ឡាន Toyota Corolla Cross លក់នៅវៀតណាម តម្លៃមិនខុសពីនៅថៃប៉ុន្មានឡើយ

August 5, 2020

ក្រុមហ៊ុន Toyota បានបញ្ចេញលក់រថយន្ត Corolla Cross ជាផ្លូវការនៅប្រទេសវៀតណាម ក្រោយពីបានប្រកាសចេញលក់នៅប្រទេសថៃបានមិនដល់មួយខែផង។

រថយន្តដែលដាក់លក់នៅវៀតណាម មានចំនួនបីប្រភេទ ដែលក្នុងនោះមានប្រភេទ 1.8G ប្រភេទ 1.8V និងប្រភេទ 1.8HV។ ប្រភេទ 1.8G និង 1.8V មានប្រើប្រាស់ម៉ាស៊ីន ១,៨លីត្រ ៤ស៊ីឡាំង ដែលផលិតកម្លាំងបាន ១៣៨សេះ។ ចំណែក 1.8HV វិញមានបំពាក់ម៉ាស៊ីន Hybrid ដោយម៉ាស៊ីនសាំង ១,៨លីត្រ ផលិតកម្លាំងបាន ៩៧សេះ ហើយមានម៉ូទ័រអគ្គិសនីដែលផលិតកម្លាំងបាន ៧២សេះ។

រថយន្ត Corolla Cross ប្រភេទ 1.8V និង 1.8HV នឹងដាក់លក់នៅវៀតណាមចាប់ពីថ្ងៃទី១៥ ខែសីហា ដោយប្រភេទ 1.8V មានតម្លៃប្រមាណ ៣៥ ៤៤៤ដុល្លារ និងប្រភេទ 1.8HV មានតម្លៃប្រមាណ ៣៩ ៣៣០ដុល្លារ។ ចំពោះប្រភេទ 1.8G មានតម្លៃប្រមាណ ៣១ ១១៨ដុល្លារ រំពឹងថានឹងលក់នៅក្នុងខែកញ្ញា។ តម្លៃរបស់ Corolla Cross នៅវៀតណាមហាក់មិនខុសពីប្រទេសថៃប៉ុន្មានឡើយ ដែលនៅថៃមានតម្លៃចន្លោះពីប្រមាណ ៣០ ៩៣២ដុល្លារ ទៅប្រមាណ ៣៨ ៦៧៧ដុល្លារ៕

ផ្ទាំងផ្សាយពាណិជ្ជកម្ម

ឡាន Ford F-150 Raptor ឆ្នាំ ២០២១ បង្ហាញរូបរាងជាលើកដំបូង

August 5, 2020

Ford បានបង្ហាញចេញរថយន្ត F-150 ស៊េរីឆ្នាំ ២០២១ កាលពីខែមិថុនាកន្លងទៅនេះ ហើយពេលនេះរថយន្ត F-150 Raptor ស៊េរីថ្មីចាប់ផ្ដើមបង្ហាញរូបរាងជាបណ្ដើរៗហើយ។

ការរចនានៃរូបរាងរថយន្ត F-150 Raptor ស៊េរីឆ្នាំ ២០២១ មិនមានបង្ហាញច្រើននោះទេ ដោយមានការបិទបាំងឡើងជិត ពេលដែលវាបើកបរសាកល្បងនៅលើដងផ្លូវ។ មើលទៅទ្រង់ទ្រាយរថយន្តទាំងមូលមិនមានផ្លាស់ប្ដូរខុសពីស៊េរីបច្ចុប្បន្នឡើយ ប៉ុន្តែការឌីហ្សាញនឹងមានការផ្លាស់ប្ដូរបន្តិចបន្តួច។

ត្បិតថាគេមិនអាចថតបានរូបរាងខាងក្នុងរបស់រថយន្តមែន ប៉ុន្តែវាទំនងជាមានគ្រឿងបរិក្ខារដូចជាប្រភេទធម្មតាដែរ ដែលមានន័យថានឹងមានកុងទ័រឌីជីថលទំហំ ១២អ៊ីញ និងអេក្រង់កម្សាន្តទំហំ ១២អ៊ីញ។ ចំពោះម៉ាស៊ីនវិញ វាទំនងជាបំពាក់ដោយម៉ាស៊ីន Twin-Turbo ចំណុះ ៣,៥លីត្រ ៦ស៊ីឡាំង ដែលបញ្ចេញកម្លាំងបាន ៤៥០សេះ៕

ផ្ទាំងផ្សាយពាណិជ្ជកម្ម

តោះមកដឹង ៦ ចំណុចផ្លាស់ប្តូរថ្មីនៅលើរថយន្ត Ford Everest ២,០លីត្រ Bi-Turbo ជំនាន់ថ្មី

August 5, 2020

Ford Everest គឺជាប្រភេទរថយន្ត SUV ខ្នាតធំដែលជាកូនកាត់រវាង SUV នឹងរថយន្ត Pick Up Ranger ដែលផ្នែកខាងមុខ និងប្រព័ន្ធជើងក្រោមហាប់ណែនដូចទៅនឹងរថយន្ត Ranger ដែរ។ ដោយសារតែវាមាន DNA រួមជាមួយរថយន្ត Ford Ranger ហេតុនេះហើយទើបធ្វើអោយរថយន្ត SUV មួយនេះអាចបើកបរបានគ្រប់ស្ថានភាពផ្លូវមិនចាញ់ថយន្ត Pick Up នោះឡើយ។ រថយន្តនេះមានវត្តមាននៅលើទីផ្សារប្រទេសកម្ពុជាអស់រយះពេលជាង ១០ ឆ្នាំមកហើយ និងត្រូវបានទទួលស្គាល់ពីគុណភាព សុវត្ថិភាព បច្ចេកវិទ្យា និងភាពធន់រឹងមាំពីសំណាក់អតិថិជន ហេតុនេះហើយទើបធ្វើអោយរថយន្ត Ford Everest មានឈ្មោះបោះសម្លេងរហូតមកដល់សព្វថ្ងៃនេះ។ មានចម្ងល់ជាច្រើនដែលបានសាកសួរមកកាន់ក្រុមហ៊ុន Ford ថាតើពេលណារថយន្តនេះមានការផ្លាស់ប្តូរបច្ចេកវិទ្យា និងប្រព័ន្ធសុវត្ថិភាពថ្មី ហើយការទន្ទឹងរង់ចាំរបស់អតិថិជន Ford បានមកដល់ហើយ! នោះគឺ រថយន្ត Ford Everest ២,០លីត្រ Bi-Turbo ជំនាន់ថ្មី ដែលជារថយន្ត SUV ប្រណិត ដែលបំពាក់ជាមួយនឹងម៉ាស៊ីនជំនាន់ចុងក្រោយគឺម៉ាស៊ីន ២,០លីត្រ Bi-Turbo បូករួមជាមួយនឹងបច្ចេកវិទ្យាថ្មីៗជាច្រើនទៀត។

ក្រុមហ៊ុន អ អិម អេ ខេមបូឌាដែលជាក្រុមហ៊ុននាំចូល និងចែកចាយផ្ដាច់មុខនូវរថយន្ត Ford គ្រប់ប្រភេទក្នុងទីផ្សារប្រទេសកម្ពុជាបាននាំចូលរថយន្ត Ford Everest ២,០លីត្រ Bi-Turbo ជាមួយនឹងតម្លៃពិសេសត្រឹមតែ ៦៩ ៩០០ដុល្លារប៉ុណ្ណោះ។ រថយន្តប្រណិតមួយនេះបានភ្ជាប់មកជាមួយនឹងចំណុចផ្លាស់ប្តូរថ្មីពិសេស 6 យ៉ាងនោះគឺ៖

១. រថយន្តនេះបានបំពាក់នូវម៉ាស៊ីនជំនាន់ថ្មី ២,០លីត្រ Bi-Turbo ដែលមានកម្លាំងសេសរហូតដល់ទៅ ២១៣ PS និងកម្លាំងរមួល ៥០០ Nm ដែលមានកម្លាំងខ្លាំងស៊ីប្រេងតិច

២. ប្រអប់លេខ ១០លេខអូតូ ដែលធ្វើអោយការបើកបររបស់លោកអ្នកមានភាពរលូនជាងមុន

៣. ចំណុចដែលអតិថជនកំពុងតែទន្ទឹងរង់ចាំយូរណាស់ហើយនោះគឺ Push Button Start/ Smart Key ដែលងាយស្រួលដល់អតិថជនអាចបញ្ឆេះរថយន្តដោយគ្រាន់តែចុចប៊ូតុង Engine Start/Stop ព្រមទាំងចេញចូលរថយន្តដោយគ្រាន់តែយកដៃទៅស៊កនឹងប្រលោះទ្វារ នោះវានឹងដោះសោរ (Unlock) ដោយស្វ័យប្រវត្តិ ហើយលោកអ្នកគ្រាន់តែចុចសេនសឺនៅលើដៃទ្វារដើម្បីធ្វើការចាក់សោរ (Lock) ជាការស្រេច

៤. ផ្នែកខាងក្នុងនៃរថយន្តបានរចនាឡើងជាមួយនឹងពូកស្បែកបែបប្រណិតពណ៍ការ៉ុត ដែលជាពណ៍កំពុងពេញនិយមបំផុតសម្រាប់រថយន្តប្រណិតៗមួយចំនួន

៥. បច្ចេកវិទ្យា SYNC 3 ជំនាន់ថ្មីអមជាមួយនឹងអេក្រង់ Touch Screen ៨ អុីញដែលផ្តល់នូវរូបភាពច្បាស់ល្អនិងមានភាពរស់រវើកជាង

៦. ចំណុចពិសេសចុងក្រោយដែលទាក់ទាញនិងផ្តល់នូវភាពឆ្លាតវៃ ដែលរថយន្ត SUV ដែលជាដៃគូប្រកួតប្រជែងរបស់រថយន្ត Everest ២,០លីត្រ មិនមាននោះគឺ បច្ចេកវិទ្យា Hands-Free Lift Gate ដោយលោកអ្នកអាចធ្វើការបើក និងបិទឃ្លុបក្រោយដោយគ្រាន់តែគ្រវាសជើង។

ចំពោះរថយន្ត Ford Everest ២,០លីត្រ Bi-Turbo ដែលនាំចូលជាផ្លូវការដោយក្រុមហ៊ុន អ អិម អេ ខេមបូឌា ក៏មានផ្ដល់នូវជម្រើសព៌ណជាច្រើនសំរាប់អតិថិជនជ្រើសរើសដែលរួមមានដូចជា ពណ៍ស ទឹកប្រាក់ ទឹកមាស ប្រផេះ និងខ្មៅផងដែរ។ រាល់ការទិញរថយន្តពីក្រុមហ៊ុន នោះលោកអ្នកនឹងទទួលបានការធានាផ្ទាល់ពីរោងចក្ររយះពេល ៣ឆ្នាំ ឬ ១០ម៉ឺនគីឡូម៉ែត្រ ជាពិសេសមានសេវាជួសជុលរថយន្តចល័ត ២៤ម៉ោងទូទាំងប្រទេស សេវាយករថយន្តចាស់មកផ្លាស់ប្តូររថយន្តថ្មី (Trade-In Service) និងសេវាបង់រំលស់គ្រប់ខេត្តក្រុងប្រកបដោយទំនុកចិត្ត។

កាន់តែអស្ចារ្យនោះគឺ លោកអ្នកទិញរថយន្ត Everest ២,០លីត្រ Bi-Turbo នៅថ្ងៃនេះជាមួយតម្លៃពិសេសត្រឹមតែ ៦៩ ៩០០ដុល្លារ ប៉ុណ្ណោះ និងមានក្នុងស្តុកស្រាប់មិនចាំបាច់រង់ចាំ លើសពីនេះទៅទៀតលោកអ្នកនឹងទទួលបានសន្លឹកឆ្នោត១សន្លឹក ដែលមានឪកាសឈ្នះរថយន្ត Ford Ecosport ថ្មីស្រឡាង១គ្រឿង ឬ ទទួលបានមាសដ៏ច្រើនសន្ធឹកសន្ធាប់ ដែលការចាប់ឆ្នោតនេះនឹងប្រព្រឹត្តឡើងនៅក្នុងកម្មវីធីសម្ពោធជាផ្លូវការនៃរថយន្តនេះផងដែរ។

ផ្ទាំងផ្សាយពាណិជ្ជកម្ម

Audi លុបរូបពាណិជ្ជកម្មឡានមាន “ក្មេងស្រីឈរកាន់ចេកញ៉ាំ” ចេញ

August 5, 2020

រូបភាពផ្សាយពាណិជ្ជកម្មរបស់ក្រុមហ៊ុន Audi មួយផ្ទាំង កំពុងទទួលបានការរិះគន់ និងជជែកវែកញែកគ្នាយ៉ាងខ្លាំង។

រូបភាពពាណិជ្ជកម្មដែលបានបង្ហោះកាលពីថ្ងៃអាទិត្យ នៅលើបណ្តាញសង្គម Twitter ខាងលើ បង្ហាញឲ្យឃើញ ក្មេងស្រីម្នាក់កំពុងឈរផ្អែកលើប៉ាណាមុខ នៃរថយន្ត Audi RS4 Avant ខណៈក្នុងដៃនាងមានកាន់ចេកមួយផ្លែ។ រូបនោះក៏បានភ្ជាប់ជាមួយនឹងសារសរសេរថា “Lets your heart beat faster – in every aspect.” ដែលមានន័យថា “អនុញ្ញាតឲ្យបេះដូងរបស់អ្នកលោតញាប់ជាងមុន គ្រប់ទិដ្ឋភាពទាំងអស់”

ស្របពេលដែលរូបពាណិជ្ជកម្មនោះហាក់បីដូចជាមិនមានអ្វីប៉ះពាល់សោះ អ្នកនិយមប្រើបណ្តាញសង្គមមួយចំនួនអះអាងថា វាហាក់បីដូចជាការបង្ហាញពីន័យទាក់ទងនឹងផ្លូវភេទ ខណៈអ្នកខ្លះទៀតនិយាយថា ការឲ្យក្មេងឈរបែបនេះ អាចនឹងត្រូវគ្រោះថ្នាក់យ៉ាងងាយ បើអ្នកបើកបរមិនប្រុងប្រយ័ត្ន។

យ៉ាងណាមិញ ខាងក្រុមហ៊ុន Audi ក៏បានចេញមុខបកស្រាយវិញថា ដោយសារតែ RS4 Avant ជារថយន្តលក្ខណៈគ្រួសារ ដូច្នេះហើយទើបពួកគេបង្ហាញសមាជិកក្នុងគ្រួសារផ្សេងៗគ្នា នៅក្នុងរូបភាពផ្សាយពាណិជ្ជកម្មនោះ៕

ផ្ទាំងផ្សាយពាណិជ្ជកម្ម

Toyota Yaris ប្រភេទ Hybrid ថ្មី ជិះ១០០គ.ម៉ ស៊ីសាំងតែ៣,៧លីត្រ

August 5, 2020

ក្រុមហ៊ុន Toyota បានបញ្ចេញរថយន្ត Yaris ប្រើម៉ាស៊ីន Hybrid ថ្មីជាផ្លូវការ នៅលើទីផ្សារអឺរ៉ុប។ Yaris ឆ្នាំ២០២០ ថ្មីនេះ គឺជារថយន្តដំបូងបង្អស់របស់ Toyota ដែលប្រើគ្រោងឆ្អឹង GA-B នៃត្រកូល TNGA ដែលជួយដល់ការបើកបរ និងភាពរឹងមាំរបស់រថយន្តផងដែរ។

Yaris Hybrid ថ្មី បំពាក់ម៉ាស៊ីន Self-charing Hybrid ជំនាន់ទី៤ របស់ Toyota ដែលគួបផ្សំម៉ាស៊ីនសាំងចំណុះ ១,៥លីត្រ ទំហំ ៣ស៊ីឡាំង ប្រភេទ Dynamic Force ជាមួយម៉ូទ័រអគ្គិសនី២ និងកញ្ចប់អាគុយ Hybrid មួយ ដែលបង្កើតកម្លាំងបានសរុប ១១៤សេះ។ ថ្វីបើមានកម្លាំងខ្លាំងជាងមុន ១៥សេះ ប៉ុន្តែ Yaris Hybrid ថ្មី ជួយសន្សំសំចៃសាំងរហូតដល់ទៅ ២០% ដោយមានកម្រិតស៊ីសាំងជាមធ្យមត្រឹមតែ ៣,៧លីត្រ/១០០គីឡូម៉ែត្រ ប៉ុណ្ណោះ។

រថយន្ត Yaris Hybrid នេះក៏មានបំពាក់មុខងារ Android Auto និង Apple CarPlay, កុងទ័របាញ់លើកញ្ចក់, កន្លែងសាកថ្មទូរសព្ទឥតខ្សែ, Speaker JBL ៨គ្រាប់, ដៃចង្កូតមានមុខងារកម្តៅ, ចង្កៀង LED ព្រមទាំងប្រព័ន្ធសុវត្ថិភាព Toyota Safety Sense ដែលក្នុងនោះរួមមានមុខងារ ដូចជា Pre-Collision System with Vehicle Detection, Pedestrian Detection, Cyclist Detection, Intelligent Adaptive Cruise Control និង Road Sign Assist ជាដើម៕

ផ្ទាំងផ្សាយពាណិជ្ជកម្ម

មើលឡានតម្លៃថ្លៃបំផុតរបស់ក្រុមហ៊ុនរថយន្តវៀតណាម

August 4, 2020

រថយន្ត Vinfast President គឺជារថយន្តដែលមានតម្លៃថ្លៃជាងគេបំផុតរបស់ម៉ាកយីហោរថយន្តវៀតណាម Vinfast ដែលវានឹងបង្ហាញមុខជាផ្លូវការនាអំឡុងខែកញ្ញាខាងមុខ ដែលអាចមានតម្លៃលក់ចន្លោះពី ៦ ទៅ ៧ពាន់លានដុង (ប្រមាណ ២៥,៨ម៉ឺន ទៅ ៣០ម៉ឺនដុល្លារ)។

រថយន្ត Vinfast President នេះមានរូបរាងស្រដៀងនឹងរថយន្ត Lux SA2.0 របស់ Vinfast ដែលបានចេញលក់លើទីផ្សារកន្លងមកដែរ ប៉ុន្តែវាមានទំហំធំតូច ហើយមានបំពាក់ដោយម៉ាស៊ីនកម្លាំងខ្លាំងជាងផងដែរ។ ម៉ាស៊ីនរបស់វាទំនងជាម៉ាស៊ីន Turbocharged ចំណុះ ៦,២លីត្រ របស់ក្រុមហ៊ុន General Motors ដូចនឹងម៉ាស៊ីនដែលបានបំពាក់លើរថយន្ត Lux V8 ដែរ។

រថយន្តនេះទំនងជានឹងជាគូប្រជែងរបស់រថយន្ត SUV ប្រណីតៗដូចជា Lexus LX570 ឬ BMW X7។ នេះបើផ្អែកតាមតម្លៃរំពឹងទុករបស់វា ហើយរថយន្តនេះគ្រោងនឹងផលិតមានកំណត់ត្រឹម ៥០០គ្រឿងប៉ុណ្ណោះ សម្រាប់លក់លើទីផ្សារ។

តាមរូបភាពប៉ុន្មានសន្លឹកដែល Vinfast បានបង្ហាញ គេឃើញថារចនាបថរបស់រថយន្ត President នេះគឺមានទាក់ទាញជាមួយការឌីហ្សាញរំលេចពណ៌ខ្មៅជាមួយនឹងពណ៌មាស។ សម្រាប់ផ្នែកខាងក្នុងនៅមិនទាន់បង្ហាញនៅឡើយទេ ប៉ុន្តែវាអាចនឹងបំពាក់គ្រឿងបរិក្ខារទំនើបៗមិនចាញ់រថយន្តប្រណីតដទៃឡើយ៕

ផ្ទាំងផ្សាយពាណិជ្ជកម្ម

Lamborghini មួយទឹក ដាក់លក់វិញយកចំណេញ ៨០ម៉ឺនដុល្លារ

August 4, 2020

រថយន្ត Lamborghini Centenario មានផលិតត្រឹមតែ ៤០គ្រឿងប៉ុណ្ណោះក្នុងលោក ដែលក្នុងនោះមានប្រភេទ Coupe ចំនួន ២០គ្រឿង និងប្រភេទ Roadster មានចំនួន ២០គ្រឿង ដោយអតិថិជនអាចកុម្ម៉ង់ការតុបតែងបានតាមចិត្ត។

ពេលនេះរថយន្តកម្រ Lamborghini Centenario Roadster ត្រូវបានគេប្រទះឃើញដាក់លក់លើវិបសាយរបស់ហាងលក់រថយន្តមួយកន្លែងនៅកាណាដាឈ្មោះ Grand Touring Automobiles ដែលមានតម្លៃប្រមាណ ២,៧៥លានដុល្លារ មិនទាន់គិតបញ្ចូលថ្លៃពន្ធផ្សេងៗ។ តម្លៃនេះគឺថ្លៃលើសតម្លៃពេលចេញលក់ដំបូងកាលពីឆ្នាំ ២០១៦ ជាមួយតម្លៃ ១,៩លានដុល្លារ។

រថយន្តដែលដាក់លក់នេះគឺទើបតែជិះបានចម្ងាយត្រឹម ៥៩៤គីឡូម៉ែត្រប៉ុណ្ណោះ។ គួរដឹងថា Centenario Roadster មានបំពាក់ដោយម៉ាស៊ីន ៦,៥លីត្រ ១២ស៊ីឡាំង កម្លាំង ៧៥៩សេះ ដែលអាចស្ទុះពី ០-១០០គ.ម/ម៉ ប្រើពេលត្រឹម ២,៨វិនាទី និងមានល្បឿនអតិបរមា ៣៥០គ.ម/ម៉៕

ផ្ទាំងផ្សាយពាណិជ្ជកម្ម

Lexus LC 500 បើកដំបូល ឆ្នាំ២០២១ ចេញប្រភេទ Regatta Edition ថ្មី ស្អាតខ្លាំង

August 4, 2020

Lexus បានបញ្ចេញរថយន្ត LC 500 Convertible (បើកដំបូល) ម៉ូដែលពិសេសថ្មីមួយសម្រាប់ទីផ្សារអឺរ៉ុប ហៅថា LC 500 Convertible Regatta Edition។

រថយន្តដែលទទួលបានការឌីហ្សាញកាត់តាមនាវាកម្សាន្តនេះ មានតួខ្លួនខាងក្រៅពណ៌ខៀវ Structural Blue និងដំបូលទន់អាចបើកបានពណ៌ខៀវ Marine Blue ព្រមទាំងកាប៊ីនខាងក្នុងពណ៌សលាយខៀវយ៉ាងស្រស់ស្អាត។

រថយន្តដ៏ប្រណីតរបស់ជប៉ុននេះបំពាក់ម៉ាស៊ីនសាំងចំណុះ ៥,០លីត្រ naturally aspirated V8 មានកម្លាំង ៤៧១សេះ ប្រើប្រអប់លេខអូតូ ១០វគ្គ និងប៉ុងមួយវិលកង់ក្រោយ។

ទោះបីជាយ៉ាងណាក៏ដោយ Lexus មិនទាន់បង្ហាញតម្លៃនៃរថយន្ត LC 500 Convertible Regatta Edition នេះឡើយ ប៉ុន្តែម៉ូដែល LC 500 ធម្មតាមានតម្លៃចាប់ពី ៩២ ៩៥០ដុល្លារ ខណៈ LC 500 Convertible មានតម្លៃ ១០១ ៥០០ដុល្លារ៕

ផ្ទាំងផ្សាយពាណិជ្ជកម្ម

Mercedes-AMG GT Black Series ចេញលក់នៅអង់គ្លេស ថ្លៃជាង Ferrari ទៀត

August 4, 2020

ក្រុមហ៊ុន Mercedes បានប្រកាសតម្លៃលក់នៃរថយន្ត AMG GT Black Series សម្រាប់ទីផ្សារប្រទេសអង់គ្លេសជាផ្លូវការ ដោយមានតម្លៃ ៣៣៥ ០០ផោន ឬប្រហែល ៤៣៨ ០០០ដុល្លារ។

បើប្រៀបធៀបទៅនឹងម៉ូដែល AMG GT R Pro រថយន្ត AMG GT Black Series នេះថ្លៃជាងរហូតដល់ទៅ ១៩២ ០០០ដុល្លារឯណោះ។

Mercedes-AMG GT Black Series បំពាក់ម៉ាស៊ីនចំណុះ ៤,០លីត្រ twin-turbo V8 មានកម្លាំង ៧២០សេះ ប្រើប្រអប់លេខអូតូ ៧វគ្គ ប្រភេទ dual-clutch អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,២វិនាទី ហើយមានល្បឿនអតិបរមា ៣២៥គីឡូម៉ែត្រក្នុងមួយម៉ោង។

គួរឲ្យដឹងថា តម្លៃរបស់ AMG GT Black Series ហាក់ខ្ពស់ខ្លាំង បើប្រៀបធៀបនឹងគូប្រជែងរបស់វាដូចជា Porsche 911 GT2 RS តម្លៃខ្ទង់ ២០៧ ០០០ផោន និង Ferrari 488 Pista តម្លៃត្រឹម ២៥២ ០០០ផោនប៉ុណ្ណោះ៕

ផ្ទាំងផ្សាយពាណិជ្ជកម្ម

Toyota បញ្ចេញលក់ RAV4 Hybrid ប្រភេទ Black Edition សម្រាប់ទីផ្សារអឺរ៉ុប

August 3, 2020

Toyota បានដាក់លក់រថយន្ត RAV4 Hybrid ស៊េរីពិសេសថ្មីមួយលើទីផ្សារអឺរ៉ុប ដែលមានឈ្មោះថា RAV4 Hybrid Black Edition ដែលរូបរាងរបស់វាមានរចនាដោយពណ៌ខ្មៅមើលទៅពោរពេញដោយអំណាច។

ផ្នែកដែលមានរំលេចដោយពណ៌ខ្មៅមានដូចជានៅលើផ្ទាំងប៉ាណាខាងមុខ, កាងខាងក្រោម, ស៊ុមកញ្ចក់បង្អួចរថយន្ត និងព្រុយត្រីឆ្លាមខាងក្រោយជាដើម។ បន្ថែមពីនេះវាក៏មានបំពាក់ដោយយ៉ាន់ទំហំ ១៩អ៊ីញ ដែលមានពណ៌ខ្មៅរលើបរលោង ហើយសូម្បីតែ Sensor Intelligent Clearance Sonar ក៏ត្រូវបានលាបពណ៌ខ្មៅផងដែរ។ នៅខាងក្នុងវិញក៏មានរចនាដោយពណ៌ខ្មៅស្ទើរគ្រប់ទីកន្លែងទៀតផង។

RAV4 Hybrid មានដំណើរការដោយម៉ាស៊ីន ២,៥លីត្រ ៤ស៊ីឡាំង បង្កើតកម្លាំងបាន ២១៥សេះ (សម្រាប់ FWD) និង ២១៩សេះ (សម្រាប់ AWD) គួបផ្សំដោយម៉ូទ័រអគ្គិសនី ដែលអាចស្ទុះពី ០-១០០គ.ម/ម៉ ក្នុងពេល ៨,១វិនាទី។ រថយន្ត RAV4 Hybrid ពិសេសនេះមានបើកទទួលការកុម្ម៉ង់ហើយ ដោយការដឹកជញ្ជូននឹងចាប់ផ្ដើមក្នុងខែតុលា៕

ផ្ទាំងផ្សាយពាណិជ្ជកម្ម