[ទីផ្សារបរទេស] ក្នុងអំឡុងត្រីមាសទីមួយនៃឆ្នាំ២០២២នេះ Tesla ផលិតរថយន្តបានរហូតដល់ ៣០៥ ៤០៧គ្រឿង ខណៈដែលក្រុមហ៊ុនរថយន្តជាច្រើនបានប្រឈមមុខនឹងបញ្ហាផលិតដោយសារតែវិបត្តិនៃការខ្វះខាតគ្រឿងបន្លាស់។ ប៉ុន្តែពេលនេះដែរ Tesla កំពុងប្រឈមមុខនឹងបញ្ហាដូចគ្នា ដែលបានធ្វើឲ្យការផលិតចាប់ផ្ដើមមានការធ្លាក់ចុះគួរឲ្យកត់សម្គាល់។
នាយកផ្នែកហិរញ្ញវត្ថុនៅក្រុមហ៊ុន Tesla កាលពីម្សិលមិញបាននិយាយថា បញ្ហាក្នុងការផ្គត់ផ្គង់ពីដៃគូផ្គត់ផ្គង់មួយចំនួន រួមទាំងការបិទរោងចក្រនៅទីក្រុងសៀងហៃដោយសារការផ្ទុះជំងឺកូវីដ១៩រលកថ្មី បានធ្វើឲ្យការរីកចម្រើនផ្នែកផលិតកម្មរបស់ Tesla ជួបផលរំខាន។ ជាក់ស្ដែងក្នុងត្រីមាសទីមួយនៃឆ្នាំនេះ ជាការធ្លាក់ចុះនៃការផលិតលើកដំបូងសម្រាប់ Tesla ចាប់តាំងពីការឆ្លងជំងឺរាតត្បាតកើតមានឡើង។
ក្នុងនោះដែរ នាយកផ្នែកហរិញ្ញវត្ថុដែលមានឈ្មោះថា Zach Kirkhorn បានបញ្ជាក់ថា ៖ “យើងបានបាត់បង់ទំហំផលិតរយៈពេលមួយខែចេញពីរោងចក្រនៅទីក្រុងសៀងហៃ។ ការផលិតកំពុងត្រូវបានបន្តឡើងវិញនៅក្នុងកម្រិតតិចតួច ហើយពួកយើងកំពុងខិតខំធ្វើយ៉ាងណាអាចផលិតបានពេញលេញវិញឲ្យបានយ៉ាងលឿនតាមដែលអាចធ្វើទៅបាន។”
ដោយឡែក នាយកប្រតិបត្តិក្រុមហ៊ុនលោក Elon Musk ជឿជាក់ថាទំហំផលិតនៅក្នុងត្រីមាសទីពីរនៃឆ្នាំ២០២២នេះ ទំនងជាមិនមានការកើនឡើងឡើយបើធៀបនឹងត្រីមាសទីមួយ ប៉ុន្តែនៅរយៈពេល៦ខែចុងក្រោយនៃឆ្នាំ២០២២នេះអាចនឹងមានសញ្ញាវិជ្ជមានវិញ។ គួរដឹងថា Tesla ដាក់គោលដៅចង់ផលិតរថយន្តឲ្យបានលើសពី ១,៥លានគ្រឿង នៅឆ្នាំ២០២២នេះ ដែលមានន័យថាចាប់ពីខែមេសា ដល់ខែធ្នូ ត្រូវផលិតឲ្យបាន ១,២លានគ្រឿង៕
