងបំពាក់ជាមួយប៉ាណា Retro យ៉ាងទាក់ទាញ និង Daytime Running Lights របស់វា ស្ថិតនៅចន្លោះចង្កៀងមុខ ដែលមានរូបរាង Slim រួមជាមួយចង្កៀងប្រើប្រាស់ជាមួយអំពូល Matrix LED។

រីឯផ្នែកខាងក្នុង បំពាក់ជាមួយអេក្រង់បង្ហាញទំហំ ១៦អ៊ីញ, អេក្រង់កម្សាន្តទំហំ ៨,៤អ៊ីញ និងដៃចង្កូត Flat-Bottomed ស្រោបដោយស្បែកប្រណិត និងកាបូន រួមជាមួយប៊ូតុងមុខងារប្រភេទ Touch Sensitive។ បន្ថែមពីនេះ Roma បានភ្ជាប់មកជាមួយប្រព័ន្ធបច្ចេកវិទ្យា Manettino ជាមួយជម្រើសបើកបរចំនួន ៥ជម្រើស និងប្រព័ន្ធ Ferrari Dynamic Enhancer dynamic៕

ផ្ទាំងផ្សាយពាណិជ្ជកម្ម

ចាប់ពីឆ្នាំ ២០២២ Mazda ឈប់លក់ Mazda6 និង CX-3 លើទីផ្សារសហរដ្ឋអាមេរិក

May 23, 2021

យោងតាមសេចក្តីប្រកាសដែលត្រូវបានធ្វើឡើងដោយក្រុមហ៊ុនជប៉ុន នៅថ្ងៃទី ២១ ខែឧសភានេះថា រថយន្ត Sedan និងប្រភេទ Crossover នឹងលែងត្រូវបានដាក់លក់នៅសហរដ្ឋអាមេរិកបន្ទាប់ពីឆ្នាំ ២០២១នេះ។

បច្ចុប្បន្ននេះ Mazda6 គឺស្ថិតនៅជំនាន់ទី ៣ តាំងពីឆ្នាំ ២០១២ ដែលមានអាយុកាលជិត ២ ទសវត្ស។ ហើយម៉ូឌែលដែលគួរអោយចង់ចាំបំផុតនៃ Mazda6 គឺម៉ូឌែលប្រភេទ Mazdaspeed6 ដំណើរការដោយម៉ាស៊ីនចំណុះ ២,៣លីត្រ Turbocharged មានកម្លាំង ២៧៤សេះ។ ប៉ុន្តែចំនួនលក់របស់វាគឺកំពុងធ្លាក់ចុះ ដោយនៅឆ្នាំ ២០១៨ ក្រុមហ៊ុនលក់បានតែ ជាង ៣០ ០០០គ្រឿង រីឯឆ្នាំ ២០២០ លក់បានត្រឹមចំនួន ១៦ ២០០គ្រឿងប៉ុណ្ណោះ។

ចំណែក CX-3 ត្រូវបានចេញលក់ជាផ្លូវការកាលពីឆ្នាំ ២០១៥ និងទទួលបានការអភិវឌ្ឍ នៅឆ្នាំ ២០១៨ និង ២០២០។ សម្រាប់ចំនួនរបស់វាក៏បានធ្លាក់ចុះយ៉ាងខ្លាំងដូចគ្នាដែរ ដោយតួរលេខនៅឆ្នាំ ២០១៨ មានចំនួន ១៦ ៩០០គ្រឿង និងឆ្នាំ ២០២០ មានចំនួន ៨ ៣៣០គ្រឿងប៉ុណ្ណោះ។

ទោះយ៉ាងណា Mazda6 ប្រហែលជាមិនបាត់មុខលើទីផ្សារសហរដ្ឋអាមេរិកទាំងស្រុងនោះទេ ដោយអាចត្រឡប់មកវិញជាមួយការអភិវឌ្ឍថ្មីប្រសើជាងនេះ។ ហើយក្រុមហ៊ុនផលិតរថយន្តជប៉ុនមួយនេះ ក៏គ្រោងនឹងបញ្ចេញនូវម៉ូឌែលថ្មី ជាមួយនឹងម៉ាស៊ីនទំហំ ៦ ស៊ីឡាំងថ្មីនាថ្ងៃខាងមុខផងដែរ៕

ផ្ទាំងផ្សាយពាណិជ្ជកម្ម

រថយន្ត Tesla ត្រូវបានហាមឃាត់ពីអគាររដ្ឋាភិបាលមួយចំនួននៅចិន ដោយសារការភ័យខ្លាចប្រព័ន្ធតាមដាន

May 22, 2021

ម្ចាស់រថយន្ត Tesla ត្រូវបានគេស្នើសុំម្តងទៀតមិនឱ្យចតនៅខាងក្នុងអាគាររដ្ឋាភិបាលមួយចំនួននៅក្នុងប្រទេសចិន។ បញ្ហានេះទាក់ទងនឹងកាមេរ៉ារបស់ក្រុមហ៊ុន Tesla ដែលគេគិតថាអាចនឹងជាប្រភពតាមដានទៅលើប្រទេសចិន ហើយហេតុផលនេះក៏ដោយសារតែ Tesla ជាក្រុមហ៊ុនរបស់សហរដ្ឋអាមេរិក។ ប្រភពដែលធ្លាប់ជួបបញ្ហានេះស្រដៀងគ្នានេះដែរ បាននិយាយប្រាប់ សារព័ត៌មាន Router ថាបុគ្គលិកនៅទីភ្នាក់ងាររដ្ឋាភិបាលពីរនាក់ត្រូវបានណែនាំដោយប្រធានផ្នែកគ្រប់គ្រងរបស់ពួកគេ ប្រាប់មិនឱ្យចតរថយន្ត Teslas នៅកន្លែងធ្វើការទៀតទេ។

នេះគឺជារបាយការណ៍ទី ២ ទាក់ទងនឹងការហាមឃាត់លើក្រុមហ៊ុន Tesla នៅអគាររដ្ឋាភិបាលចិន។ នៅក្នុងខែមីនា ក៏ធ្លាប់បានបង្ហាញថាកងទ័ពចិនបានហាមឃាត់ក្រុមហ៊ុន Teslas មិនឱ្យចូលបរិវេណលំនៅដ្ឋានរបស់ខ្លួន ដោយសារការព្រួយបារម្ភអំពីកាមេរ៉ារថយន្តរបស់ពួកគេត្រូវបានគេប្រើដើម្បីធ្វើការស៊ើបការណ៍។ នៅពេលនោះដែរ ប្រហែល ២ ៣ថ្ងៃក្រោយមក លោក Elon Mask បានធ្វើការបដិសេធថា រថយន្តរបស់ខ្លួនមិនមានបំពាក់ប្រព័ន្ធតាមដាន ឬស៊ើបការណ៍អ្វីឡើយ។

ទោះបីជាយានយន្តថ្មីជាច្រើនមានបំពាក់កាមេរ៉ា ទាំងផ្នែកខាងក្រៅ និងផ្នែកខាងក្នុងក៏ដោយ ប៉ុន្តែខាងយោធារបស់ចិនពិតជាមានការព្រួយបារម្ភយ៉ាងខ្លាំងដោយសារតែកាមេរ៉ារបស់ក្រុមហ៊ុន Teslas អាចត្រូវបានប្រើដើម្បីថតសកម្មភាពជាបន្តបន្ទាប់និងអាចកត់ត្រាទិន្នន័យទុក។ យោធា ក៏បានលើកហេតុផលថាខ្សែអាត់វីដេអូអាចត្រូវបានបញ្ជូនត្រឡប់ទៅសហរដ្ឋអាមេរិកវិញ ហើយវាក៏មានការព្រួយបារម្ភផងដែរថាដោយសារតែការចល័តរថយន្ត អាចនឹងមានការបញ្ជូនវីដេអូបែកធ្លាយជាច្រើនផងដែរ។

ក្រុមហ៊ុន Tesla នៅតែបន្តធ្វើការបញ្ចុះបញ្ចូលទៅទីភ្នាក់ងាររបស់ចិន ថាវាមិនមែនជាការធ្វើចារកម្ម ហើយវាក៏នឹងមានសារៈសំខាន់នោះទេ ព្រោះប្រទេសនេះគឺជាទីផ្សាររថយន្តធំបំផុតរបស់ពិភពលោក និងជាទីផ្សារធំបំផុតទី ២ របស់ក្រុមហ៊ុន Tesla ។ យោងតាមទិន្នន័យលក់សរុបរបស់ក្រុមហ៊ុននេះ ៣០ ភាគរយនៃការលក់របស់ខ្លួន ចាប់ផ្តើមមានការលំបាកនៅក្នុងប្រទេសចិន ដែលវានឹងក្លាយជាដំណឹងអាក្រក់សម្រាប់ក្រុមហ៊ុនផលិតរថយន្ត ដោយសារតែការលើកឡើងនេះ។

តើ Tesla អាចដូច Apple ដែរឬទេ?

ផ្ទាំងផ្សាយពាណិជ្ជកម្ម

ឡាន Tesla Roadster ប្រភេទនេះ អាចស្ទុះដល់ ៩៦គ.ម/ម៉ ក្នុងពេលត្រឹម ១,១វិនាទី

May 22, 2021

គិតមកទល់ពេលនេះវាមានរយៈពេល ៣ឆ្នាំហើយ ដែល Tesla បានបង្ហាញចេញរថយន្ត Roadster ជំនាន់ទីពីរ ដែលរថយន្តនេះដើមឡើយត្រូវបញ្ចេញលក់នៅឆ្នាំ២០២១នេះ ប៉ុន្តែត្រូវបានពន្យារពេលចេញលក់រហូតដល់ឆ្នាំ២០២២។

យ៉ាងណាក្ដី នាពេលនេះមានរថយន្ត Roadster មួយគ្រឿងកំពុងដាក់បង្ហាញនៅសារៈមន្ទីរ Petersen Automotive ដោយមានលក្ខណៈសម្បត្តិអស្ចារ្យបំផុត គឺអាចស្ទុះពី ០ ដល់ ៩៦គ.ម/ម៉ ក្នុងពេលត្រឹម ១,១វិនាទី នៅពេលដែលរថយន្តនេះបំពាក់នូវ Option ឈ្មោះថា SpaceX។

ទាក់ទងនឹងសមត្ថភាពដ៏អស្ចារ្យរបស់រថយន្ត Roadster SpaceX នេះដែរ ក៏មានការអះអាងផ្ទាល់ពីលោក Elon Musk ថាសមត្ថភាពរបស់វាពិតជាខ្លាំងបែបនេះមែន។ លោកបានបញ្ជាក់ថា Roadster SpaceX នឹងប្រើប្រាស់កម្លាំងខ្យល់ត្រជាក់ ផ្គួបនឹងឧបករណ៍រុញច្រានបង្កប់នៅខាងក្រោយកន្លែងដាក់ផ្លាកលេខរថយន្ត ជួយឲ្យរថយន្តនេះស្ទុះក្នុងល្បឿនដ៏លឿនមហាសាល។ បើគ្មាន SpaceX នេះរថយន្ត Roadster អាចស្ទុះដោយប្រើពេល ១,៩វិនាទីផងដែរ។

រថយន្ត Tesla Roadster នេះត្រូវបានលោក Elon Musk អះអាងថាវាអាចបើកបរបានចម្ងាយដល់ ៩៩៨គីឡូម៉ែត្រសម្រាប់ការសាកភ្លើងពេញម្ដង ហើយតម្លៃរបស់វាគឺមានចាប់ពីប្រមាណ ២០ម៉ឺនដុល្លារឡើង៕

ផ្ទាំងផ្សាយពាណិជ្ជកម្ម

Toyota Alphard ស៊េរីថ្មី រូបរាងថ្មីនឹងប្រកាសចេញឆ្នាំក្រោយនេះ

May 22, 2021

ផ្អែកតាមព័ត៌មានចេញផ្សាយដោយសារព័ត៌មានជប៉ុនបានឲ្យដឹងថារថយន្ត Toyota Alphard ជំនាន់ទីបួនរំពឹងថានឹងបង្ហាញវត្តមាននៅក្នុងឆ្នាំ២០២២ ខាងមុខនេះ ដោយនឹងមានតែជម្រើសម៉ាស៊ីន Hybrid ប៉ុណ្ណោះ។

គួរដឹងថារថយន្ត Toyota Alphard ជំនាន់បច្ចុប្បន្ននេះបានបង្ហាញវត្តមានជាលើកដំបូងកាលពីខែមករា ឆ្នាំ២០១៦ បន្ទាប់មកទទួលបានការកែកុននៅក្នុងខែធ្នូ ឆ្នាំ២០១៧ សម្រាប់ស៊េរីឆ្នាំ២០១៨។

សម្រាប់រថយន្ត Toyota Alphard ជំនាន់ថ្មីនេះគេនៅមិនទាន់ទទួលបានព័ត៌មានអ្វីច្រើនពីវានៅឡើយទេ ប៉ុន្តែគេដឹងថាវានឹងមានប្រើប្រាស់គ្រោងឆ្អឹង TNGA ដូចជារថយន្ត Toyota ថ្មីៗជាច្រើនទៀតដែរ។ រថយន្តជំនាន់ថ្មីនេះដែរ រំពឹងថានឹងមានបំពាក់តែម៉ាស៊ីន Hybrid ប៉ុណ្ណោះ។

ផ្អែកតាមប្រភពដដែល ប្រភេទអាគុយដែលប្រើប្រាស់លើរថយន្ត Toyota Alphard Hybrid នាពេលបច្ចុប្បន្ននេះនឹងត្រូវប្ដូរចេញទៅជាអាគុយលីចូមដែលមានទំហំតូចជាងមុនសម្រាប់រថយន្ត Toyota Alphard ជំនាន់ថ្មី៕

ផ្ទាំងផ្សាយពាណិជ្ជកម្ម

បែកធ្លាយដំណឹងមិនទាន់ច្បាស់ការណ៍ថា Xpander Cross នឹងមានវត្តមាននៅលើទីផ្សាររថយន្តប្រទេសកម្ពុជាក្នុងពេលឆាប់ៗនេះ

May 22, 2021

អំឡុងពេលប៉ុន្មានឆ្នាំចុងក្រោយនេះក្រុមហ៊ុនរថយន្ត Mitsubishi បានផ្លាស់ប្តូររចនាបថរថយន្តស្ទើរតែគ្រប់ម៉ូឌែលអោយកាន់តែមានភាពទាក់ទាញទាំងរូបរាងខាងក្រៅ និងផ្នែកខាងក្នុងផងដែរ ជាពិសេសរថយន្តម៉ូឌែល Mitsubishi Xpander Cross ដែលយើងដឹងថាជាប្រភេទរថយន្តលក្ខណៈគ្រួសារដ៏ស្រស់ស្អាតមួយផងដែរ។

បើយើងក្រឡេកមើលទៅលើទីផ្សាររថយន្តរបស់ប្រទេសកម្ពុជាយើងវិញក៏មានវត្តមានរថយន្ត Mitsubishi Xpander កំពុងតែរត់លើផ្លូវយ៉ាងច្រើនផងដែរ ចុះប្រសិនបើបន្ថែមវត្តមានរបស់រថយន្ត Mitsubishi Xpander Cross ទៀត មិនដឹងថាស្រស់ស្អាតយ៉ាងណាទេជាពិសេស Mitsubishi Xpander Cross ពណ៌ទឹកក្រូច។

តោះ Admin នឹងនាំប្រិយមិត្តដែលគាំទ្ររថយន្តម៉ូឌែលនេះអោយកាន់តែស្គាល់ច្បាស់ថារថយន្តនេះ មានលក្ខណៈពិសេសខុសពី Mitsubishi Xpander ធម្មតាអ្វីខ្លះ

មានការរចនាថ្មីលក្ខណៈបែបស្ព័រ បង្ហាញពីភាពរឹងមាំ និងទាន់សម័យ
ប្រើប្រព័ន្ធបញ្ឆេះរថយន្ត Smart Key
អំពូលមុខ (Head Lamp) និងអំពូលកាត់អ័ព្ទ (Fog Lamp) ជាប្រភេទអំពូលLED ភ្លឺច្បាស់ងាយស្រួលបើកបរពេលយប់
រង្វង់យ៉ាន់ Alloy Wheels ១៧អុីញ រចនាថ្មី
៧ កៅអី ស្រោបដោយស្បែក
ប្រព័ន្ធកំសាន្តបញ្ជាលើដៃចង្តូត និង Android DVD Player Touch Screen ៩អុីញ
ចង្កូត និងប្រអប់លេខរថយន្តស្រោបដោយស្បែក
ប្រព័ន្ធសុវត្ថិភាពមានដូចជា ហ្វ្រាំង ABS, EBD និង Brake Assist, ប្រព័ន្ធទប់លំនឹងរថយន្តពេលបើកបរលើផ្លូវកោង រអិលនិង បញ្ជៀសការក្រឡាប់ (ASC) និងប្រព័ន្ធទប់លំនឹងកុំឲ្យរអិលថយក្រោយពេលឡើងចំណោត (Hill Start Assist) និងមានលក្ខណៈពិសេសជាច្រើនទៀត ចំណែកតម្លៃលក់វិញប្រហាក់ប្រហែលជាង៣ម៉ឺនដុល្លា ដូច្នេះហើយយើងរង់ចាំមើលទាំងអស់គ្នាថាតើរថយន្តម៉ូឌែលមួយនេះមកដល់ប្រទេសកម្ពុជាពេលណា។

ផ្ទាំងផ្សាយពាណិជ្ជកម្ម

Genesis GV70 ឆ្នាំ២០២១ លក់នៅប្រទេសនេះ តម្លៃចាប់ពីខ្ទង់ ៥ម៉ឺនដុល្លារ

May 22, 2021

ក្រុមហ៊ុន Genesis បានប្រកាសថា វានឹងចេញលក់រថយន្ត GV70 ស៊េរីឆ្នាំ២០២១ នៅប្រទេសអូស្ត្រាលី ក្នុងខែកក្កដា ហើយនឹងផ្តល់ទាំងជម្រើសម៉ាស៊ីនសាំង និងម៉ាស៊ូត។

រថយន្ត Genesis GV70 ឆ្នាំ២០២១ ម៉ូដែល G2.5 ប្រើម៉ាស៊ីនសាំងចំណុះ ២,៥លីត្រ turbocharged ទំហំ ៤ស៊ីឡាំង មានកម្លាំង ៣០០សេះ ដំណើរការដោយប្រអប់លេខអូតូ ៨វគ្គ និងប្រើប៉ុងមួយវិលកង់ក្រោយ ស្តង់ដារ តែក៏មាន Option ប៉ុងពីរផងដែរ។

ចំណែកឯម៉ូដែល GV70 D2.2 ប្រើម៉ាស៊ីនម៉ាស៊ូតចំណុះ ២,២លីត្រ មានកម្លាំង ២០៦សេះ ខណៈម៉ូដែល G3.5 ប្រើម៉ាស៊ីនសាំងចំណុះ ៣,៥លីត្រ V6 មានកម្លាំង ៣៧៤សេះ។ រថយន្តទាំងពីរម៉ូដែលនេះប្រើប៉ុងពីរមកស្តង់ដារ និងប្រព័ន្ធ electro-mechanical limited-slip rear differential ទៀតផង។

សូមបញ្ជាក់ថា រថយន្ត Genesis GV70 G2.5 នឹងមានតម្លៃចាប់ពី ៥១ ៥០០ដុល្លារ សម្រាប់ប្រភេទប៉ុងមួយ និង ៥៣ ៣៦៥ដុល្លារ សម្រាប់ប្រភេទប៉ុងពីរ, D2.2 តម្លៃ ៥៥ ៧០០ដុល្លារ និង G3.5 តម្លៃ ៦៤ ៧០០ដុល្លារ៕

ផ្ទាំងផ្សាយពាណិជ្ជកម្ម