Lexus នឹងឈប់លក់ឡាន ៣ម៉ូដែលនៅអង់គ្លេស

October 8, 2020

ក្រុមហ៊ុន Lexus កំពុងតែសារ៉េត្រកូលរថយន្តរបស់ខ្លួនសម្រាប់ម៉ូដែលថ្មី នៅលើទីផ្សារអង់គ្លេស ហើយព័ត៌មានធំបំផុតគឺការឈប់លក់ម៉ូដែល CT, IS និង RC នៅទីនោះ។ ទោះបីជាយ៉ាងណា ឥឡូវនេះម៉ូដែលទាំង ៣ខាងលើ នៅតែមានដាក់លក់នៅលើគេហទំព័រផ្លូវការដដែល។

បើយោងតាមគេហទំព័រ Autocar ដែលអះអាងថាទទួលបានការបញ្ជាក់ពីអ្នកនាំពាក្យនៃក្រុមហ៊ុន Lexus បានឲ្យដឹងថា ពួកគេបានឈប់នាំចូលរថយន្តម៉ូដែល CT, IS និង RC បាត់ទៅហើយ និងគ្មានម៉ូដែលណាមកជំនួសឡើយ។

រថយន្ត Lexus CT ត្រូវបានដាក់លក់ក្នុងតម្លៃចាប់ពី ៣៣ ៨០០ដុល្លារ សម្រាប់ទីផ្សារអង់គ្លេស ខណៈម៉ូដែល IS ចាប់ពី ៤២ ៩០០ដុល្លារ និង ៥២ ៧០០ដុល្លារ សម្រាប់ម៉ូដែល RC៕

ផ្ទាំងផ្សាយពាណិជ្ជកម្ម

មើលរូបរាងឡានភីកអាប់ Honda ស៊េរីថ្មីឆ្នាំ ២០២១

October 8, 2020

Honda បានបង្ហាញចេញនូវរថយន្ត Ridgeline ស៊េរីឆ្នាំ ២០២១ ដែលមានរូបរាងថ្មី ជាមួយការផ្លាស់ប្ដូរផ្នែកខាងមុខ, ការបំពាក់កង់ទំហំ ១៨អ៊ីញមកជាស្តង់ដារ, ការផ្លាស់ប្ដូររូបរាងខាងក្រោយ និងបានបំពាក់បំពង់ស៊ីមាំងភ្លោះផងដែរ។

រថយន្តភីកអាប់ថ្មីនេះមានដំណើរការដោយម៉ាស៊ីនចំណុះ ៣,៥លីត្រ ៦ស៊ីឡាំង ដែលផលិតកម្លាំងបាន ២៨០សេះ ផ្គួបនឹងប្រអប់លេខស្វ័យប្រវត្តិ៩វគ្គ។ ចំពោះប្រភេទ RTL-E និង Black Edition មានមកជាស្តង់ដារនូវប្រព័ន្ធបើកបរវិលកង់ទាំងបួន។

ក្រៅពីផ្លាស់ប្ដូររូបរាងខាងក្រៅ រថយន្តនេះក៏មានផ្លាស់ប្ដូរផ្នែកខាងក្នុងត្រង់អេក្រង់បង្ហាញប្រព័ន្ធសំឡេងដែលមានរូបភាពថ្មី ហើយមានប៊ូតុងសម្រាប់បន្ថែមបន្ថយសំឡេងក្បែរនោះផងដែរ។ គ្រប់ Option ទាំងអស់ក៏មានបំពាក់មកជាមួយនូវ Honda Sensing ដែលមានមុខងារព្រមានពីការប៉ះទង្គិច, មុខងាររក្សាគន្លងផ្លូវ និងមុខងារ Cruise Control ជាដើម។

រថយន្ត Honda Ridgeline ស៊េរីថ្មីនឹងមានដាក់លក់នៅសហរដ្ឋអាមេរិកនាដើមឆ្នាំក្រោយ ដោយមានតម្លៃចាប់ពីជាង ៣៥ ០០០ដុល្លារ៕

ផ្ទាំងផ្សាយពាណិជ្ជកម្ម

Mercedes នឹងឈប់ផលិតឡានលេខដៃ ដើម្បីកាត់បន្ថយការចំណាយ

October 8, 2020

Mercedes បានប្រកាសព័ត៌មានលម្អិតបន្ថែមអំពីយុទ្ធសាស្ត្រកាត់បន្ថយការចំណាយដ៏ធំរបស់ខ្លួន ដើម្បីអាចទទួលបានផលចំណេញខ្ពស់ជាងមុន។

ក្រុមហ៊ុនរថយន្តអាល្លឺម៉ង់មួយនេះនឹងបញ្ឈប់ការផលិតរថយន្តប្រើប្រអប់លេខដៃ និងកាត់បន្ថយរថយន្តម៉ាស៊ីនសាំងឲ្យបានចំនួន ៤០% នៅត្រឹមឆ្នាំ ២០២៥ ហើយនឹងកាត់បន្ថយឲ្យបានដល់ ៧០% នៅត្រឹមឆ្នាំ ២០៣០។ គោលដៅគឺដើម្បីកាត់បន្ថយការចំណាយ និងថ្លៃចំណាយលើផ្នែក R&D ឲ្យបានជាង ២០% នៅត្រឹមឆ្នាំ ២០២៥។

លោក Markus Schaefer នាយកប្រតិបត្តិក្រុមហ៊ុន Mercedes-Benz បាននិយាយថា ៖ “ខណៈដែលយើងនឹងពង្រីកសែស្រឡាយរថយន្តអគ្គិសនីឲ្យបានលើសពី ៥០% នៃចំនួនលក់លើទូទាំងសកលនៅត្រឹមឆ្នាំ ២០៣០ ការបណ្ដាក់ទុនលើរថយន្តម៉ាស៊ីនសាំងនឹងត្រូវធ្លាក់ចុះលឿនបំផុត ដោយចំនួនប្រភេទរថយន្តម៉ាស៊ីនសាំងរបស់យើងនឹងត្រូវកាត់បន្ថយឲ្យបាន ៧០% នៅត្រឹមឆ្នាំ ២០៣០។”

យ៉ាងណាក្ដី Mercedes មិនបានបញ្ជាក់នោះទេថាម៉ូដែលណានឹងត្រូវរងផលប៉ះពាល់មុនគេ ពេលដែលវិធានការទាំងនេះចាប់ផ្ដើមអនុវត្តន៍នោះ៕

ផ្ទាំងផ្សាយពាណិជ្ជកម្ម

ឡានលក់ដាច់ជាងគេនៅអាមេរិក មាន២ម៉ូដែលប៉ុណ្ណោះជាឡាន Sedan

October 7, 2020

ក្នុងចំណោមរថយន្តដែលលក់ដាច់បានច្រើនជាងគេទាំង ១០នៅសហរដ្ឋអាមេរិក ប្រចាំត្រីមាសទីបីនៃឆ្នាំ ២០២០ មានពីរម៉ូដែលប៉ុណ្ណោះដែលជារថយន្ត Sedan ហើយប៉ុន្មានម៉ូដែលទៀតគឺសុទ្ធសឹងជារថយន្តភីកអាប់ និងរថយន្ត SUV ដែលជាប្រភេទរថយន្តតួខ្ពស់។ ខាងក្រោមជារថយន្តលក់ដាច់ជាងគេទាំង១០ ប្រចាំត្រីមាសទីបីនៅសហរដ្ឋអាមេរិក ៖

១. Ford F-Series ៖ ២២១ ៦៤៧គ្រឿង (កើន ៣,៥%)

២. Ram Truck ៖ ១៥៦ ១៥៧គ្រឿង (ថយ ៣,៤%)

៣. Chevrolet Silverado ៖ ១៤៧ ៤៨៤គ្រឿង (ថយ ៥,១%)

៤. Toyota RAV4 ៖ ១១៩ ២១៤គ្រឿង (ថយ ៣,៩%)

៥. Honda CR-V ៖ ៩៨ ៤៣៦គ្រឿង (ថយ ៥,២%)

៦. Toyota Camry ៖ ៧៩ ០៤៦គ្រឿង (ថយ ៤,១%)

៧. Honda Civic ៖ ៧៣ ០៨៣គ្រឿង (ថយ ១៥,៣%)

៨. GMC Sierra ៖ ៦៧ ៨១២គ្រឿង (កើន ២,៤%)

៩. Chevrolet Equinox ៖ ៦៧ ៤៧៦គ្រឿង (ថយ ១៥,៤%)

១០. Toyota Highlander ៖ ៦២ ២៣០គ្រឿង (ថយ ៩,៨%)

ផ្ទាំងផ្សាយពាណិជ្ជកម្ម

មកដឹងតម្លៃឡាន Peugeot 3008 និង 5008 ឆ្នាំ២០២១ ទើបចេញក្តៅៗ

October 7, 2020

ក្រុមហ៊ុន Peugeot ទើបតែបានប្រកាសតម្លៃនៃរថយន្ត 3008 និង 5008 ស៊េរីឆ្នាំ២០២១ ជាផ្លូវការសម្រាប់ទីផ្សារប្រទេសអង់គ្លេស។

រថយន្ត 3008 ឆ្នាំ២០២១ នឹងមានតម្លៃចាប់ពី ៣៣ ៧២៥ដុល្លារ សម្រាប់ម៉ូដែល Active Premium, ចាប់ពី ៣៥ ៧៨០ដុល្លារ សម្រាប់ម៉ូដែល Allure និង ៥៥ ០៥០ដុល្លារសម្រាប់ម៉ូដែល Hybrid4 300។ ក្រៅពីនោះនៅមានម៉ូដែល Allure Premium, GT, និង GT Premium ផងដែរ។

ចំណែកឯរថយន្ត 5008 ឆ្នាំ២០២១ វិញមានតម្លៃចាប់ពី ៣៦ ៨៥០ដុល្លារ សម្រាប់ម៉ូដែល Active Premium។ ក្រៅពីនោះវាក៏មានម៉ូដែល Allure, Allure Premium, GT និង GT Premium ដូចគ្នាដែរ។
ទាំងរថយន្ត Peugeot 3008 និង 5008 ឆ្នាំ២០២១ នឹងចេញលក់នៅដើមឆ្នាំក្រោយ៕

ផ្ទាំងផ្សាយពាណិជ្ជកម្ម

កាមេរ៉ាក្នុងឡាន Tesla Model 3 អាចតាមដានសកម្មភាព លើសពីអ្នកស្មានដល់

October 7, 2020

កូនកាមេរ៉ាតូចមួយគ្រាប់ដែលមាននៅក្នុងរថយន្ត Tesla Model 3 មានសមត្ថភាពច្រើនលើសពីម្ចាស់របស់វាស្មានគិតទៅទៀត។

កាមេរ៉ាដែលចាប់ជាប់លើកញ្ចក់មើលក្រោយនេះ ត្រូវបានគេចាប់អារម្មណ៏ខ្លាំងកាលពីឆ្នាំមុន។ នៅពេលនោះ មេ Tesla លោក Elon Musk បាននិយាយថា វាមិនទាន់ដំណើរការនៅឡើយទេ ហើយនឹងអាចបើកដំណើរការ នៅពេលម្ចាស់ឡាន Tesla អាចចាប់ផ្តើមប្រើឡាន Model 3 សម្រាប់សេវាកម្ម Uber និង Lyft ស្វ័យប្រវត្ត។
លោក Musk បន្ថែមថា វានឹងដើរតួនាទីជាកាមេរ៉ាសុវត្ថិភាព នៅពេលមាននរណាម្នាក់ធ្វើអ្វីមួយមិនត្រឹមត្រូវរថយន្តបស់អ្នក។

ទោះជាយ៉ាងណាក៏ដោយ ថ្មីៗនេះគេបានធ្វើតេស្តលើកាមេរ៉ានោះ និងបានរកឃើញថា វាមានសមត្ថភាពអាចតាមដានអ្វីដែលអ្នកបើកបរកំពុងធ្វើ គ្រប់ពេលវេលាទាំងអស់។

ជាក់ស្តែង កាមេរ៉ានេះអាចតាមដានចលនាភ្នែកបស់អ្នកបើកបរ ថាតើមើលចុះក្រោម ចំហៀង ឬលើ។ បន្ថែមពីនេះវាអាចតាមដាចលនាក្បាល ថាតើអ្នកបើកបរងាកទៅឆ្វេង ឬស្តាំ។ វាក៏មានសមត្ថភាពអាចតាមដាន ប្រសិនបើនរណាម្នាក់ប្រើទូរសព្ទពេលបើកបរ និងអាចសម្គាល់ដឹងថាអ្នកបើកបរទំនងជាសម្លឹងចុះក្រោមពេលពាក់វែនតាជាដើម។

Until @Tesla or @elonmusk tells me what this camera is doing for me I'm shutting them out. It SHOULD be used with Sentry Mode, but it's not at this time. When it has a purpose that serves me I'll slide it back open. Here's what I used of you want to join: https://t.co/MasBhAAH5n pic.twitter.com/eZIEYmBKGx

— ⚡?LivingTesla?⚡ (@LivingTesla) April 4, 2019

មូលហេតុដែល Tesla តាមដានសកម្មភាពទាំងនេះរបស់អ្នកបើកបរ គឺដើម្បីអភិវឌ្ឍប្រព័ន្ធតាមដានអ្នកបើកបរ៕

ផ្ទាំងផ្សាយពាណិជ្ជកម្ម

ចេញតម្រុយឡាន Leuxs RX នឹងមានប្រភេទសាកភ្លើងបាន

October 7, 2020

កាលពីថ្មីៗនេះ Lexus បានដាក់ពាក្យស្នើសុំសិទ្ធប៉ាតង់សម្រាប់ឈ្មោះថា “RX450h+” ជាមួយការិយាល័យកម្មសិទ្ធិបញ្ញារបស់សហភាពអឺរ៉ុប។

ឈ្មោះមួយនេះអាចឲ្យគេជឿជាក់ថានឹងជាឈ្មោះសម្រាប់ Lexus RX ប្រភេទ Plug-in Hybrid ដែលជាប្រភេទរថយន្តអាចសាកភ្លើងបាន។ គួរដឹងថាកន្លងមកគេមិនធ្លាប់ឃើញមានសញ្ញា “+” ក្នុងឈ្មោះរថយន្តដែលជាផលិតផលសម្រេចរបស់ Lexus នោះទេ។

Lexus បានដាក់ពាក្យកាលពីថ្ងៃទី៦ ខែតុលា កន្លងទៅនេះ ដូចនេះប្រហែលជាត្រូវរង់ចាំយូរឆ្នាំទើបរថយន្ត Lexus RX450h+ បង្ហាញវត្តមានជាផ្លូវការ។ រំលឹកដែរថាកាលពីដើមឆ្នាំ Lexus ក៏បានដាក់ពាក្យស្នើសុំកម្មសិទ្ធិបញ្ញាសម្រាប់ឈ្មោះ “NX450h+” ដែលកូនរថយន្ត SUV ខ្នាតតូចនេះក៏នឹងមានប្រភេទ Plug-in Hybrid ផងដែរ។

គេរំពឹងថារថយន្ត NX និង RX PHEV នឹងប្រើប្រាស់ប្រព័ន្ធម៉ាស៊ីនរបស់ Toyota RAV4 Prime ដែលមានម៉ូទ័រអគ្គិសនីចំនួនពីរ គួបផ្សំនឹងម៉ាស៊ីនសាំងចំណុះ ២,៥លីត្រ ៤ស៊ីឡាំង។ រថយន្ត RAV4 Prime អាចផលិតកម្លាំងបាន ៣០២សេះ ហើយអាចបើកបរបានចម្ងាយ ៦២,៧គីឡូម៉ែត្រ ពេលប្រើថាមពលអគ្គិសនី៕

ផ្ទាំងផ្សាយពាណិជ្ជកម្ម

រថយន្ត Off road របស់ Lexus នឹងដាក់បង្ហាញខ្លួននៅថ្ងៃស្អែកនេះ (មានវីដេអូ)

October 7, 2020

Lexus បានចេញនូវ Concept ថ្មី ដែលធ្វើអោយយើងកាន់តែចាប់អារម្មណ៏ គឺ J201 Concept ប្រភេទ Off road ដែលជា Concept កែចេញពីរថយន្ត Lexus LX 570។ រថយន្ត Lexus J201 Concept គ្រោងដាក់បង្ហាញខ្លួន នៅក្នុងកម្មវិធី 10-day-long Rebelle Rally នៅថ្ងៃទី ០៨ ខែតុល្លា នេះជាមួយការប្រើ គ្រោងឆ្អឹងរបស់ Lexus LX 570 និងលេខកូដ URJ201។

រូបរាងនៃរថយន្ត Lexus J201 Concept បានបំពាក់ជាមួយ កាងមុខប្រភេទ CBI off-road ជាមួយត្រើយសម្រាប់អូសសណ្តោង និងអំពូលភ្លើងប៉ាណាខាងមុខប្រវែង ៧៦២មីលីម៉ែត្រដែលមានភាពរឹងមាំបំផុត, យ៉ាន់កង់ ប្រភេទ Evo Corse DakarZero ទំហំ ១៧ អ៊ីញ។ ផ្នែកខាងក្រោយបានបំពាក់ជាមួយ កាង ប្រភេទ CBI off-road ដែលភ្ជាប់មកជាមួយ ជណ្តើរ, កង់សាគួរ, ភ្លើងប្រភេទ S2 Sport Lighting នៅលើកាងខាងក្រោម និងធុងទឹក ប្រភេទ Scepter 5-gallon។

រីឯផ្នែកខាងក្នុងនៃរថយន្ត បានធ្វើការបំពាក់បន្ថែមនូវគ្រឿងតុបតែងប្រភេទ ARB Linx ដែលអាចបញ្ជាទៅលើ ប្រព័ន្ធភ្លើង, air locker, compressor និងប្រអប់ដាក់សំភារះនៅខាងក្រោយ។ រថយន្តប្រភេទ Off road នេះផងដែរបានបំពាក់ជាមួយ ម៉ាស៊ីនចំណុះ ៥,៧លី V8 ផលិតកម្លាំងបានរហូតដល់ ៥៥០សេះ និងកម្លាំងរមួល ៧៤៥ ញូតុនម៉ែត្រទាញយកកម្លាំងតាមរយៈបច្ចេកវិទ្យា Magnusson TVS 1900 supercharger។

សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

Mercedes បញ្ជាក់ថាកំពុងផលិតឡាន AMG និង G-Class ប្រភេទអគ្គិសនី

October 6, 2020

ក្រុមហ៊ុន Mercedes-Benz បានបង្ហាញព័ត៍មានគួរអោយចាប់អារម្មណ៍ជាច្រើននៅក្នុងសន្នីសីទជួបជុំអ្នកបណ្ដាក់ទុននិងអ្នកវិភាគដែលប្រព្រឹត្តទៅជាលក្ខណ:អនឡាញ។

ក្រុមហ៊ុនបានបង្ហាញមហិច្ឆតាក្នុងការធ្វើអោយរថយន្តប្រើប្រាស់កម្លាំងអគ្គិសនី (រាប់ប្រភេទ Hybrid, Plug-In Hybrid និងអគ្គិសនីសុទ្ធ) មានចំណែកពាក់កណ្ដាលក្នុងចំនួនលក់សរុបរបស់ក្រុមហ៊ុនអោយបានត្រឹមឆ្នាំ ២០៣០ ដែលនឹងធ្វើអោយបានតាមរយៈការពង្រីកម៉ាកសាខារបស់ខ្លួនមានដូចជា AMG និង Maybach ជាដើម។

ក្រុមហ៊ុនបានបញ្ជាក់ AMG, Maybach និងរថយន្តត្រកូល G-Class នឹងមានបន្ថែមនូវប្រភេទអគ្គិសនីឆាប់ចាប់ផ្ដើមពីឆ្នាំក្រោយ ជាមួយម៉ាក AMG មុនគេ បន្ទាប់មកគឺ Maybach ហើយបន្ទាប់មកទៀតគឺដល់វេនរថយន្តត្រកូល G-Class។

គួរដឹងផងដែរថានៅឆ្នាំ ២០២៥ ខាងមុខ Mercedes នឹងមានប្រើប្រាស់គ្រោងឆ្អឹងដែលផលិតឡើងសម្រាប់រថយន្តប្រើថាមពលអគ្គិសនីជាពិសេស ឈ្មោះថា Mercedes-Benz Modular Architecture៕

ផ្ទាំងផ្សាយពាណិជ្ជកម្ម

Tesla រំលាយចោលផ្នែកផ្សព្វផ្សាយព័ត៍មាន

October 6, 2020

ក្រៅពីជាប់ឈ្មោះជាក្រុមហ៊ុនផលិតរថយន្តអគ្គិសនីទ្រង់ទ្រាយធំដំបូងគេហើយនោះ ពេលនេះ Tesla បានក្លាយជាក្រុមហ៊ុនដំបូងគេដែលរំសាយចោលផ្នែកផ្សព្វផ្សាយព័ត៍មានរបស់ខ្លួនផងដែរ។

ប្រភពជាន់ខ្ពស់ក្នុងក្រុមហ៊ុនបានប្រាប់ដល់ Electrek ថា ពេលនេះពួកគេលែងមានក្រុមផ្សព្វផ្សាយព័ត៍មាន ដែលអាចបកស្រាយបានថាហេតុអ្វីទើបជាច្រើនខែមកនេះ Tesla មិនបានឆ្លើយតបសំនួរពីសំណាក់អ្នកសារព័ត៍មាននានា។ យ៉ាងណាក្ដីប្រភពបានបញ្ជាក់ថាត្បិតថាផ្នែកនេះត្រូវបានរំសាយចោលនៅអាមេរិក ប៉ុន្តែនៅអឺរ៉ុប និងអាស៉ីនៅបន្តមានផ្នែកនេះនៅឡើយ។

គួរបញ្ជាក់ថាគេមិនទាន់ដឹងហេតុផលនៃការរំលាយនេះទេ ប៉ុន្តែទំនងដោយសារតែ Tesla មានសារព័ត៍មានផ្សេងៗតែងជួយផ្សព្វផ្សាយអោយស្រាប់ ទើបមិនខ្វាយខ្វល់នឹងការបង្កើតក្រុមផ្សព្វផ្សាយផ្ទាល់ខ្លួន៕

ផ្ទាំងផ្សាយពាណិជ្ជកម្ម