ប្រទេសហ្វីលីពីនតែងតែមានរឿងរាវគួរអោយភ្ញាក់ផ្អើល ជាពិសេសរឿងកម្ទេចឡានចោល។ ឥឡូវនេះ វាបានកើតឡើងម្តងទៀតហើយ នៅឯការិយាល័យគយរបស់ប្រទេសហ្វីលីពីន បានធ្វើការបំផ្លាញយានយន្តចំនួន ២១ គ្រឿងដែលមានតម្លៃប្រមាណជា ១,២ លានដុល្លារចោល។ រថយន្តដែលត្រូវបានកម្ទេចចោលនោះរួមមាន McLaren 620R, Bentley Flying Spur, Porsche 911, Mercedes SLK, Lotus Elise, រថយន្តកែច្នៃ Hyundai Genesis ប្រភេទ coupe, Toyota Solara និងរថយន្ត Mitsubishi Jeep ចំនួន ១៤ ផ្សេងគ្រឿងទៀត។
យោងតាមការិយាល័យគយ យានយន្តទាំងនោះត្រូវបាននាំចូលទៅប្រទេសហ្វីលីពីនដោយពួករត់ពន្ធរថយន្តខុសច្បាប់ផ្សេងៗគ្នា និងត្រូវបានរឹបអូសពីឆ្នាំ ២០១៨ ដល់ឆ្នាំ ២០២០ ។ ការបំផ្លាញយានយន្តរត់ពន្ធទាំងនេះ គឺដើម្បីផ្ញើសារដ៏មុតមាំថារដ្ឋាភិបាលពិតជាយកចិត្តទុកដាក់ខ្ពស់ក្នុងការប្រឆាំងលើការរត់ពន្ធខុសច្បាប់។ ការបំផ្លាញចុងក្រោយគឺជា“ សកម្មភាពថ្កោលទោស” ជាលើកទី ២ របស់រដ្ឋាភិបាលក្នុងឆ្នាំនេះ ខណៈដែលការិយាល័យគយបានបំផ្លាញយានយន្តចំនួន ១៧ គ្រឿងនៅថ្ងៃទី៩ ខែកុម្ភៈកន្លងទៅ។ ព្រឹត្តិការណ៍ទាំងនេះគឺបានកើតឡើងជាប្រចាំ នៅក្នុងប្រទេសហ្វីលីពីនហើយយើងបាននិយាយអំពីរឿងនេះជាច្រើនដងរួចមកហើយ។
ក្នុងចំណោមរថយន្តដែលបានកម្ទេចមុនៗ មានរថយន្តម៉ាក BMW Z1, Ferrari 360 Spider, Lamborghini Gallardo, Renault 5 Turbo, Opel Manta, Maserati Quattroporte, Mercedes SL55 AMG និងរថយន្តជាច្រើនទៀត។ ប្រតិកម្មចំពោះការបំផ្លាញចុងក្រោយបំផុត នៅពេលដែលមនុស្សជាច្រើនបានចោទសួរថាហេតុអ្វីបានជារដ្ឋាភិបាលមិនដាក់រថយន្តទាំងនោះដេញថ្លៃ រួចប្រើប្រាស់ថវិកាសម្រាប់អ្វីដែលមានអត្ថន័យជាងការកម្ទេចទៅ ប៉ុន្តែការិយាល័យគយ បានឆ្លើយតបថានេះជាសារដ៏មុតស្រួចដើម្បីប្រឆាំងនឹងពួកអ្នករត់ពន្ធយានយន្តខុសច្បាប់។
វីដេអូខាងក្រោម៖
