Mitsubishi Mirage ឆ្នាំ២០២១ ចេញផ្លូវការ ជាមួយតម្លៃដ៏មិននឹកស្មាន

January 8, 2021

(សហរដ្ឋអាមេរិច) រថយន្ត Mitsubishi Mirage សេរ៊ីថ្មី ឆ្នាំ២០២១បានចេញជាផ្លូវការ ជាមួយនិងជម្រើសចំនួនពីរប្រភេទគឺ ប្រភេទ Sedan និង Hatchback។

សម្រាប់ម៉ូឌែលថ្មីនេះ នៅផ្នែកខាងក្រៅនៃរថយន្ត គឺពុំមានក៏ផ្លាស់ប្តូរខ្លាំងពីម៉ូឌែលចាស់ប៉ុន្មានឡើយ ដោយបានបំពាក់ជាមួយ ចង្កៀងខាងមុខ-ក្រោយ, កាងក្រោយ និងរន្ធខ្យល់ថ្មី។ ចំណែកផ្នែកខាងក្នុងកាប៊ីនបានធ្វើការអាប់ដេតថ្មីលើ អេក្រង់កម្សាន្តទំហំ ៧អ៊ីញ ដែលមានមុខងារ Apple Carplay និង Android Studio និងឌីស្សាញថ្មីលើ Arm Rests ជាមួយការបន្ថែមមុខងារសុវត្តិភាព Forward Collision Mitigation System, ប្រព័ន្ធរក្សាកម្លាតគ្រោះថ្នាក់ពេលចូលចំណត និងប្រព័ន្ធភ្លើងឡើងចុះដោយស្វ័យប្រវត្តិ។

សម្រាប់រថយន្ត Mirage បានបំពាក់ជាមួយម៉ាស៊ីនចំណុះ ១,២លីត្រ ទំហំ ៣ស៊ីឡាំង កម្លាំង ៧៨សេះ ប្រើប្រាស់ជាមួយជម្រើសប្រអប់លេខដៃ ៥វគ្គ ឬប្រអប់លេខ CVT។

រថយន្ត Mitsubishi Mirage សម្រាប់ប្រភេទ Hatchback មានតម្លៃចាប់ពី ១៤ ២៩៥ ដុល្លារ និងប្រភេទ Sedan មានតម្លៃចាប់ពី ១៥ ២៩៥ ដុល្លារ៕

ផ្ទាំងផ្សាយពាណិជ្ជកម្ម

ក្រុមហ៊ុន General Motors ផលិតរថយន្តអគ្គិសនី សម្រាប់ហុងដា

January 8, 2021

កាលពីខែកញ្ញាឆ្នាំ ២០២០កន្លងទៅ ក្រុមហ៊ុនរថយន្តអាមេរិក GM និងក្រុមហ៊ុនរថយន្តជប៉ុន Honda បានសម្រេចចិត្តចាប់ដៃគ្នាជាមួយនឹងការបង្កើតបុត្រសម្ព័ន្ធដើម្បីផលិតរថយន្ត។ នៅពេលនោះវាត្រូវបានលើកឡើងដើម្បីពិភាក្សា ពីរចនាសម្ព័ន្ធ និងការលើកទឹកចិត្ត នឹងត្រូវចែករំលែកទៅវិញទៅមកសម្រាប់កិច្ចសហប្រតិបត្តិការ។

ហើយនាពេលនេះ យោងតាមប្រភពជាច្រើនដែលបានលើកឡើង បានឱ្យដឹងថាក្រុមហ៊ុន General Motors (GM) នឹងផលិតរថយន្តអគ្គិសនីចំនួន ២ គ្រឿងសម្រាប់ក្រុមហ៊ុនហុងដា នាពេលខាងមុខនេះ។ ជាក់ស្តែង Honda EV ស៊េរីថ្មីនឹងត្រូវផលិតចេញពីរោងចក្ររបស់ក្រុមហ៊ុន GM នៅប្រទេសម៉ិកស៊ីកូ រីឯ Acura EV នឹងផលិតនៅអាមេរិក។

រថយន្តអគ្គិសនី Honda EV នឹងត្រូវផលិតនៅរោងចក្រនៅ Ramos Arizpe ប្រទេសម៉ិកស៊ិក ដូចគ្នានឹងរថយន្ត Chevrolet Blazers និង Equinoxដែរ។ ចំណែក Acura EV ក៏ត្រូវផលិតពីរោងចក្ររបស់ក្រុមហ៊ុន GM នៅ Spring Hill រដ្ឋ Tennessee សហរដ្ឋអាមេរិកដែលរោងចក្រ GMC Acadia, Cadillac XT5 និង XT6 កំពុងផលិត។

កាលពីឆ្នាំ២០២០ ក្រុមហ៊ុនផលិតរថយន្តអាមេរិកមួយនេះធ្លាប់បាននិយាយថា ពួកគេគួរផ្សារភ្ជាប់ទំនាក់ទំនងជាមួយយីហោជប៉ុន ដើម្បីអភិវឌ្ឍយានយន្តអគ្គិសនី ហើយផ្តល់នូវបច្ចេកវិទ្យា OnStar សម្រាប់ផលិតផលហុងដាផងដែរ។ ការផលិតរថយន្តអគ្គិសនីចំនួន ២ របស់ក្រុមហ៊ុនហុងដានៅរោងចក្រ GM គ្រោងនឹងចាប់ផ្តើមនៅឆ្នាំ ២០២៣។ ហើយរថយន្តអគ្គិសនីទាំងពីរនេះ អាចត្រូវ លក់ជាម៉ូដែលឆ្នាំ ២០២៤ ។

ផ្ទាំងផ្សាយពាណិជ្ជកម្ម

Jeep Grand Cherokee ឆ្នាំ២០២១ ចេញប្រភេទតួវែងថ្មី មានបំពាក់កៅអី ៣ជួរ

January 8, 2021

ក្រុមហ៊ុន Jeep បានប្រកាសចេញរថយន្ត Grand Cherokee L ស៊េរីឆ្នាំ២០២១ ដែលមានតួវែង ហើយបំពាក់កៅអីអង្គុយ ៣ ជួរ ខុសពីម៉ូដែល Grand Cherokee ធម្មតា ដែលមានកៅអីតែ ២ ជួរប៉ុណ្ណោះ។

ជាមួយគ្នានេះដែរ ការឌីហ្សាញរបស់ Grand Cherokee L មានភាពខុសប្លែកគ្នាបន្តិចពី Grand Cherokee ដោយផ្នែកខាងមុខ កាត់ទៅរកម៉ូដែល Grand Wagoneer ជាមួយចង្កៀងមុខផ្តេក និងប៉ាណាបញ្ឈរ ៧ បន្ទះ។

រថយន្ត SUVនេះ ត្រូវបានគេទាញតួខ្លួនឲ្យវែងជាងមុន ដោយឥឡូវនេះវាមានប្រវែងពីកង់មុខទៅកង់ក្រោយ សរុប ១២១,៧អ៊ីញ ដែលមានន័យថា តួខ្លួនទាំងមូលរបស់វាមានប្រវែងសរុប ២០៤,៩អ៊ីញ។ មិនតែប៉ុណ្ណោះ កាប៊ីនខាងក្នុងរបស់វាក៏បានបំពាក់តាប្លូថ្មី ដែលមានអេក្រង់កម្សាន្ត Touchscreen ទំហំដល់ ១០,១អ៊ីញ អាចភ្ជាប់មុខងារ Apple CarPlay និង Android Auto ហើយក៏មានកុងទ័រឌីជីថល ទំហំ ១០,៣អ៊ីញ ទៀតផង។

រថយន្ត Jeep Grand Cherokee L ឆ្នាំ២០២១ នេះ នឹងផ្តល់ជម្រើសចំនួន ៤ ម៉ូដែល គឺ Laredo, Limited, Overland និង Summit។ វាបំពាក់ម៉ាស៊ីន Pentastar ចំណុះ ៣,៦លីត្រ V6 មានកម្លាំង ២៩០សេះ និង ម៉ាស៊ីនចំណុះ ៥,៧លីត្រ Hemi V8 មានកម្លាំង ៣៥៧សេះ ហើយដំណើរការជាមួយប្រអប់លេខអូតូ ៨វគ្គ និង ប៉ុងមួយមកស្តង់ដារ ខណៈប៉ុងពីរជា Option។

ទោះជាយ៉ាងណាក៏ដោយ Jeep មិនទាន់បានប្រកាសចេញតម្លៃលក់ជាផ្លូវការរបស់វានៅឡើយទេ៕

ផ្ទាំងផ្សាយពាណិជ្ជកម្ម

Toyota Land Cruiser ជំនាន់ថ្មី ទំនងផ្តល់ជម្រើសម៉ាស៊ីន ៣ ប្រភេទនេះ

January 8, 2021

ខណៈពេលដែលរថយន្ត Toyota Land Cruiser នឹងត្រូវអស់ជីវិត ហើយស៊េរីជំនាន់ថ្មីនឹងបង្ហាញខ្លួនក្នុងពេលខាងមុខនេះ របាយការណ៍មួយចំនួនបាអះអាងថា វាទំនងជាផ្តល់ជម្រើសម៉ាស៊ីនខុសគ្នាចំនួន ៣។

រថយន្ត Land Cruiser ជំនាន់ថ្មី ដែលគេនឹងហៅថា Land Cruiser 300 Series នោះ ទំនងជានឹងបោះបង់ចោលម៉ាស៊ីន V8 របស់ខ្លួន ដើម្បីប្រើម៉ាស៊ីន V6 ជំនួសវិញ។

ក្នុងនោះគឺជាម៉ាស៊ីនសាំងចំណុះ ៣,៥លីត្រ twin-turbocharged V6 ខណៈម៉ាស៊ីនផ្សេងទៀតគឺមានទាំងប្រភេទ Hybrid ផងដែរ។ ជាចុងក្រោយ គឺម៉ាស៊ីនម៉ាស៊ូតចំណុះ ៣,៣លីត្រ V6 សម្រាប់អ្នកត្រូវការកម្លាំងអូសទាញខ្លាំង។

យោងតាមគេហទំព័រ Autoweek បានឲ្យដឹងថា រថយន្ត Land Cruiser ជំនាន់ថ្មី នឹងមានទំហំស្រដៀងទៅនឹងម៉ូដែលបច្ចុប្បន្នដែរ ហើយនៅតែបន្តប្រើគ្រោងឆ្អឹងចាស់ទៀតផង៕

ផ្ទាំងផ្សាយពាណិជ្ជកម្ម

ឡាន Tesla Model 3 ក្លាយជាឡានលក់ដាច់ជាងគេបំផុតនៅអង់គ្លេស កាលពីចុងឆ្នាំ

January 7, 2021

តំណែងជារថយន្តដែលលក់ដាច់ជាងគេនៅប្រទេសអង់គ្លេសប្រចាំខែធ្នូ គឺត្រូវបានកាន់កាប់ដោយ Tesla Model 3 ដែលអាចលក់ដាច់បានច្រើនជាងគូប្រជែងខ្លាំងដទៃទៀតមានដូចជា Volkswagen Golf និង Ford Fiesta។

រថយន្តអគ្គិសនីរបស់អាមេរិកនេះ អាចលក់ចេញបាន ៥ ៧៩៨គ្រឿង កាលពីខែធ្នូ ខណៈដែលរថយន្ត Volkswagen Golf លក់ចេញបាន ៤ ៤៧០គ្រឿង និងរថយន្ត Ford Fiesta អាចលក់ចេញបានសរុប ៣ ៣៦៧គ្រឿង។

គួរដឹងថានេះជាលើកទីពីរហើយដែល Tesla បានស្ថិតនៅតំណែងលេខ១ ដែលលើកទីមួយគឺកាលពីខែមេសាឆ្នាំ ២០២០។ ចំនួនលក់កាលពីខែធ្នូរបស់ Tesla Model 3 មានការកើនឡើងដោយសារការអាប់ដេតទ្រង់ទ្រាយធំដែលបានទៅដល់ប្រទេសអង់គ្លេសកាលពីខែវិច្ឆិកា៕

ផ្ទាំងផ្សាយពាណិជ្ជកម្ម

Volvo និយាយថារថយន្តអគ្គិសនីគឺជាអនាគតរបស់ខ្លួន

January 7, 2021

ក្រោយពីរថយន្ត Recharge ដែលជារថយន្តអគ្គិសនីដំបូងរបស់ខ្លួនទទួលបានភាពរីកចម្រើនខ្លាំងកាលពីឆ្នាំមុន នាពេលនេះ Volvo បានប្រកាសថាខ្លួននឹងបង្កើនការផលិតរថយន្តអគ្គិសនីនៅរោងចក្រ Ghent នៅប្រទេសបែលហ្សិកឲ្យបានមួយទ្វេជាបីត្រឹមឆ្នាំ ២០២២។

រោងចក្រខាងលើនេះគឺមានផលិតរថយន្ត XC40 Recharge និងប្រភេទ PHEV នៃរថយន្ត CX40 ហើយវាក៏នឹងត្រូវផលិតរថយន្តអគ្គិសនីថ្មីរបស់ Volvo ចាប់ផ្ដើមពីចុងឆ្នាំ ២០២១។

ប្រធានផ្នែកប្រតិបត្តិការនិងគុណភាពរបស់ Volvo បាននិយាយថា ៖ “អនាគតរបស់យើងគឺរថយន្តអគ្គិសនី ហើយអតិថិជនទំនងជាពេញចិត្តអ្វីដែលពួកគេបានឃើញតាមរយៈរថយន្ត Recharge របស់យើង។ តាមរយៈការបន្តបង្កើនចំនួនម៉ូដែលរថយន្តអគ្គិសនី និងបង្កើនការផលិតរថយន្តអគ្គិសនីរបស់យើង នោះរោងចក្រ Ghent នឹងជាអ្នកបើកផ្លូវសម្រាប់ការផលិតរបស់យើង។”

គួរដឹងថា Volvo នឹងបញ្ចេញរថយន្តអគ្គិសនីជាច្រើនម៉ូដែលនៅថ្ងៃអនាគត ដោយសារក្រុមហ៊ុននេះចង់ឲ្យពាក់កណ្ដាលនៃចំនួនលក់សរុបលើសកលរបស់ខ្លួនគឺចេញពីរថយន្តអគ្គិសនី ដែលជាផែនការចង់សម្រេចឲ្យបានត្រឹមឆ្នាំ ២០២៥៕

ផ្ទាំងផ្សាយពាណិជ្ជកម្ម

Ford Expedition ឆ្នាំ២០២១ ចេញប្រភេទថោកបំផុត តម្លៃស្ទើរ ៥ម៉ឺនដុល្លារ

January 7, 2021

Ford បានបញ្ចេញរថយន្ត Expedition ស៊េរីឆ្នាំ២០២១ ប្រភេទថោកបំផុតថ្មី គឺម៉ូដែល XL STX ដែលមានតម្លៃចាប់ពី ៤៩ ៩៩៥ដុល្លារ នៅលើទីផ្សារសហរដ្ឋអាមេរិក ដោយសន្សំសំចៃបាន ២ ៨១៥ដុល្លារ បើប្រៀបធៀបទៅនឹងម៉ូដែល XLT ដែលជាប្រភេទ Base Model ពីមុន។

ទោះបីជាយ៉ាងណាក៏ដោយ រថយន្ត Ford Expedition XL STX ឆ្នាំ២០២១ នេះ នឹងមិនមែនកៅអីជួរទី៣ ដូចម៉ូដែល Expedition ដទៃទៀតឡើយ។ មិនតែប៉ុណ្ណោះ វាក៏គ្មានបច្ចេកវិទ្យា Ford Co-Pilot360 និង សេនស័រចូលចតក្រោយ ឡើយ។

យ៉ាងណាមិញ វាមានបំពាក់យ៉ាន់ Alloy ១៨អ៊ីញ, ប៉ាណាមុខខ្មៅរលោង, គម្របកញ្ចក់ចំហៀងខ្មៅរលោង និង របាំងផុកពណ៌ដូចតួខ្លួន ជាដើម។

រថយន្ត Expedition បំពាក់ម៉ាស៊ីនចំណុះ ៣,៥លីត្រ EcoBoost V6 មានកម្លាំង ៣៧៥សេះ ដំណើរការដោយប្រអប់លេខអូតូ ១០វគ្គ ដូចម៉ូដែលដទៃទៀតដែរ ហើយប្រើប៉ុងមួយវិលកង់ក្រោយ RWD ស្តង់ដារ ខណៈប៉ុងពីរ AWD ជា Option តម្លៃ ៣ ០៥០ដុល្លារ៕

ផ្ទាំងផ្សាយពាណិជ្ជកម្ម

Nissan Juke ២០២១ ចេញម៉ូដែលពិសេសថ្មី មើលទៅរឹតតែឡូយ

January 7, 2021

ក្រុនហ៊ុន Nissan បានប្រកាសចេញម៉ូដែលពិសេសថ្មី សម្រាប់រថយន្ត Juke ជំនាន់ទី២ នៅក្នុងទីផ្សារអឺរ៉ុប ដោយហៅវាថា Enigma។

រថយន្ត Nissan Juke Enigma ស៊េរីឆ្នាំ២០២១ នេះ ទទួលបានការតុបតែងបន្ថែមដូចជា ក្រាហ្វិចលើដំបូល និងកញ្ចក់ចំហៀង, ឡូហ្គូ Enigma, យ៉ាន់ Akari ១៩អ៊ីញ ហើយផុ្តល់ជម្រើសតួខ្លួន ៣ ពណ៌ គឺ ប្រផេះ និង ស ជាមួយដំបូលពណ៌ខ្មៅ និង ខ្មៅសុទ្ធ តែម្តង។

បន្ថែមពីលើរូបរាងរបស់វា Juke Enigma ក៏មានបំពាក់មុខងារ Amazon Alexa ផងដែរ ហើយវាគឺជារថយន្ត Nissan ដំបូងគេបង្អស់នៅអឺរ៉ុប ដែលមានបំពាក់មុខងារមួយនេះ។

Juke Enigma នឹងចេញលក់នៅអឺរ៉ុបក្នុងខែមករា ឆ្នាំ២០២១ នេះ ជាមួយនឹងតម្លៃចាប់ពី ៣១ ៦២០ដុល្លារ៕

ផ្ទាំងផ្សាយពាណិជ្ជកម្ម

Honda Crossroad ទំនងជាចម្លើយឆ្លើយតបនឹង Toyota Corolla Cross

January 6, 2021

បច្ចុប្បន្ននេះ Honda មានរថយន្ត SUV តែពីរប្រភេទប៉ុណ្ណោះនៅទីផ្សារប្រទេសជប៉ុន គឺមាន Honda CR-V និង Honda HR-V ដែលវាមិនមែនជាគូប្រកួតប្រជែងខ្លាំងក្លាមួយជាមួយនឹងរថយន្តរបស់ Toyota ឬ Mazda នោះទេ។

ហេតុនេះហើយទើប Honda មានផែនការបញ្ចេញរថយន្ត SUV ឲ្យបានកាន់តែច្រើន និងដុះខាត់រថយន្តដែលមានឲ្យកាន់តែទាក់ទាញផងដែរ។ ជាក់ស្ដែងនៅខែមីនាឆ្នាំនេះ ក្រុមហ៊ុននឹងប្រកាសចេញរថយន្ត Honda HR-V ស៊េរីឆ្នាំ ២០២១ ដែលមានរូបរាងថ្មីទាំងស្រុង។

នៅឆ្នាំ ២០២២ ខាងមុខ បើតាមការចុះផ្សាយបានឲ្យដឹងថា Honda នឹងបង្ហាញចេញរថយន្ត SUV មួយប្រភេទទៀតដែលមានលក្ខណៈស្រដៀងនឹង HR-V ដែលទំនងជាអាចនឹងមានឈ្មោះថា Honda Crossroad។ វានឹងក្លាយជាគូប្រជែងចំៗរបស់ Toyota Corolla Cross សម្រាប់ទំហំ និងរូបរាងរបស់វា។

ដូចជាការដែល Toyota រៀបចំ Corolla Cross ឲ្យនៅចន្លោះរថយន្ត C-HR និង RAV4 អ៊ីចឹងដែរ គឺរថយន្ត Honda Crossroad នឹងស្ថិតនៅចន្លោះរថយន្ត Honda HR-V និង Honda CR-V។ បន្ថែមពីលើនេះ Honda ក៏បានចុះកម្មសិទ្ធិឈ្មោះ ZR-V ដែលជាការឲ្យតម្រុយថាក្រុមហ៊ុនជប៉ុននេះកំពុងអភិវឌ្ឍន៍រថយន្ត SUV ថ្មីមួយទៀត សម្រាប់ជាគូប្រជែងរថយន្ត Toyota Raize ផងដែរ៕

ផ្ទាំងផ្សាយពាណិជ្ជកម្ម

ជាលើកដំបូង ឡានអគ្គិសនីលក់ដាច់បានច្រើនជាងឡានប្រើម៉ាស៊ីននៅប្រទេសមួយនេះ

January 6, 2021

ជាប្រវត្តិសាស្ត្រមួយសម្រាប់ប្រទេសន័រវែស និងពិភពលោកទាំងមូលផងដែរនោះ រថយន្តដើរដោយថាមពលអគ្គិសនីអាចលក់ដាច់បានច្រើនជាងរថយន្តដើរដោយប្រេងឥន្ធនៈ នៅលើទីផ្សារប្រទេសន័រវេសកាលពីឆ្នាំ ២០២០។

រថយន្តអគ្គិសនីបានកាន់កាប់ចំណែក ៥៤% នៃចំនួនលក់សរុប ខណៈរថយន្តប្រើម៉ាស៊ីនឥន្ធនៈកាន់កាប់ចំណែកទីផ្សារ ៤៦%។ កាលពីឆ្នាំ ២០១៩ ចំនួនលក់រថយន្តអគ្គិសនីនៅន័រវែសគឺមានចំណែក ៤២% ហើយបើ ១០ឆ្នាំមុនវាមានចំណែក ១% ប៉ុណ្ណោះ។

គួរដឹងថាន័រវែសកំពុងតែខិតខំខ្លាំងបំផុតដើម្បីក្លាយខ្លួនជាប្រទេសដំបូងគេ ដែលលែងមានលក់រថយន្តដើរដោយថាមពលប្រេងឥន្ធនៈនៅលើទីផ្សារ។ រថយន្តអគ្គិសនីនៅន័រវែសមានការលើកលែងពិសេសមិនយកពន្ធគ្រប់ប្រភេទ ខុសពីរថយន្តប្រើម៉ាស៊ីន។

ក្នុងចំណោមរថយន្តម៉ាស៊ីនដែលលក់នៅន័រវែសកាលពីឆ្នាំមុន ក្នុងនោះមាន ២០% ជារថយន្ត Hybrid សាកភ្លើងបាន (PHEV) , មាន ៩% ជារថយន្ត Hybrid ធម្មតា និងមាន ៨% ប៉ុណ្ណោះជារថយន្តប្រើប្រាស់ប្រេងឥន្ធនៈសុទ្ធ៕

ផ្ទាំងផ្សាយពាណិជ្ជកម្ម