ឡាន McLaren ទិញដំបូងតម្លៃ ២លានដុល្លារ ឥឡូវដាក់លក់វិញជិត ៥លានដុល្លារ

July 25, 2020

រថយន្ត McLaren Speedtail ដែលចេញកាលពីប្រមាណពីរឆ្នាំមុន មានផលិតត្រឹមតែ ១០៦គ្រឿងក្នុងលោក គឺមានដាក់លក់ក្នុងតម្លៃចាប់ពីប្រមាណ ២,២លានដុល្លារ។

ពេលនេះគេបានប្រទះឃើញរថយន្ត McLaren Speedtail ដាក់លក់លើវិបសាយលក់រថយន្តមួយទឹក Mobile ដែលមានកំណត់តម្លៃរហូតដល់ប្រមាណ ៤,៩លានដុល្លារ ដែលមានន័យថាម្ចាស់រថយន្តអាចបានប្រាក់ចំណេញប្រមាណ ២,៧លានដុល្លារ ពេលដែលលក់ចេញ។

បើតាមការអះអាងរបស់វិបសាយ Mobile បានឲ្យដឹងថារថយន្តដែលដាក់លក់នេះ គ្រាន់តែជារថយន្តដែលធ្លាប់មានម្ចាស់រួច ហើយម្ចាស់រថយន្តមិនធ្លាប់ប្រើប្រាស់វានោះទេ។ យ៉ាងណាក្ដីរូបភាពផ្នែកខាងក្រៅ និងផ្នែកខាងក្នុងរថយន្តមិនត្រូវបានបង្ហាញនោះទេ លុះត្រាតែអ្នកមានចំណាប់អារម្មណ៍ចង់ទិញធ្វើការស្នើសុំទៅកាន់អ្នកលក់។

McLaren Speedtail គឺមានបំពាក់ម៉ាស៊ីន ៤,០លីត្រ Twin-Turbo V8 ដែលបញ្ចេញកម្លាំងបាន ១០៣៥សេះ និងអាចស្ទុះពី ០-៣០០ គ.ម/ម៉ ដោយប្រើពេលត្រឹម ១២,៨វិនាទី ជាមួយល្បឿនអតិបរមា ៤០៣ គ.ម/ម៉៕

ផ្ទាំងផ្សាយពាណិជ្ជកម្ម

ឡានភីកអាប់អគ្គិសនីរបស់ Rivian ត្រូវពន្យារពេលចេញលក់ដល់ឆ្នាំក្រោយ

July 25, 2020

រថយន្ត R1S និង R1T របស់ក្រុមហ៊ុនផលិតរថយន្តអគ្គិសនី Rivian បានបង្ហាញខ្លួនដល់ពិភពលោកជាផ្លូវការតាំងពីពីរឆ្នាំមុនមកម្ល៉េះ ពោលគឺក្នុងកម្មវិធីតាំងបង្ហាញរថយន្ត Los Angeles Auto Show ឆ្នាំ ២០១៨។ នាពេលនេះរថយន្តទាំងពីរត្រូវពន្យារពេលចេញលក់ជាច្រើនខែដោយសារជំងឺកូវីដ១៩។

ក្រុមហ៊ុន Rivian បានបញ្ជាក់នាថ្ងៃសុក្រថា រថយន្ត Rivian R1T នឹងចាប់ផ្ដើមដឹកជញ្ជូនឲ្យអតិថិជនចាប់ពីខែមិថុនា ឆ្នាំ ២០២១ ចំណែករថយន្ត R1S គឺចាប់ពីខែសីហា ឆ្នាំ ២០២១ ដូចគ្នា។ កាលបរិច្ឆេទកំណត់ចុងក្រោយនេះ គឺយូរជាងកាលបរិច្ឆេទដែលបានកំណត់ពីដើមមកប្រមាណជា ៦ខែ។

គួរដឹងថារថយន្តភីកអាប់អគ្គិសនី R1T គឺមានតម្លៃចាប់ពី ៦៩ ០០០ដុល្លារ ចំណែកឯរថយន្ត R1S ដែលជារថយន្ត SUV អគ្គិសនីវិញគឺមានតម្លៃចាប់ពី ៧២ ៥០០ដុល្លារ៕

ផ្ទាំងផ្សាយពាណិជ្ជកម្ម

Mercedes S-Class ឆ្នាំ២០២១ នឹងមានបំពាក់ពោងសុវត្ថិភាពកៅអីក្រោយ ដំបូងបង្អស់លើលោក

July 25, 2020

Mercedes S-Class ស៊េរីឆ្នាំ២០២១ មិនត្រឹមតែបានអាប់ដេតលើផ្នែកផាសុកភាព និងប្រណីតភាបប៉ុណ្ណោះទេ ប៉ុន្តែវាក៏បានគិតគូរដល់ផ្នែកសុវត្ថិភាពផងដែរ។

ថ្មីៗនេះក្រុមហ៊ុន Mercedes បានបញ្ជាក់ថា កំពូលរថយន្ត Sedan ដ៏ទំនើប និងប្រណីតជំនាន់ថ្មីនេះ នឹងមានបំពាក់ពោងសុវត្ថិភាព សម្រាប់អ្នកដំណើរអង្គុយកៅអីខាងក្រោយ ដំបូងបង្អស់លើពិភពលោក។

ថ្វីបើមិនទាន់បានបញ្ចេញព័ត៌មានលម្អិតពេញលេញ ប៉ុន្តែក្រុមហ៊ុនរថយន្តអាល្លឺម៉ង់ខាងលើបានបញ្ជាក់ថា ពោងសុវត្ថិភាពកៅអីខាងក្រោយនេះ ត្រូវបានរចនាឡើងដើម្បីការពារអ្នកដំណើរ នៅក្នុងពេលគ្រោះថ្នាក់។

ពោងសុវត្ថិភាពនោះទំនងជាបានដាក់នៅខាងក្រោយកៅអីខាងមុខ ហើយវានឹងផ្ទុះឡើងនៅពេលជួបគ្រោះថ្នាក់។ មិនតែប៉ុណ្ណោះ ពោងសុវត្ថិភាពនោះទំនងជាមានរូបរាងជាអក្សរ U ដែលអាចការពារអ្នកដំណើរបានកាន់តែប្រសើរ៕

ផ្ទាំងផ្សាយពាណិជ្ជកម្ម

មកដឹងតម្លៃឡាន Sedan ប្រណីតខ្នាតតូចទាំង ១២ម៉ូដែល ល្អបំផុតប្រចាំឆ្នាំ២០២០

July 25, 2020

បច្ចុប្បន្ននេះរថយន្តប្រភេទ Sedan ប្រណីតខ្នាតតូច កំពុងតែទទួលបានការពេញនិយមយ៉ាងខ្លាំង ជាពិសេសពីសំណាក់អ្នកប្រើប្រាស់វ័យក្មេង ដោយសារតែការឌីហ្សាញលើរូបរាង ក៏ដូចជាភាពសន្សំសំចៃ និងការងាយស្រួលប្រើប្រាស់របស់វាផងដែរ។

ខាងក្រោមនេះគឺជារថយន្ត Sedan ប្រណីតខ្នាតតូចទាំង ១២ ម៉ូដែល ល្អបំផុតប្រចាំឆ្នាំ២០២០៖

Lexus IS មានតម្លៃចាប់ពី $39,585 ដល់ $47,735

Infiniti Q50 មានតម្លៃចាប់ពី $37,425 ដល់ $57,272

Jaguar XE មានតម្លៃចាប់ពី $40,895 ដល់ $47,290

Acura TLX មានតម្លៃចាប់ពី $34,025 ដល់ $45,950

Cadillac CT5 មានតម្លៃចាប់ពី $37,890 ដល់ $41,690

Volvo S60 មានតម្លៃចាប់ពី $36,050 ដល់ $64,800

BMW 3-Series មានតម្លៃចាប់ពី $41,745 ដល់ $56,995

Mercedes-Benz C-Class មានតម្លៃចាប់ពី $42,395 ដល់ $56,945

Alfa Romeo Giulia មានតម្លៃចាប់ពី $39,400 ដល់ $44,400

Audi A4 មានតម្លៃចាប់ពី $38,395 ដល់ $50,945

Tesla Model 3 មានតម្លៃចាប់ពី $37,990 ដល់ $54,990

Genesis G70 មានតម្លៃចាប់ពី $36,475 ដល់ $45,675

សូមបញ្ជាក់ថា តម្លៃខាងលើគឺជាតម្លៃនៅក្នុងទីផ្សារបរទេសប៉ុណ្ណោះ៕

ផ្ទាំងផ្សាយពាណិជ្ជកម្ម

មេ Tesla ទទួលស្គាល់ថា តម្លៃឡានរបស់ខ្លួនមិនទាន់ថោកសមរម្យឡើយ

July 24, 2020

CEO ក្រុមហ៊ុន Tesla លោក Elon Musk បានទទួលស្គាល់ថា រថយន្តរបស់ខ្លួនបច្ចុប្បន្នមានតម្លៃថ្លៃពេក ហើយបង្ហាញថាខ្លួនអាចនឹងចេញម៉ូដែលថ្មី ដែលមានរូបរាងតូច និងតម្លៃថោកជាងនេះ។

ខណៈពេលកំពុងនិយាយទៅកាន់អ្នកវិភាគ និងអ្នកវិនិយោគ ជុំវិញដំណើរការក្នុងត្រីមាសទី២ របស់ក្រុមហ៊ុន លោក Musk បាននិយាយថា តម្លៃខ្ពស់នៃរថយន្ត Tesla គឺជាអ្វីដែលត្រូវតែចាត់ការចេញ។

“វាគឺជារឿងសំខាន់ក្នុងការធ្វើឲ្យរថយន្តមានតម្លៃថោកសមរម្យ។ ខ្ញុំគិតថាយើងនឹងមិនជោគជ័យលើបេសកកម្មរបស់យើងឡើយ ប្រសិនបើយើងមិនធ្វើឲ្យរថយន្តមានតម្លៃថោកសមរម្យ”។

គួរឲ្យដឹងថា រថយន្ត Tesla Model 3 ដែលជាម៉ូដែលថោកបំផុតនោះ មានតម្លៃចាប់ពី ៣៧ ៩៩០ដុល្លារ នៅលើទីផ្សារសហរដ្ឋអាមេរិក។ ថ្វីបើវាមានតម្លៃសមរម្យ បើគិតលើដំណើរការ និងបច្ចេកវិទ្យាដែលមានលើរថយន្តនោះក្តី ប៉ុន្តែអ្នកប្រើប្រាស់ជាច្រើននៅតែគិតថាវាថ្លៃដដែល៕

ផ្ទាំងផ្សាយពាណិជ្ជកម្ម

មើលរាងគេផង! Hyundai Kona ប្រភេទ Night Edition ថ្មី លេងខ្លួនប៉ុណ្ណឹងម៉េចដែរ?

July 24, 2020

ក្រុមហ៊ុន Hyundai បានប្រកាសចេញរថយន្ត Kona ប្រភេទពិសេសថ្មីមួយហៅថា Kona Night Editoin សម្រាប់ស៊េរីឆ្នាំ២០២១។

SUV ខ្នាតតូច និងមានតម្លៃថោកបំផុតមួយរបស់ក្រុមហ៊ុនកូរ៉េខាងលើ នឹងចេញលក់ជាផ្លូវការនៅលើទីផ្សារសហរដ្ឋអាមេរិក នាខែកញ្ញាខាងមុខ ដោយក្នុងនោះមានបំពាក់មកជាមួយចង្កៀងមុខ LED, យ៉ាន់ RAYS ទំហំ ១៨អ៊ីញ និងតុបតែងខ្លួនពណ៌ខ្មៅមួយជុំតែម្តង។

Kona Night Editoin នេះនឹងផ្តល់ជម្រើសពណ៌ចំនួន ៣ គឺ ពណ៌ខ្មៅ Ultra Black ក៏ដូចជា ពណ៌ប្រផេះ Galactic Gray និង ពណ៌ស Chalk White ផងដែរ។ វាបំពាក់ម៉ាស៊ីនសាំងចំណុះ ១,៦លីត្រ turbocharged ទំហំ ៤ស៊ីឡាំង មានកម្លាំង ១៧៥សេះ ប្រើប្រអប់លេខអូតូ ៧វគ្គ ប្រភេទ dual-clutch និងមានជម្រើសប៉ុងពីរទៀតផង។

ក្រៅពីនោះ វាមានបំពាក់មុខងារជំនួយការបើកបរជាច្រើន រួមទាំង blind-spot collision warning, lane change assist និង lane keeping assist ផងដែរ៕

ផ្ទាំងផ្សាយពាណិជ្ជកម្ម

ឡាន Ford F-150 ឆ្នាំ ២០២១ បើរើសយក Full Option តម្លៃឡើងដល់ជាង ៨ម៉ឺនដុល្លារ

July 24, 2020

ពេលប្រកាសចេញរថយន្ត Ford F-150 ឆ្នាំ ២០២១ ក្រុមហ៊ុនមិនបានបង្ហាញអំពីតម្លៃលក់នោះទេ។ ប៉ុន្តែពេលនេះវិបសាយ Cars Direct ទទួលបានដំណឹងអំពីតម្លៃលក់នៃរថយន្ត F-150 ស៊េរីថ្មី ហើយបើរើសយក Full Option តែម្ដង តម្លៃអាចមានលើសពី ៨ម៉ឺនដុល្លារឯណោះ។

រថយន្ត Ford F-150 Limited 4×2 SuperCrew ដែលជា Option ខ្ពស់ជាងគេគឺមានតម្លៃចាប់ពី ៧២ ៥២០ដុល្លារ។ ប្រសិនបើបន្ថែមប្រព័ន្ធបើកបរប៉ុងពីរ (4WD) បន្ថែមទៀត តម្លៃឡើងដល់ ៧៥ ៩៤៥ដុល្លារ។ បើរើសយកម៉ាស៊ីន PowerBoost Hybrid ទៀតនោះ ត្រូវបន្ថែម ២៥០០ដុល្លារ ទៀត ដែលតម្លៃរបស់រថយន្តឡើងដល់ ៧៨ ៤៤៥ដុល្លារ។ នៅមិនទាន់អស់ ដោយអតិថិជនអាចរើសយកប្រដាប់ក្រាលឃ្លុបក្រោយនៃរថយន្តតម្លៃ ៥៩៥ដុល្លារ និងគម្របដែលមានតម្លៃ ៩៩៥ដុល្លារ ធ្វើឲ្យតម្លៃរថយន្តឡើងដល់ ៨ម៉ឺនដុល្លារឯណោះ។

គួរដឹងដែរថារថយន្ត Ford F-150 ឆ្នាំ ២០២១ គឺមានតម្លៃចាប់ពី ៣០ ៦៣៥ដុល្លារ ដែលជាតម្លៃសម្រាប់ប្រភេទ F-150 XL 4×2 Regular Cab ដែលតម្លៃនេះថ្លៃលើសស៊េរីឆ្នាំ ២០២០ ត្រឹម ១៩៥ដុល្លារប៉ុណ្ណោះ៕

ផ្ទាំងផ្សាយពាណិជ្ជកម្ម

Audi សង្ឃឹមថាចំនួនលក់នឹងវិលត្រឡប់ដូចដើមវិញ ក្នុងពេល ២ ឬ៣ឆ្នាំទៀត

July 24, 2020

លោក Markus Duesmann នាយកប្រតិបត្តិក្រុមហ៊ុន Audi បានប្រាប់ដល់កាសែតទស្សនាវដ្ដីអាល្លឺម៉ង់ថាចំនួនលក់របស់ក្រុមហ៊ុននឹងវិលត្រឡប់ដូចដើមវិញ (មុនពេលមិនទាន់មានកូវីដ១៩) ក្នុងពេល ២ ឬ ៣ឆ្នាំទៀត។

ក្រុមហ៊ុន Audi បានរំពឹងខ្ពស់លើរថយន្តអគ្គិសនីដែលមានតម្រូវការកើនឡើង ដោយមានការផ្ដល់ជាប្រាក់ជំនួយពីរដ្ឋាភិបាលលើរថយន្តអគ្គិសនី។ Audi សង្ឃឹមថានាឆ្នាំ ២០២០នេះ នឹងអាចលក់រថយន្តអគ្គិសនី e-tron បានខ្ទង់ ៤ម៉ឺនគ្រឿង ដោយក្នុងរយៈពេល ៦ខែដំបូង ក្រុមហ៊ុនអាចលក់ចេញរថយន្តនេះបាន ១៧ ០០០គ្រឿងរួចទៅហើយ។

ខណៈដែលរថយន្ត e-tron ជាម៉ូដែលសំខាន់មួយសម្រាប់ Audi លោក Duesmann បានទទួលស្គាល់ថាក្រុមហ៊ុន Tesla នៅតែមានការនាំមុខលើផ្នែកបច្ចេកវិទ្យាមួយចំនួន។ លោកបានសង្កត់ធ្ងន់ថានៅផ្នែកកុំព្យូទ័រ និងស្ថាបត្យកម្ម Software រួមជាមួយបច្ចេកវិទ្យាបើកបរស្វ័យប្រវត្តិ Audi នៅតែនាំមុខគេ៕

ផ្ទាំងផ្សាយពាណិជ្ជកម្ម

មកដឹងតម្លៃឡាន Toyota Venza ២០២១ ទើបប្រកាសចេញក្តៅៗ

July 23, 2020

ក្រុមហ៊ុន Toyota ទើបតែបានប្រកាសចេញរថយន្ត SUV ខ្នាតកណ្តាលម៉ូដែល Venza ស៊េរីឆ្នាំ២០២១ នៅសហរដ្ឋអាមេរិក បន្ទាប់ពីវាបានបាត់មុខអស់រយៈពេលជាច្រើនឆ្នាំ។

ឥឡូវនេះ រថយន្ត Toyota Venza ឆ្នាំ២០២១ នឹងចេញលក់ជាផ្លូវការនៅដើមខែកញ្ញា ជាមួយនឹងតម្លៃចាប់ពី ៣៣ ៦៤៥ដុល្លារ សម្រាប់ម៉ូដែល LE, ៣៧ ១៧៥ដុល្លារ សម្រាប់ម៉ូដែល XLE និង ៤០ ៩៧៥ដុល្លារ សម្រាប់ម៉ូដែល Limited។

រថយន្តតួខ្ពស់ដែលស្រដៀងទៅនឹងរថយន្ត Toyota Harrier ខាងលើ នឹងមានតែជម្រើសម៉ាស៊ីន Hybrid តែមួយគត់ ដោយគួបផ្សំរវាងម៉ាស៊ីនសាំងចំណុះ ២,៥លីត្រ ទំហំ ៤ស៊ីឡាំង និងម៉ូទ័រអគ្គិសនីចំនួន៣ ព្រមទាំងអាគុយ lithium-ion ជំនាន់ថ្មី ដែលបង្កើតកម្លាំងបានសរុប ២១៩សេះ។ Toyota រំពឹងថា រថយន្ត Venza ថ្មីនឹងមានកម្រិតស៊ីសាំងជាមធ្យមត្រឹមតែ ៦លីត្រ/១០០គីឡូម៉ែត្រ។

Toyota Venza មានបំពាក់ប្រព័ន្ធ Toyota Safety Sense មកស្តង់ដារ ដោយក្នុងនោះមានមុខងារដូចជា Pre-Collision System with Pedestrian and Bicycle Detection, Full-Speed Range Dynamic Radar Cruise Control, Lane Departure Alert with Steering Assist, Automatic High Beams, Lane Tracing Assist និង Road Sign Assist៕

ផ្ទាំងផ្សាយពាណិជ្ជកម្ម

ដឹងទីតាំង Tesla នឹងសង់រោងចក្រតម្លៃ ១ពាន់លានដុល្លារ សម្រាប់ផលិត Cybertruck ហើយ

July 23, 2020

ក្រុមហ៊ុន Tesla បានប្រកាសឲ្យដឹងថា រោងចក្រ Gigafactory ថ្មី និងធំបំផុតរបស់ខ្លួន នឹងមានទីតាំងស្ថិតនៅក្រៅទីក្រុង Austin រដ្ឋ Texas សហរដ្ឋអាមេរិក។

រោងចក្រថ្មីខាងលើនឹងមានទំហំ ៨១០ហិចតា ដែលលោក Elon Musk អះអាងថា នឹងបើកឲ្យសាធារណៈជនចូលទស្សនាផងដែរ។ អភិបាលរដ្ឋ Texas លោក Greg Abbott បានឲ្យដឹងថា រោងចក្រនោះនឹងបង្កើតការងារថ្មីយ៉ាងហោចណាស់ ៥ ០០០ការងារឯណោះ។

យោងតាមក្រុមហ៊ុន Tesla បានបង្ហាញថា រោងចក្រ Gigafactory ថ្មីតម្លៃ ១ពាន់លានដុល្លារខាងលើ នឹងត្រូវប្រើដើម្បីផលិតរថយន្តភីកអាប់អគ្គិសនី Cybertruck ក៏ដូចជា SUV អគ្គិសនី Model Y ព្រមទាំង Model 3 និង រថយន្តដឹកទំនិញអគ្គិសនីធន់ធំ ផងដែរ៕

ផ្ទាំងផ្សាយពាណិជ្ជកម្ម