ប្រទេសអាស៊ានមួយនេះ ដាក់លក់ Land Cruiser ស៊េរីឆ្នាំ២០២២ តម្លៃចាប់ពីជាង១០ម៉ឺនដុល្លារ

July 12, 2021

ប្រភពគួរឲ្យទុកចិត្តមួយបានប្រាប់អំពីតម្លៃនៃរថយន្ត Land Cruiser ជំនាន់ថ្មីនៅលើទីផ្សារប្រទេសហ្វីលីពីន ដែលរថយន្តនេះនឹងដាក់លក់នៅក្នុងអំឡុងចុងឆ្នាំ២០២១នេះ។

រថយន្ត Toyota Land Cruiser ស៊េរីឆ្នាំ២០២២ នឹងដាក់លក់នៅហ្វីលីពីនជាមួយជម្រើសពីរប្រភេទគឺ LC300 VX និង LC300 ZX ដែលទាំងពីរនេះគឺមានប្រើប្រាស់ម៉ាស៊ីន Twin-Turbo ចំណុះ ៣,៣លីត្រ ៦ស៊ីឡាំង អាចផលិតកម្លាំងបាន ៣០២សេះ និងប្រើប្រអប់លេខអូតូ១០វគ្គមកជាស្តង់ដារ។

តម្លៃរបស់ LC300 VX គឺប្រមាណ ១០៣ ០៥១ដុល្លារ ខណៈដែល LC300 ZX នឹងមានតម្លៃប្រមាណ ១១២ ៣៩៤ដុល្លារ។

គួរដឹងថាតម្លៃរបស់ Land Cruiser ជំនាន់ថ្មីនៅប្រទេសហ្វីលីពីន មានការឡើងថ្លៃប្រមាណ ៧០ម៉ឺនប៉េសូ (ប្រមាណ ១៤ ០០០ដុល្លារ) បើប្រៀបនឹងរថយន្ត Land Cruiser ជំនាន់មុន៕

ផ្ទាំងផ្សាយពាណិជ្ជកម្ម

ឡានអគ្គិសនីលក់ដាច់ជាងគេរបស់ចិន លក់ចេញមួយគ្រឿងចំណេញតែ ១៤ដុល្លារ

July 12, 2021

Hong Guang MINI EV គឺជារថយន្តអគ្គិសនីដែលលក់ដាច់បានច្រើនជាងគេលើទីផ្សារប្រទេសចិនកាលពីឆ្នាំ២០២០កន្លងទៅ ដែលវាជារថយន្តរួមសហការផលិតរវាងក្រុមហ៊ុន General Motors និងក្រុមហ៊ុន Wuling។

ចំណុចទាក់ទាញធំបំផុតរបស់រថយន្តអគ្គិសនីខ្នាតតូចនេះគឺតម្លៃរបស់វា ដែលមានតម្លៃប្រមាណជាង ៤ពាន់ដុល្លារប៉ុណ្ណោះ ហើយបើតាមការរាយការណ៍របស់ Xcar បានឲ្យដឹងថាលុយចំណេញពីរថយន្តគឺមានមិនច្រើនឡើយ។ របាយការណ៍បាននិយាយថាក្រុមហ៊ុន General Motors និង Wuling ចំណេញបាន ៨៩យ័ន (ប្រមាណ ១៣,៧៣ដុល្លារ) ពីរថយន្តមួយគ្រឿង។

ការព្យាករណ៍មួយចំនួនបានប៉ាន់ស្មានថារថយន្តអគ្គិសនីខ្នាតតូចនេះនឹងអាចលក់ចេញបានរហូតដល់ ៤០ម៉ឺនគ្រឿងនៅឆ្នាំ២០២១នេះ ដែលមានន័យថាក្រុមហ៊ុនទាំងពីរខាងលើនឹងទទួលបានប្រាក់ចំណេញប្រមាណជិត ៥,៥លានដុល្លារពីរថយន្តនេះ។

Hong Guang MINI EV មានបំពាក់ម៉ូទ័រដែលផលិតកម្លាំងបាន ១៧,៤សេះ និងមានជម្រើសអាគុយទំហំ ៩,២kWh ឬទំហំ ១៣,៨ kWh។ រថយន្តនេះអាចបើកបរបានចម្ងាយ ១២០គីឡូម៉ែត្រ ហើយចំពោះអាគុយធំអាចបើកបរបានចម្ងាយ ១៧០គីឡូម៉ែត្រផងដែរ៕

ផ្ទាំងផ្សាយពាណិជ្ជកម្ម

៥ ជំហានជួយឲ្យអាគុយរថយន្តប្រើប្រាស់បានយូរ | ចំណេះដឹងយានយន្ត

July 12, 2021

[ចំណេះដឹងយានយន្ត] អាគុយគឺជាផ្នែកមួយដ៏សំខាន់ផងដែរនៅក្នុងរថយន្តដែលតម្រូវឲ្យយើងត្រួតពិនិត្យវាឲ្យបានទៀងទាត់។អាគុយអាចនឹងមានគុណភាពចុះខ្សោយនៅពេលដែលទទួលរងនៅកម្តៅខ្លាំងដែលបណ្តាលឲ្យសារធាតុរាវនៅក្នុងអាគុយហួតបង្កឲ្យរចនាសម្ព័ន្ធផ្នែកខាងក្នុងនៃអាគុយមានការខូចខាត។

ដូចនេះហើយទើបយើងគួរតែពិនិត្យមើលអាគុយរថយន្តរបស់យើងឲ្យបានត្រឹមត្រូវនៅពេលរដូវផ្លាស់ប្តូរពីក្តៅទៅត្រជាក់ ឬប្រសិនបើយើងបើកបរនៅតំបន់ក្តៅខ្លាំង។ហេតុផលមួយទៀតដែលធ្វើឲ្យគុណភាពអាគុយចុះខ្សោយនោះគឺការសាកលើសកម្រិតដែលបណ្តាលមកពីសមាសធាតុណាមួយចំនួននៅក្នុងអាគុយដំណើរការមិនប្រក្រតី។ជាងនេះទៅទៀតនៅពេលដែលអាកាសធាតុត្រជាក់វាអាចបណ្តាលឲ្យកំហាប់ប្រេងម៉ាស៊ីនឡើងខ្ពស់ធ្វើឲ្យម៉ាស៊ីនត្រូវការកម្លាំងខ្លាំងដើម្បីដំណើរការហើយអាគុយក៏ធ្វើការខ្លាំងទៅតាមនឹងដែរ។ ដើម្បីថែរក្សាអាគុយឲ្យមានគុណភាពល្អមានអាយុកាលប្រើប្រាស់បានយូរ យើងគួរអនុវត្តតាមជំហានសាមញ្ញៗ ដូចខាងក្រោម៖

ជំហានទី១: នៅកំឡុងពេលសាកអាគុយ បងប្អូនត្រូវប្រាកដថាប្រព័ន្ធភ្លើងដែលសាកអាគុយស្ថិតក្នុងកម្រិតត្រឹមត្រូវ ដោយពុំត្រូវលើសកម្រិតនោះឡើយ។ ពីព្រោះការសាកលើសកម្រិតប្រព័ន្ធភ្លើងអាចធ្វើឲ្យអាគុយខូចលឿនជាងការសាកមិនគ្រប់កម្រិតទៅទៀត។

ជំហានទី២: ប្រសិនបើអាគុយនោះគឺជាប្រភេទអាគុយទឹក សូមបន្ថែមទឹកនៅក្នុងអាគុយឲ្យគ្រប់កម្រិត ប្រសិនបើចាំបាច់។

ជំហានទី៣: ប្រសិនបើត្រូវផ្លាស់ប្តូរអាគុយ សូមប្រើប្រាស់អាគុយដែលមានគុណភាពល្អ យ៉ាងហោចណាស់មានគុណភាពល្អដូចអាគុយដើមដែលរថយន្តបងប្អូនធ្លាប់ប្រើប្រាស់ ។

ជំហានទី៤: ត្រួតពិនិត្យអាគុយឲ្យបានឆាប់តាមដែលអាចធ្វើទៅបាន ប្រសិនបើយើងសង្កេតឃើញថាភ្លើងបំភ្លឺផ្លូវ និងភ្លើងនៅខាងក្នុងរថយន្តមានពន្លឺខ្សោយ ឬមិនអាចដំណើរការបាន ឬភ្លើង Check ឬភ្លើងរូបអាគុយលោតឡើងនៅក្នុងតាប្លូ។

ជំហានទី៥: សម្អាតផ្នែកខាងលើនៃអាគុយឲ្យស្អាតជានិច្ច។ ធូលីដីអាចបឺតយកថាមពលពីអាគុយធ្វើឲ្យអាគុយខូចគុណភាព។ វាក៏អាចក្លាយជាច្រេះស៊ីក្បាលអាគុយ ដែលក្លាយទៅជាអ៊ីសូឡង់រារាំងមិនឲ្យអាគុយមានដំណើរការធម្មតា៕

ផ្ទាំងផ្សាយពាណិជ្ជកម្ម

BMW ចេញម៉ូឌែលពិសេស X5 Black Vermillion Edition ផលិតត្រឹមចំនួន ៣៥០គ្រឿងប៉ុណ្ណោះ

July 12, 2021

ក្រុមហ៊ុនផលិតរថយន្តអាល្លឺម៉ង BMW បានធ្វើការបញ្ចេញនូវម៉ូឌែលពិសេសថ្មីនៃត្រកូល X5 ដែលមានឈ្មោះថា X5 Black Vermillion Edition ជាមួយការផលិតត្រឹមចំនួន ៣៥០គ្រឿងប៉ុណ្ណោះ ដោយក្នុងមួយគ្រឿងមានតម្លៃចាប់ពី ៨២ ៣០០ដុល្លារ។

រថយន្ត X5 Black Vermillion Edition ដំណើការដោយម៉ាស៊ីនចំណុះ ៣,០លីត្រ ទំហំ ៦ស៊ីឡាំង Turbocharged ផលិតកម្លាំងបាន ៣៣៥សេះ ភ្ជាប់ជាមួយប្រអប់លេខ ៨វគ្គអូតូ។

ភាពខុសប្លែកពីម៉ូឌែលធម្មតាលើរថយន្តនេះគឺវាទទួលបានការលេងពណ៌ទៅលើប៉ាណាខាងមុខជាមួយពណ៌ខ្មៅ លាយក្រហម រួមបន្ថែមជាមួយ អំពូលខាងមុខប្រភេទ Adaptive Full LED ជាមួយភ្លើងឡាស៊ែរពណ៌ខៀវ រចនាជារាងអក្សរ X ផងដែរ បន្ថែមជាមួយកញ្ចប់ M Sport Package រួមមានកាងមុខ និងកាងក្រោយកាន់តែទាក់ទាញ និងថាសកង់ទំហំ ២២អ៊ីញទទួលបានការបំពាក់ជាមួយពណ៌ក្រម៉ៅរលោង រួមជាមួយដុំហ្វ្រាំងពណ៌ក្រហម។

សម្រាប់ផ្នែកខាងក្នុង ទទួលបានការអាប់ដេតអោយកាន់តែប្រសើរបន្ថែមទៀតផងដែរ តួរយ៉ាង បានបំពាក់កៅអីស្បែក Merino Black Leather ពណ៌ខ្មៅ អមដោយថ្នេរដេរពណ៌ក្រហម ចំណែកកម្រាលទ្រាប់ជើង និងតាប្លូ ក៏បានប្រើប្រាស់ជាមួយពណ៌ខ្មៅដូចកៅអីផងដែរ រីឯ Console កណ្តាលបានភ្ជាប់ជាមួយឡូហ្គូ Black Vermillion Edition ផងដែរ។ សម្រាប់ប៊ូតុងបញ្ជា និងចង្កឹះលេខ គឺជាប្រភេទកាបូន, ប្រព័ន្ធសម្លេងប្រភេទ Harmon Kardon, បង្កូតមានមុខងារកម្តៅ និងមុខងារជំនួយការបើកបរ Premium and Parking Assistance Packages៕

ផ្ទាំងផ្សាយពាណិជ្ជកម្ម

ឡូយមែន! កូនឡានអគ្គិសនី XBUS មានរាងរហូតដល់ ៩បែប

July 12, 2021

កាលពីឆ្នាំមុនកន្លងទៅ ក្រុមហ៊ុន Electric Brands បានធ្វើការបង្ហាញចេញនូវរថយន្ត eBussy ក្នុងការ Render ប៉ុន្តែពេលនេះ ក្រុមហ៊ុនក៏បានបង្ហាញចេញនូវរថយន្តគំរូផ្ទាល់ ដែលមានឈ្មោះថា XBUS ដែលគ្រោងនឹងចេញលក់នៅលើទីផ្សារក្នុងឆ្នាំ ២០២២។

រថយន្តអគ្គិសនីខ្នាតតូចនេះមានប្រវែងសរុប ៣ ៦៤០ម.ម, ទទឹង ១ ៦០០ម.ម និងកម្ពស់ ១ ៩៤០ម.ម។ រថយន្តនេះអាចដឹកឥវ៉ាន់បានទម្ងន់ ៤៥០-៦០០គីឡូក្រាម ឬ ១ ០០០គីឡូក្រាម។

រថយន្ត XBUS ត្រូវបានផលិតឡើងដោយផ្អែកលើគ្រោងឆ្អឹង Modular ដែលរចនាបទរូបរាងខុសៗគ្នារហូតដល់ ១០។ បន្ថែមពីនេះ ក្រុមហ៊ុនបានអះអាងថាអាចប្តូររាងជារថយន្តដឹកអ្នកដំណើរ, Panel Van, Box Van, ភីកអាប់, Wagon ភីកអាប់, បើកដំបូល និងប្រភេទ Camping ផងដែរ។

រថយន្តនេះបំពាក់ជាមួយម៉ូទ័រអគ្គិសនីចំនួន ៤ ផលិតកម្លាំងបាន ៧៥សេះ កម្លាំងបង្វិល ១ ០០០ញ៉ូតុនម៉ែត្រ និងមានល្បឿនអតិបរមា ១០០គ.ម/ម៉។ សម្រាប់កញ្ចប់អាគុយទំហំ ១០គីឡូវ៉ាត់ម៉ោង អាចអោយរថយន្តបើកបរបានចម្ងាយ ២០០គីឡួម៉ែត្រ និងទំហំ ៣០គីឡូវ៉ាត់ម៉ោង ផ្គួបជាថាមពលស៊ូឡា(Solar) និងប្រព័ន្ធ Energy Recuperation អាចអោយរថយន្តបើកបរបានចម្ងាយ ៦០០គីឡួម៉ែត្រ។

រថយន្តនេះមានតម្លៃចាប់ពី ២១ ៤៣១ដុល្លារ ដល់ ៣៨ ៣៩២ដុល្លារ ហើយរថយន្តនេះនឹងចាប់ផ្តើមផលិតនៅពាក់កណ្តាលឆ្នាំ ២០២២ នៅឯរោងចក្រក្នុងប្រទេសអាល្លឺម៉ង់៕

ផ្ទាំងផ្សាយពាណិជ្ជកម្ម

ញាក់សាច់! ក្រុមហ៊ុនមួយនេះ តែងខ្លួនអោយ Honda Civic ក្លាយជា Lamborghini Aventador SVJ

July 12, 2021

ពិតជាមានការភ្ញាក់ផ្អើលបន្ទាប់ពីក្រុមហ៊ុនកែច្នៃនៃប្រទេសឥណ្ឌាដែលមានឈ្មោះថា Dream Customs India បានធ្វើការបង្ហាញចេញនូវរថយន្តរថយន្ត Aventador SVJ ដែលជារថយន្តទទួលបានការកែចេញពី Honda Civic។

យោងតាមការចុះផ្សាយ រថយន្តនេះត្រូវបានប្រើពេល ២៥ថ្ងៃ ដើម្បីសម្រេចបាន ជាមួយសិក្សាទៅលើរូបរាង និងប្រព័ន្ធ Aerodynamic bodykit ដើម្បីវាមានភាពដូចគ្នានឹងរថយន្ត Aventador SVJ។

ជាមួយការកែច្នៃនេះ វាទទួលបានការបំពាក់ជាមួយ Bodykit ដែលដូចគ្នានឹងរថយន្ត Aventador SVJ, ចង្កៀងប្រភេទ LED, ស៊ីម៉ាំងភ្លោះក្លែងក្លាយខាងក្រោយ និងស្លាប (Rear Wing)។ មិនត្រឹមតែប៉ុណ្ណោះ ផ្នែកខាងក្នុង Dream Customs India បានឌីស្សាញតាប្លូថ្មី ដែលទទួលគំនិតពីរថយន្ត Sant’Agata Supercar រួមជាមួយចង្កូតថ្មីរបស់យីហោ Lamborghini និងអេក្រង់ Touchscreen នៅចំកណ្តាលផងដែរ។

សម្រាប់រថយន្តដែលត្រូវបានកែច្នៃនេះ គឺជារថយន្ត Honda Civic ជំនាន់ទី ៨ ដែលផលិតឡើងកំឡុងឆ្នាំ ២០០៥ ដល់ ២០១២ បំពាក់ដោយម៉ាស៊ីនចំណុះ ២,០លីត្រ ទំហំ ៤ស៊ីឡាំង មានកម្លាំង ១៤១សេះ បើប្រៀបធៀបជាមួយ Lamborghini Aventador SVJ ដំណើការដោយម៉ាស៊ីន ៦,៥លីត្រ ទំហំ ១២ស៊ីឡាំង មានកម្លាំងរហូតដល់ ៧៥៨សេះឯណោះ។

គួរបញ្ជាក់ផងដែរថា នេះមិនមែនជាលើកដំបូងឡើយដែលក្រុមហ៊ុន Dream Customs India បានធ្វើការកែច្នៃអោយក្លាយជារថយន្ត Aventador តួរយ៉ាងកាលពីពេលកន្លងទៅ ក្រុមហ៊ុននេះក៏បានកែច្នៃរថយន្ត Honda Accord និង Honda Civic អោយក្លាយជារថយន្ត Aventador ពណ៌ទឹកក្រូចផងដែរ៕

ផ្ទាំងផ្សាយពាណិជ្ជកម្ម

តោះមកស្គាល់មុខងារថ្មីរបស់ម៉ូតូ Royal Enfield Meteor 350 ជាមួយនឹងលក្ខណៈពិសេសនៃ Tripper Navigation

July 12, 2021

នៅក្នុងយុគសម័យនៃការរុករកតាមរយៈផែនទីឌីជីថល វាហាក់ដូចជាចម្លែកដែលប្រព័ន្ធរុករកបច្ចុប្បន្ននៅក្នុងម៉ូតូភាគច្រើននៅតែពឹងផ្អែកលើវិធីបែបបុរាណដូចជាបង្រៀនមនុស្សថ្លង់តាមរយះភាសាកាយវិការ (Manual Method)។ ជារឿយៗអ្នកជិះម៉ូតូត្រូវទិញគ្រឿងបន្លាស់ GPS មួយទៀតដើម្បីទទួលបានការណែនាំនៅលើផ្ទាំងនាឡិកាស្ទង់។ក្នុងករណីខ្លះអ្នកជិះម៉ូតូ អាចកំណត់ទិសដៅបានត្រឹមតែនៅលើស្មាតហ្វូនរបស់ពួកគេតែប៉ុណ្ណោះ ដូច្នេះពួកគេត្រូវភ្ជាប់ទូរស័ព្ទទៅផ្ទៃម៉ូតូខាងមុខ ឬ ឈប់អែបកៀនផ្លូវសិន ដើម្បីមើលថាតើពួកគេកំពុងធ្វើដំណើរលើផ្លូវដែលត្រូវគោលដៅពួកគេចង់ទៅដល់ដែររឺទេ។ ចំពោះបញ្ហានេះ Royal Enfield បានផ្តល់នូវដំណោះស្រាយដ៏អស្ចារ្យ និងប្លែក សម្រាប់អ្នកជិះម៉ូតូទាំងអស់គ្នា!

បញ្ហាដែលបានរៀបរាប់ខាងលើ ត្រូវបានផ្លាស់ប្តូរនៅពេលដែល Royal Enfield ណែនាំបច្ចេកវិទ្យាត្រួសត្រាយផ្លូវដែលមានឈ្មោះថា Royal Enfield Tripper navigation នៅលើម៉ូឌែលចុងក្រោយរបស់ខ្លួនគឺ Meteor 350។ Royal Enfield Tripper ជាឧបករណ៍បង្ហាញផ្លូវ និងស្ទង់មើលទិសទី រួមទាំងទិសដៅ ក្នុងពេលវេលាជាក់ស្ដែង ដោយត្រូវបានបង្កើតឡើងភ្ជាប់ជាមួយនិង Google Maps។ ឧបករណ៍ Tripper នឹងបង្ហាញផ្លូវដែលល្អបំផុត ដើម្បីទៅដល់គោលដៅដោយប្រើ Google Maps វាស់ស្ទង់តាមរយៈកង់ម៉ូតូទាំងពីរ ដែលនេះជាលើកដំបូងហើយសម្រាប់ម៉ូតូដែលផលិតនៅប្រទេសឥណ្ឌា។ ដោយភ្ជាប់ជាមួយ Royal Enfield App ទៅនឹងស្មាតហ្វូនរបស់អ្នកបើកបរ ឧបករណ៍ Tripper គឺងាយស្រួលមែនទែន ដោយវាផ្តល់នូវព័ត៌មានដែលអ្នកត្រូវការបានច្បាស់លាស់ និងមានប្រសិទ្ធិភាព ក្នុងពេលដែលអ្នកត្រូវបង្កើនការប្រុងប្រយ័ត្នក្នុងពេលបើកបរ និងកាត់បន្ថយការជិះវង្វេងផ្លូវរឺខុសផ្លូវជាដើម។

Royal Enfield Tripper ផ្ដល់ជំនួយសម្រាប់ទិសដៅតាមពេលវេលាជាក់ស្ដែង ជួយឱ្យមានភាព ងាយស្រួលក្នុងការ រុករក ស្ទង់មើលទិសទី រួមទាំងទិសដៅ ដោយមិនរំខានដល់បទពិសោធន៍ជិះដែលងាយស្រួល និងរីករាយរបស់អ្នក។ Tripper ត្រូវបានចែកចេញពីរផ្នែក ដោយមួយផ្នែក គឺបង្ហាញនៅលើកុងទ័រម៉ូតូ និងមួយផ្នែកទៀតគឺនៅក្នុង Royal Enfield App លើទូរស័ព្ទស្មាតហ្វូនរបស់អ្នកជិះ។លោក Pawan Kakwani ប្រធានផ្នែកឌីជីថល និងវិភាគនៃ Royal Enfield បានមានប្រសាសន៍ថា៖ «កម្មវិធីនៅលើទូរស័ព្ទ ធានាថាការធ្វើរុករក និងស្ទង់មើលទិសទី នៅតែបន្តដំណើរការបើទោះបីជាអ្នកជិះម៉ូតូកំពុងឆ្លងកាត់តំបន់ដែលគ្មានបណ្ដាញសេវាក៏ដោយ។

Royal Enfield បានចំណាយពេលវេលា និងការខំប្រឹងប្រែងជាច្រើនដើម្បីធ្វើឱ្យឧបករណ៍វាស់ស្ទង់មួយនេះ ឱ្យមានលក្ខណៈសាមញ្ញ និងច្បាស់លាស់បំផុត ជាមួយនឹងការដាក់បញ្ចូលក្នុង Google Maps ក្នុងប្រទេស ឬតំបន់។ ជាមួយភាពច្បាស់លាស់ ឧបករណ៍នេះផ្តល់ឱ្យអ្នកជិះទាំងអស់នូវរាល់ព័ត៌មានដែលពួកគេត្រូវការ ដើម្បីធ្វើការសម្រេចចិត្តបានត្រឹមត្រូវក្នុងពេលដំណើរលើដងផ្លូវ។ ជាមួយគ្នានេះការ feedback ពីអ្នកជិះ ត្រូវបានយកទៅប្រើប្រាស់ក្នុងដំណាក់កាលនៃការបង្កើតឧបករណ៍ដែលជារបស់ខ្លួនឯង។ ជាលទ្ធផល Royal Enfield Tripper អាចផ្ទុកបានរហូតដល់ ២០ ទិសដៅនៃផ្លូវខុសៗគ្នា ដូច្នេះអ្នកជិះម៉ូតូអាចបង្កើតការធ្វើដំណើរបានយ៉ាងងាយស្រួល។

លោក Matthew Cardenas នាយកគ្រប់គ្រងការផលិត Tripper Navigation បានមាន ប្រសាសន៍ថា៖ « ឧបករណ៍ Tripper ត្រូវបានរចនាឡើងដើម្បីផ្តល់ទិសដៅងាយៗដូចជា បត់ឆ្វេង បត់ស្នាំ ឬរង្វង់មូល។ ប៉ុន្តែនៅពេលដែលអ្នកជិះជិតដល់ទិសដៅដែលបង្ហាញ នោះវានឹងចាប់ផ្ដើមលោតសញ្ញាព្រួញមក ដើម្បីឱ្យអ្នកដឹងថា កាន់តែខិតជិតដល់ទិសដៅនោះហើយ។ បន្ទាប់មកនៅពេលដែលមកដល់ទិសដៅនោះ វានឹងចាប់ផ្តើមបញ្ចេញពន្លឺភ្លែតៗជាសញ្ញា ដើម្បីទាញយកការចាប់អារម្មណ៍របស់អ្នក និងរំលឹកអ្នកថាអ្នកមានដំណើរទៅមុខទៀត ហើយនឹងទិសដៅដែលអ្នកត្រូវឆ្លងកាត់។ ដូច្នេះហើយ វាមិនមានការរំខាន និងបង្កភាពរញ៉េរញ៉ៃដល់អ្នកជិះ ធ្វើឱ្យវង្វេងនោះឡើយ។ វាគឺជា ឧបករណ៍វាស់ស្ទង់តាមរយៈកង់ម៉ូតូទាំងពីរដ៏ល្អបំផុត »។

ចាប់តាំងពី Tripper ភ្ជាប់ជាមួយនឹង Google Locations និង Google Places អ្នកជិះម៉ូតូរបស់ Royal Enfield អាចស្វែងរកទិសដៅណាមួយដែលល្អបំផុតនៅទូទាំងពិភពលោក។ ជាមួយគ្នានេះជិះ Meteor 350 ពួកគេពិតជាអាច “ចេញពីគន្លងផ្ទះរបស់ពួកគេ” ស្វែងរកតំបន់ ដោយមិនចាំបាច់ភ័យព្រួយខ្លាចវង្វេង។

លោក Vimal Sumbly ប្រធានអាជីវកម្ម APAC នៃ Royal Enfield មានប្រសាសន៍ថា៖ « Royal Enfield Tripper គឺជាភស្ដុតាងដែលបង្ហាញថា យើងនឹងមិនបញ្ឈប់ការច្នៃប្រឌិតដើម្បីបង្កើតបទពិសោធន៍ជិះកាន់តែប្រសើរសម្រាប់អ្នកជិះនៅជុំវិញពិភពលោកឡើយ។ យើងជឿជាក់ថាបច្ចេកវិទ្យានេះ នឹងក្លាយជាស្តង់ដារឧស្សាហកម្មថ្មី សម្រាប់ឧស្សាហកម្មយានយន្តជាពិសេសយានយន្តកង់ពីរ។ យើងសង្ឃឹមថា មុខងារនេះនឹងជម្រុញឱ្យអ្នកជិះចេញពីគន្លងរបស់ពួកគេ រីករាយនឹងការជិះដ៏រីករាយ និងងាយស្រួលជាមួយ Meteor 350 និងទទួលបទពិសោធន៍នៃការជិះម៉ូតូបែប Pure Motorcycling »។

Tripper មានភាពងាយស្រួលក្នុងការប្រើប្រាស់ណាស់ ដោយគ្រាន់តែអនុវត្តតាមជំហានខាងក្រោម៖

ភ្ជាប់ទៅកម្មវិធី Royal Enfield Tripper
បញ្ឆេះម៉ូតូ បន្ទាប់មកអ្នកនឹងមានលោតពាក្យថា logo Royal Enfield ចេញមកនៅលើអេក្រង់ហើយវានឹងអោយអ្នកដឹងថាវាកំពុងព្យាយាមភ្ជាប់ជាមួយទូរស័ព្ទរបស់អ្នកហើយ
ចុច “Connect to My Display”
ដាក់គោលដៅ/ទីកន្លែងដែលអ្នកចង់ទៅបន្ទាប់មកចុចពាក្យ “Navigate”

សម្រាប់ព័ត៌មានបន្ថែមសូមចូលមើលវីដេអូរមួយនេះ៖

#MissOutOnNothing #RoyalEnfield #PureMotorcycling #RidePure

អំពី Royal Enfield

យីហោម៉ូតូចាស់ជាងគេ ហើយនៅតែបន្តការផលិត គឺ Royal Enfield បានបង្កើតម៉ូតូច្នៃយ៉ាងស្រស់ស្អាតតាំងពីឆ្នាំ ១៩០១។ ពីប្រភពដើមរបស់អង់គ្លេសរោងចក្រផលិតត្រូវបានបង្កើតឡើងនៅ Madras នៅឆ្នាំ១៩៥៥ ជាកន្លែងឈរជើងដែល Royal Enfield នាំមុខការរីកចម្រើនក្នុងការជិះម៉ូតូធុនមធ្យមរបស់ឥណ្ឌា។ Royal Enfields កំពុងបញ្ចូលនូវភាពមិនស៊ាំញាំ អាចដំណើរការបានល្អ និងរីករាយក្នុងការជិះ ដែលជាម៉ូតូសម្រាប់ការរុករក និងការបញ្ចេញនូវគំនិតរបស់ខ្លួនឯង នេះជាវិធីសាស្រ្តមួយដែលយីហោហៅថា ការជិះម៉ូតូប្រាកដ។

ការដាក់បង្ហាញជួរដ៏ប្រណីតរបស់ Royal Enfield រួមបញ្ចូលទាំង Meteor 350 cruiser ស៊េរីថ្មីទាំងអស់, Interceptor 650 និង កូនភ្លោះ Continental GT 650 , ម៉ូតូផ្សងព្រេង Himalayan រួមទាំង Bullet 350 និង Classic 350 ។ អ្នកជិះម៉ូតូ និងអ្នកដែលនិយមចូលចិត្តម៉ូតូបែបនេះ នឹងទទួលបានការគាំទ្រយ៉ាងខ្លាំងពីព្រឹត្តិការណ៍គ្រប់កម្រិតទាំងថ្នាក់តំបន់ និងអន្តរជាតិ អ្វីដែលគួរអោយកត់សំគាល់បំផុតនោះ គឺការជិះម៉ូតូ ដែលជាការជួបជុំជារៀងរាល់ឆ្នាំរបស់មនុស្សរាប់ពាន់នាក់ដែលមានការចាប់អារម្មណ៍ពី Royal Enfield នៅ Goa និង Himalayan Odyssey ដែលធ្វើឡើងជាប្រចាំឆ្នាំនៅលើ ផ្លូវ ដី ដែលពិបាក និងឆ្លងកាត់ភ្នំខ្ពស់បំផុត។

ជាផ្នែកមួយនៃ Eicher Motors Limited, Royal Enfield ប្រតិបត្តិការតាមរយៈក្រុមហ៊ុនចែកចាយទ្រង់ទ្រាយធំ ៩២១ និងហាងលក់រាយ ៦៣៨ នៅតាមទីក្រុង និងទីប្រជុំជនធំៗ ទាំងអស់ក្នុងប្រទេសឥណ្ឌា និងនាំចេញទៅប្រទេសជាង ៦០ នៅជុំវិញពិភពលោក។ រោងចក្រផលិតបែបទំនើបទាំង ២ របស់ក្រុមហ៊ុននេះមានទីតាំងនៅ Oragadam និង Vallam Vadagal ជិត Chennai។ ហើយថ្មីៗនេះក្រុមហ៊ុន Royal Enfield បានវិនិយោគនៅក្នុងមជ្ឈមណ្ឌលបច្ចេកទេសលំដាប់ពិភពលោកចំនួន ២ គឺនៅទីក្រុង Bruntingthorpe ចក្រភពអង់គ្លេស និងទីក្រុង Chennai ប្រទេសឥណ្ឌា ហើយនៅឆ្នាំ២០២០ បានបើកអង្គភាពដំឡើងដំបូងនៅខាងក្រៅប្រទេសឥណ្ឌានៅ Buenos Aires ប្រទេសអាហ្សង់ទីន។ ជាមួយនឹងការកើនឡើងជាង ១៧% ពីមួយឆ្នាំទៅមួយឆ្នាំក្នុងរយៈពេល ៥ ឆ្នាំចុងក្រោយ ហើយការលក់នៅលើទីផ្សារអន្តរជាតិកើនឡើង ៩៦% ក្នុងឆ្នាំ២០១៩-២០២០ Royal Enfield គឺជាអ្នកនាំមុខគេនៅក្នុងទីផ្សារម៉ូតូខ្នាតមធ្យម៕

ផ្ទាំងផ្សាយពាណិជ្ជកម្ម

អត្ថប្រយោជន៍នៃការផ្លាស់ប្តូរតម្រងខ្យល់ (មានវីដេអូ)

July 11, 2021

[ចំណេះដឹងយានយន្ត] ជាធម្មតាបងប្អូនអ្នកប្រើប្រាស់រថយន្តភាគច្រើនមិនសូវចាប់អារម្មណ៍ចំពោះតម្រងខ្យល់នោះទេ ប៉ុន្តែធាតុពិតការផ្លាស់ប្តូរតម្រងខ្យល់ទៀងទាត់មានអត្ថប្រយោជន៍យ៉ាងច្រើនចំពោះម៉ាស៊ីនរថយន្តរបស់យើងទាំងអស់គ្នា ថ្ងៃនេះក្រុមការងារ Cambo Auto សូមលើកយកនូវអត្ថប្រយោជន៍នៃការផ្លាស់ប្តូរតម្រងខ្យល់ មកបង្ហាញជូនបងប្អូនទាំងអស់គ្នាអោយបានដឹង៖

ចំណុចទី១ បន្ថែមអាយុកាលម៉ាស៊ីន៖ ការផ្លាស់ប្តូរតម្រងខ្យល់ទៀងទាត់អាចជួយបង្កើនអាយុកាលម៉ាស៊ីនឲ្យប្រើប្រាស់បានយូរអង្វែង ដោយសារតម្រងខ្យល់ត្រូវបានផលិតឡើងដើម្បីច្រោះយក កំទេចដី និងសារធាតុកខ្វក់ ដែលអាចចូលមកបំផ្លាញផ្នែកផ្សេងៗនៃគ្រឿងម៉ាស៊ីនដូចជា ស៊ីឡាំង និងពីស្តុងជាដើម។

ចំណុចទី២ កាត់បន្ថយការកកស្ទះប្រព័ន្ធបញ្ចេញផ្សែង៖ តម្រងខ្យល់កកស្ទះអាចរារាំងលំហូរខ្យល់ចូលទៅកាន់ម៉ាស៊ីនដែលជាហេតុធ្វើឲ្យប្រព័ន្ធបញ្ចេញផ្សែងដំណើរការមិនបានត្រឹមត្រូវ ហើយថែម ទាំងបង្កបញ្ហាដល់ប៊ូហ្ស៊ីដែលនាំឲ្យសមត្ថភាពបើកបរចុះខ្សោយ។ យ៉ាងណាមិញប្រសិនបើលំហូរខ្យល់ចូលទៅម៉ាស៊ីនងាយស្រួលវានឹងធ្វើឲ្យម៉ាស៊ីនដំណើរការបានល្អ កាត់បន្ថយការ ស៊ីសាំង និងកាត់បន្ថយភាពរអាក់រអួលនៃប្រព័ន្ធបញ្ចេញផ្សែងផងដែរ។

ចំណុចទី៣ កាត់បន្ថយការស៊ីសាំង៖ តាមរយៈការសិក្សាបង្ហាញថាការផ្លាស់ប្តូរតម្រងកខ្វក់ចេញទៀងទាត់អាចជួយកាត់បន្ថយការស៊ីសាំងចំពោះរថយន្តថ្មី និងចាស់ ចំនួន ១៤ភាគរយ ពីព្រោះដីកខ្វក់នៅក្នុងតម្រងខ្យល់ធ្វើឲ្យរអាក់រអួលដល់ថាមពលបើកបរ។ជាក់ស្តែងតម្រងខ្យល់កខ្វក់បានកាត់បន្ថយថាមពលបង្កើនល្បឿនពី ៦ ទៅ ១១ ភាគរយចំពោះរថយន្តថ្មី។ វាពិតជាមានសារៈសំខាន់ណាស់ដែលអ្នកប្រើប្រាស់រថយន្តគ្រប់រូបគួរតែសម្អាតតម្រងខ្យល់ញឹកញាប់ដើម្បីឲ្យលំហូរខ្យល់ចូលទៅក្នុងម៉ាស៊ីនដំណើរការបានស្រួលជួយបង្កើនថាមពលខ្លាំងក្លា និងកាត់បន្ថយការស៊ីសាំង។

ចំណុចទី៤ ចំណាយតិច៖ តម្រងខ្យល់ងាយស្រួលផ្លាស់ប្តូរនិងមានតម្លៃធូរថ្លៃ។ ចំពោះតម្រងខ្យល់គួរតែផ្លាស់ប្តូរនៅរៀងរាល់ពេលបើកបរបានចម្ងាយពី១៩ ០០០គីឡូម៉ែត្រ ទៅ២៤ ០០០គីឡូម៉ែត្រ ដោយអាស្រ័យទៅតាមស្ថានភាពប្រើប្រាស់។ជាពិសេសមុនពេលដល់កំណត់ផ្លាស់ប្តូរគួរសម្អាតតម្រងខ្យល់ឲ្យបានញឹកញាប់ទើបប្រសើរ៕

ផ្ទាំងផ្សាយពាណិជ្ជកម្ម

៧ ករណីដែលធ្វើឲ្យរថយន្តស៊ីសាំងខុសធម្មតា | ចំណេះដឹងយានយន្ត

July 11, 2021

[ចំណេះដឹងយានយន្ត] អ្នកប្រើប្រាស់រថយន្តទូទៅតែងនិយាយថារថយន្តស៊ីសាំងខុសធម្មតា គឺដោយសារការប្រើប្រាស់រថយន្តចាស់ ឬដឹកទម្ងន់ធ្ងន់ៗជាដើម។ មិនខុសគ្នាប៉ុន្មាននោះឡើយ ប៉ុន្តែវានៅមានកត្តាផ្សេងមួយចំនួន ទៀតដែលម្ចាស់រថយន្តគ្រប់រូបមិនធ្លាប់គិតដល់ ហើយវាក៏បានក្លាយទៅជាហេតុផលចម្បងក្នុងការចាយវាយខ្ចះខ្ជាយទៅលើប្រេងឥន្ទនៈឥតប្រយោជន៍។ ដូចនេះបើសម្គាល់ឃើញថារថយន្ត របស់អ្នកស្រាប់តែស៊ីសាំងខុសធម្មតាសូមប្រមើលទៅលើចំណុចទាំងនេះ។
១. តម្រងខ្យល់កខ្វក់៖ ប្រសិនបើតម្រងខ្យល់កខ្វក់វានឹងធ្វើឲ្យម៉ាស៊ីនពិបាកបឺតស្រូបខ្យល់ចេញចូល និងបណ្តាលឲ្យស៊ីសាំងជាងមុន។ គួរឧស្សាហ៍ពិនិត្យនិងសម្អាតតម្រងខ្យល់ ហើយប្រសិនបើកខ្វក់ខ្លាំងគួរតែប្តូរថ្មីទើបប្រសើរ។

២. ទម្លាប់បើកបរកម្រោល៖ មិនថាតែរថយន្តទេសូម្បីម៉ូតូក៏ស៊ីសាំងដូចគ្នា ប្រសិនបើអ្នកបើកបរឆក់ៗជាន់ហ្គែរខ្លាំងៗ ឬបើកទាំងកម្រោល។ គួរទម្លាប់បើកបរតាមសម្រួល និងធ្វើអារម្មណ៍ឲ្យ ស្រស់ថ្លា ខណៈពេលបើកបរប្រសិនបើអ្នកមិនចង់ចាយវាយច្រើនទៅលើឥន្ធនៈ។

៣. Sensor ទឹកបញ្ចុះកំដៅដើរខុស៖ វាមានតួនាទីតាមដានទៅលើសីតុណ្ហភាពនៃទឹកបញ្ចុះកំដៅក្នុងម៉ាស៊ីនដែលកំពុងដំណើរការ។ ដូចនេះប្រសិនបើ Sensor ទឹកបញ្ចុះកំដៅដើរខុស និងបង្ហាញកម្រិតត្រជាក់ធ្លាក់ចុះខុសធម្មតាឬក៏បង្ហាញត្រជាក់ជានិច្ច មានន័យថាម៉ាស៊ីនគ្រប់គ្រងរថយន្តនៅតែបើកដំណើរការជាប់រហូតបណ្តាលឲ្យទាញយកប្រេងសាំងបន្ថែម។ អ្នកអាច ឆែកមើល Sensor ទឹកបញ្ចុះកំដៅតាមរយៈឧបករណ៍ស្កេន ហើយប្រសិនបើទទួលបានពី ១៨៥ ទៅ១៩៥ ដឺក្រេនោះ Sensor បញ្ចុះកំដៅគ្មានបញ្ហានោះទេ។

៤. ធូរកង់៖ ដើម្បីកុំឲ្យខ្ចះខ្ជាយទៅលើប្រេងសាំងអ្នកត្រូវឆែក និងសប់កង់ទាំងបួនឲ្យត្រូវទៅហ្នឹងខ្នាតសម្ពាធតាមប្រភេទរថយន្តនីមួយៗ ពីព្រោះនៅពេលសម្ពាធខ្យល់កង់ទាបវានឹងបង្កើន កម្លាំងទប់ទល់ការរអិលកាន់តែខ្លាំងដែលជាករណីធ្វើឲ្យម៉ាស៊ីនស៊ីសាំងជាងមុនចន្លោះពី ៥ ទៅ១០ភាគរយ។

៥. Sensor អុកស៊ីសែនចុះខ្សោយ៖ Sensor អុកស៊ីសែននៅលើរថយន្តមានតួនាទីពិនិត្យតាមដានទៅលើខ្យល់ និងប្រេងចម្រុះគ្នា។ ដូចនេះនៅពេលអស់អាយុកាលប្រើប្រាស់ Sensor អុកស៊ីសែននឹងចាប់ផ្តើមប្រែប្រួលទ្រុឌទ្រោមហើយធ្វើឲ្យម៉ាស៊ីនគ្រប់គ្រងរថយន្ត (engine computer)ទាញយកប្រេងឥន្ធនៈបន្ថែម។ លោកអ្នកអាចធ្វើការត្រួតពិនិត្យដោយប្រើឧបករណ៍ស្កេន ឬឧបករណ៍ឌីជីថល Storage oscilloscope ដើម្បីតេស្តមើលទៅលើការឆ្លើយតបរបស់ Sensor អុកស៊ីសែន។ ឬប្រសិនបើឡានរបស់អ្នកបើកបរបានចម្ងាយលើសពី ១៦ម៉ឺនគីឡូម៉ែត្រ គឺដល់ ពេលដែលអ្នកគួរតែផ្លាស់ប្តូរ Sensor ទឹកចេញម្តងទើបប្រសើរ។

៦. ផ្ទុករបស់ឥតប្រយោជន៍ច្រើនក្នុងគូថឡាន៖ នៅពេលរថយន្តធ្ងន់កាលណាម៉ាស៊ីនឡាននឹងប្រឹងបរទៅមុខខ្លាំងកាលនោះដែលជាហេតុធ្វើឲ្យស៊ីសាំងច្រើនផងដែរ។

៧. បើកបររថយន្តមិនបានដោះហ្វ្រាំងដៃ៖ រថយន្តនឹងស៊ីសាំងដូចគ្នានៅពេលដែលអ្នកបើកបរដោយមិនបានដោះហ្វ្រាំងដៃចេញឲ្យអស់ ពីព្រោះម៉ាស៊ីនឡាននឹងបញ្ចេញកម្លាំងប្រឹងអូស ទាញប្រៀបបីដូចផ្ទុកទម្ងន់ដ៏ធ្ងន់ដែរ៕

ផ្ទាំងផ្សាយពាណិជ្ជកម្ម

Tesla ចេញលក់ឡាន Model Y តម្លៃថោកជាងគេបំផុត សម្រាប់អតិថិជនចិន

July 10, 2021

Tesla បានបញ្ចេញរថយន្ត Model Y ប្រភេទថ្មី ដែលមានតម្លៃកាន់តែធូរថ្លៃជាងមុន សម្រាប់ទីផ្សារប្រទេសចិន។ រយៈចម្ងាយបើកបររបស់វាត្រូវបានកាត់បន្ថយ ប៉ុន្តែវានឹង Model Y ដែលធូរថ្លៃជាងគេបំផុត។

រថយន្ត Model Y ប្រភេទថ្មី បានផលិតឡើងដោយប្រើប្រាស់អាគុយផ្គត់ផ្គង់ដោយក្រុមហ៊ុន CATL ជាប្រភេទអាគុយដែលបើកបរមិនសូវបានឆ្ងាយ ប៉ុន្តែមានតម្លៃថោកក្នុងការផលិត បើប្រៀបធៀបនឹងអាគុយដែល Tesla ធ្លាប់ប្រើកន្លងមក។

Tesla Model Y ថ្មីនេះនឹងអាចបើកបរបានចម្ងាយ ៥២៥គីឡូម៉ែត្រ ខណៈដែលតម្លៃលក់របស់វាគឺប្រមាណ ៤២ ៥២៣ដុលល្លារ ដែលពីមុនរថយន្តម៉ូដែលនេះមានតម្លៃចាប់ពីប្រមាណ ៤៦ ៣០០ដុល្លារ។

គួរដឹងថាចំនួនលក់របស់ Tesla នៅទីផ្សារប្រទេសចិនកាលពីខែឧសភា បានរងផលប៉ះពាល់ខ្លាំងដោយសារពាក្យរិះគន់មួយចំនួនទាក់ទងនឹងចំណាត់ការរបស់ Tesla ជុំវិញបញ្ហាហ្វ្រាំងលើរថយន្តដែលខ្លួនបានលក់។ ប៉ុន្តែមើលទៅការលក់កំពុងតែប្រែមកជាល្អប្រសើរវិញ ដោយក្រុមហ៊ុនអាចលក់រថយន្តបានចំនួន ២៨ ១៣៨គ្រឿង កាលពីខែមិថុនា ខណៈដែលខែឧសភាលក់បាន ២១ ៩៣៦គ្រឿង៕

ផ្ទាំងផ្សាយពាណិជ្ជកម្ម