ឡានអគ្គិសនីរបស់ Cadillac បង្ហាញរូបរាងសម្រេចចុងក្រោយ តម្លៃក្រោម ៦ម៉ឺនដុល្លារ

April 26, 2021

ក្រុមហ៊ុន Cadillac បានបង្ហាញចេញរថយន្តគំរូ Lyriq Concept ដែលជារថយន្តអគ្គិសនីដំបូងរបស់ខ្លួនកាលពីឆ្នាំ២០២០កន្លងទៅ ហើយពេលនេះផលិតផលសម្រេចចុងក្រោយបានបង្ហាញវត្តមានជាផ្លូវការជាមួយម៉ូដែល Lyriq ស៊េរីឆ្នាំ២០២៣។

រថយន្ត Lyriq ស៊េរីឆ្នាំ២០២៣ បានរក្សារចនាបថរូបរាងដូចជារថយន្ត Lyriq Concept អ៊ីចឹងដែរ ជាមួយរូបរាងដែលមើលទៅទំនើប និងទាន់សម័យសមជារថយន្តអគ្គិសនីដែលជារថយន្តអនាគត។ រថយន្តនេះមានប្រវែង ៤៩៩៦ម.ម មានទទឹងទំហំ ១៦២៣ម.ម មានកម្ពស់ ១៦២៣ម.ម និងមានប្រវែងពីកង់មុខទៅកង់ក្រោយ ៣០៩៤ម.ម។

រថយន្តនេះនឹងមានបំពាក់ដោយអាគុយចំណុះ ១០០គីឡូវ៉ាត់ម៉ោង និងម៉ូទ័រអគ្គិសនីចំនួនមួយបំពាក់នៅផ្នែកខាងក្រោយដែលអាចផលិតកម្លាំងបានប្រមាណ ៣៤០សេះ។ Cadillac និយាយថារថយន្តនេះនឹងអាចបើកបរបានចម្ងាយលើសពី ៤៨៣គីឡូម៉ែត្រពេលសាកភ្លើងពេញ។

ចំពោះការសាកភ្លើងវិញរថយន្ត Lyriq ឆ្នាំ២០២៣នេះមានប្រើប្រាស់បច្ចេកវិទ្យាសាកកម្លាំង ១៩០គីឡូវ៉ាត់ ដែលសាក១០នាទីអាចជិះបានចម្ងាយ ១២២គីឡូម៉ែត្រ ហើយសាក៣០នាទីអាចជិះបាន ៣១៤គីឡូម៉ែត្រ។

Cadillac នឹងទទួលយកការកុម្ម៉ង់ទិញរថយន្ត Lyriq នេះក្នុងខែកញ្ញា ជាមួយតម្លៃនឹងមានចាប់ពី ៥៩ ៩៩០ដុល្លារ ដែលរំពឹងថានឹងដឹកជញ្ជូនជូនអតិថិជនចាប់ផ្ដើមពីឆមាសទីមួយនៃឆ្នាំ២០២២៕

ផ្ទាំងផ្សាយពាណិជ្ជកម្ម

Audi បង្ហាញចេញរាងគំរូនៃរថយន្ត A6 ប្រភេទអគ្គិសនី

April 26, 2021

ក្រុមហ៊ុន Audi បានបង្ហាញចេញនូវរូបរាងគំរូនៃរថយន្ត Audi A6 e-tron នៅក្នុងកម្មវិធីតាំងបង្ហាញរថយន្ត Shanghai Motor ឆ្នាំ២០២២ កាលពីសប្ដាហ៍កន្លងទៅនេះ។

រថយន្តប្រភេទ Concept នេះគឺមានទំហំប៉ុនគ្នានឹងរថយន្ត A6 ធម្មតាដែរដោយមានប្រវែង ៤,៩៦ម៉ែត្រ មានទទឹង ១,៩៦ម៉ែត្រ និងមានកម្ពស់ ១,៤៤ម៉ែត្រ។ តាមរយៈ Concept នេះ ក្រុមហ៊ុន Audi អះអាងថាខ្លួននឹងផ្ដល់ជូនរថយន្តអគ្គិសនីច្រើនជម្រើសដល់អតិថិជននៅទីផ្សារអាមេរិក ដែលច្រើនជាងម៉ាករថយន្តប្រណីតដទៃឯទៀត។

រថយន្ត Audi A6 e-tron នេះគឺនឹងជារថយន្ត Audi ដំបូងគេដែលផលិតឡើងដោយប្រើប្រាស់គ្រោងឆ្អឹង PPE ដែលជាគ្រោងឆ្អឹងផលិតឡើងជាពិសេសសម្រាប់រថយន្តអគ្គិសនី។ រថយន្តដទៃទៀតដែលនឹងប្រើគ្រោងឆ្អឹងនេះរំពឹងថាមានដូចជារថយន្ត Audi Q5 e-tron និងរថយន្ត Audi Q6 e-tron ដែលអាចបង្ហាញវត្តមាននៅឆ្នាំ២០២២។

គ្រោងឆ្អឹង PPE បានរួមសហការផលិតចេញឡើងជាមួយក្រុមហ៊ុន Porsche ហើយវាក៏នឹងមានប្រើប្រាស់លើរថយន្ត Porsche Macan ប្រភេទអគ្គិសនីផងដែរ។

គួរដឹងថារថយន្ត A6 e-tron Concept នេះមានបំពាក់ដោយអាគុយចំណុះ ១០០គីឡូវ៉ាត់ ហើយវាប្រើប្រាស់បច្ចេកវិទ្យាសាកកម្លាំង ៨០០វ៉ាត់ ដែលសាក១០នាទីអាចឲ្យរថយន្តជិះបានចម្ងាយ ៣០០គីឡូម៉ែត្រឯណោះ ហើយវាអាចសាកឡើងពី ៥% ដល់ ៨០% ក្នុងពេលត្រឹម ២៥នាទី។ Audi អះអាងថារថយន្តនេះអាចបើកបរបានចម្ងាយជាង ៧០០គីឡូម៉ែត្រពេលសាកភ្លើងពេញ។ A6 e-tron Concept នេះដែរមានប្រើប្រាស់ម៉ូទ័រអគ្គិសនីភ្លោះដែលផលិតកម្លាំងបាន ៤៧០សេះ៕

ផ្ទាំងផ្សាយពាណិជ្ជកម្ម

Jaguar ចេញឡានអគ្គិសនី I-Pace Black ឆ្នាំ២០២១ ថ្មី តុបតែងពណ៌ខ្មៅមួយជុំឡាន

April 26, 2021

ក្រុមហ៊ុន Jaguar បានពង្រីកត្រកូលរថយន្ត I-Pace ដោយបន្ថែមម៉ូដែលថ្មីមួយទៀត ហៅថា I-Pace Black។

រថយន្ត Jaguar I-Pace Black ថ្មីនេះ ត្រូវបានផលិតផ្អែកលើម៉ូដែល HSE ប៉ុន្តែបានបន្ថែមលក្ខណៈពិសេសជាច្រើន ដែលជាធម្មតាគឺ Option លើម៉ូដែល S, SE និង HSE។ ក្នុងនោះមានដូចជា Option “Black Pack” ដែលបានតុបតែងពណ៌ខ្មៅមួយជុំរថយន្តតែម្តង។

បន្ថែមពីនេះ I-Pace Black ក៏មានបំពាក់យ៉ាន់ពណ៌ខ្មៅរលោង ទំហំ ២០អ៊ីញ, ដំបូលកញ្ចក់ធំ Panoramic Roof និង កញ្ចក់ខ្មៅសម្រាប់អ្នកដំណើរផ្នែកខាងក្រោយ ផងដែរ។

រថយន្ត I-Pace Black ផ្តល់ជម្រើសពណ៌ដូចទៅនឹងម៉ូដែល I-Pace ធម្មតាដែរ ដោយក្នុងនោះរួមមានទាំង ប្រភេទពណ៌ Premium គឺ Aruba និង Farallon Pearl Black ទៀតផង។

រថយន្តអគ្គិសនី SUV នេះបំពាក់ម៉ូទ័រអគ្គិសនីចំនួន ២ មានកម្លាំងសរុប ៣៩៤សេះ អនុញ្ញាតឲ្យវាអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៤,៥វិនាទី។ កញ្ចប់អាគុយអគ្គិសនីទំហំ ៩០គីឡូវ៉ាត់ម៉ោងរបស់វា អាចសាកមួយពេញប្រើពេល ១២ម៉ោង តាមរយៈប្រអប់សាកកម្លាំង ៧គីឡូវ៉ាត់ និង ៨ម៉ោង បើប្រើប្រអប់សាកកម្លាំង ១១គីឡូវ៉ាត់។ ដោយឡែក សម្រាប់ការប្រើប្រាស់ឆ្នាំងសាក ១០០គីឡូវ៉ាត់ DC វិញ អាចឲ្យវាសាកបាន ១២៧គីឡូម៉ែត្រ ដោយប្រើពលេត្រឹម ១៥នាទីប៉ុណ្ណោះ។

គួរឲ្យដឹងថា រថយន្ត Jaguar I-Pace Black ឆ្នាំ២០២១ ថ្មី ត្រូវបានដាក់លក់ក្នុងតម្លៃចាប់ពី ១០១ ០០០ដុល្លារ នៅលើទីផ្សារប្រទេសអង់គ្លេស៕

ផ្ទាំងផ្សាយពាណិជ្ជកម្ម

មាឌតូចតែខ្លាំង! មកដឹងតម្លៃឡាន Mini John Cooper Works ឆ្នាំ២០២២ ថ្មី

April 26, 2021

បន្ទាប់ពីការបញ្ចេញរថយន្ត John Cooper Works (JCW) ឆ្នាំ២០២២ ទាំងប្រភេទដំបូលពេញ និងបើកដំបូល កាលពីសប្តាហ៍មុនរួចមក ឥឡូវនេះក្រុមហ៊ុន Mini ក៏បានប្រកាសពីតម្លៃលក់ជាផ្លូវការរបស់វាដែរ។

រថយន្ត Mini John Cooper Works ឆ្នាំ២០២២ ថ្មីនេះ នឹងផ្តល់ជម្រើស ៣ ម៉ូដែល គឺ Classic, Signature និង Iconic ហើយមានតម្លៃចាប់ពី ៣២ ៩០០ដុល្លារ សម្រាប់ប្រភេទដំបូលពេញ និង ៣៨ ៩០០ដុល្លារ សម្រាប់ប្រភេទបើកដំបូល នៅលើទីផ្សារសហរដ្ឋអាមេរិក។

John Cooper Works ថ្មីមានបំពាក់លក្ខណៈពិសេសជាច្រើន រួមទាំង ហ្វ្រាំង Brembo, យ៉ាន់កង់ Alloy ១៧អ៊ីញ និងប្រព័ន្ធបូម Adaptive Suspension ជាដើម។ រថយន្តនេះបំពាក់ម៉ាស៊ីនចំណុះ ២,០លីត្រ turbocharged ទំហំ ៤ស៊ីឡាំង មានកម្លាំង ២២៨សេះ។ វាដំណើរការដោយប្រអប់លេខដៃ ៦វគ្គ ឬ អូតូ ៨វគ្គ។

ចំណែកឯផ្នែកខាងក្នុងវិញ វាមានបំពាក់កៅអី និងដៃចង្កូតស្បែក Nappa Leather រំលេចដោយថ្នេរដេរពណ៌ប្រផេះ, អេក្រង់កម្សាន្ត Touchscreen ទំហំ ៨,៨អ៊ីញ ហើយក៏មាន Option មុខងារកម្តៅដៃចង្កូត, មុខងារ lane departure warning និង stop & go function សម្រាប់ប្រើជាមួយមុខងារ active cruise control ទៀតផង៕

ផ្ទាំងផ្សាយពាណិជ្ជកម្ម

នេះជាគំរូរថយន្ត MVP ប្រភេទអគ្គិសនីរបស់ Maxus ដែលអាចធ្វើដំណើរបានចម្ងាយ ៨០០គីឡូម៉ែត្រ

April 25, 2021

ក្រុមហ៊ុន SAIC Motor បានធ្វើការបង្ហាញចេញនូវគំរូរថយន្ត MVP ប្រភេទអគ្គិសនីប្រណីតរបស់ខ្លួននៅក្នុងពិព័រណ៍រថយន្តសៀងហៃឆ្នាំ ២០២១ ដោយគំរូរថយន្តនេះមានឈ្មោះពេញថា SAIC MAXUS MIFA EV Concept។

រថយន្តនេះត្រូវបានរចនាឡើយដោយយកគំរូតាមយានអាវកាស(Space Ship) ដោយបានបំពាក់ដោយបច្ចេកវិទ្យាទំនើបៗ ជាមួយការឌីស្សាញម៉ូដថ្មី និងប្លែកពីគេ។

អ្វីដែលមានភាពខុសប្លែកពីគេខ្លាំងនៅលើរថយន្ត SAIC Maxus MIFA EV Concept នេះ គឺផ្នែកខាងក្នុងកាប៊ីនរបស់រថយន្តនេះ ដោយបានបំពាក់ជាមួយអេក្រង់ប្រវែងវែង, កញ្ចក់ជំហៀងសងខាង ប្រភេទឌីជីថលគ្មានដៃទ្វា និងការបើកទ្វាជំហៀងដោយ ចុចទៅលើអំពូល LED ភ្ជាប់គ្នាទាំង២ នៅផ្នែកខាងក្រោយ រួមបន្ថែមជាមួយបច្ចេកវិទ្យាឈ្មោះថា Black Technologis ដែលរួមមាន Smart Cockpit(កាប៊ីនឆ្លាតវៃ), Smart Driving(ការបើកបរឆ្លាតវៃ), ប្រព័ន្ធ Rada ៣៦០ដឺក្រ និងបច្ចេកវិទ្យាផ្សេងៗជាច្រើនផ្សេងទៀត។

រថយន្ត SAIC Maxus MIFA EV Concept មានកម្លាំងសរុប ៦៧០សេះ និងកម្លាំងរមួល ៩០០ញ៉ូតុនម៉ែត្រ។ វាអាចស្ទុះពីល្បឿន ០-១០០គ.ម/ម៉ ដោយប្រើពេល ៣,៨វិនាទី ព្រមទាំងអាចធ្វើដំណើរបានពីចម្ងាយ ៦០០ ទៅ ៨០០គីឡូម៉ែត្រ នៅពេលសាកថ្មពេញ និងគាំទ្រការសាកថ្មល្បឿនលឿនទំហំ ៣០០គីឡូវ៉ាត់ ឬ ៣៦០គីឡូវ៉ាត់ផងដែរ។

រថយន្តអគ្គិសនីស៊េរីថ្មីនេះត្រូវបានគេរំពឹងថានឹងបង្ហាញខ្លួនជាមួយរូបរាងពិតប្រាកដនៅខែវិច្ឆិកា ឆ្នាំ២០២១នេះ និងចេញលក់ផ្លូវការនៅក្នុងឆ្នាំ ២០២២៕

ផ្ទាំងផ្សាយពាណិជ្ជកម្ម

រថយន្តថ្មីទាំង ៥ម៉ូដែល ដែលមានតម្លៃលើសតិច និងក្រោម ៣ម៉ឺនដុល្លារ សម្រាប់បងប្អូនពិចារណា

April 25, 2021

[ទីផ្សាររថយន្តក្នុងស្រុក] យើងសង្កេតឃើញថា ការនិយមប្រើប្រាស់រថយន្តថ្មីបាននឹងកំពុងមានការកើនឡើង ពីមួយឆ្នាំទៅមួយឆ្នាំ ហើយនេះជាសញ្ញាមួយបញ្ជាក់ពីផលវិជ្ជមាន និងអត្ថប្រយោជន៌នៃការប្រើប្រាស់រថយន្តថ្មី។ ថ្ងៃនេះ ក្រុមការងាររបស់ ខេមបូអូតូ សូមណែនាំបងប្អូនទាំងអស់គ្នាអោយស្គាល់រថយន្តថ្មីចំនួន ៤ ម៉ូដែលពីក្រុមហ៊ុនផ្លូវការ មានការធានាត្រឹមត្រូវ ដែលមានតម្លៃចាប់ពីថ្លៃជាងគេ ដល់ធូរជាងគេដូចជា៖

១. MG 6 ២០២១ (៥ កៅអី) ម៉ាស៊ីនសាំង ១,៥លីត្រ តម្លៃ ៣២ ០០០ដុល្លារ

២. Toyota Vios ២០២១ (៥ កៅអី) ម៉ាស៊ីនសាំង ១,៣លីត្រ តម្លៃ ៣១ ៩០០ដុល្លារ

៣. Toyota Avanza ២០២១ (៧ កៅអី) ម៉ាស៊ីនសាំង ១,៦លីត្រ តម្លៃ ២៩ ៩០០ដុល្លារ

៤. Hyundai Venue ២០២១ (៥ កៅអី) ម៉ាស៊ីនសាំង ១,៦លីត្រ តម្លៃ ២៩ ៥០០ដុល្លារ

៥. Ford EcoSport ២០២១ (៥ កៅអី) ម៉ាស៊ីនសាំង ១,០ លីត្រ តម្លៃ ២៧ ២៧ ៩០០ដុល្លារ

សម្រាប់ចម្ងល់ ឬព័ត៌មានរថយន្តផ្សេងៗ សូមទាក់ទងក្រុមហ៊ុនផ្លូវការនីមួយៗ។

ផ្ទាំងផ្សាយពាណិជ្ជកម្ម

Jeep Gladiator 6×6 បង្ហាញខ្លួនជាមួយតម្លៃចាប់ពី ១៣ម៉ឺនដុល្លារ

April 25, 2021

បន្ទាប់ពីភីកអាប់ម៉ូដែល Apocalypse Hellfire 6×6 ត្រូវបានបង្ហាញនៅសហរដ្ឋអាមេរិកកាលពីដើមឆ្នាំនេះកន្លងទៅ Jeep Gladiator គឺជាម៉ូដែលបន្ទាប់បានបង្ហាញខ្លួនបន្ទាប់ពីទទួលការកែច្នៃអោយក្លាយជាកំពូលអ្នក Off-road 6×6។

រថយន្ត Jeep Gladiator 6×6 ត្រូវបានផលិតឡើងដោយក្រុមហ៊ុនឈ្មោះ Next Level ដែលមានទីតាំងស្ថិតនៅរដ្ឋ California នឹងត្រូវបានចែកចាយដោយភ្នាក់ងាលក់រាយរបស់ Jeep ក្នុងតម្លៃចាប់ពី ១៣២ ០០០ដុល្លារ ថ្លៃជាងរថយន្ត Jeep ប្រភេទធម្មតា រហូតដល់ ១០០ ០០០ដុល្លារ។

បន្ទាប់ពីទទួលបានអាប់ដេតថ្មី រូបរាងរបស់វា ពុំមានភាពខុសប្លែកគ្នាខ្លាំងពីសភាពដើមឡើយ វានៅតែមានបំពាក់ជាមួយប៉ាណាក្រូមបញ្ឍ ៧ប្រឡោះ រួមជាមួយចង្កៀងមុខរាងមូលៗ, អំពូលហ្វា Navigation និងអំពូលផ្តល់សញ្ញានៅលើគម្រប់ភក់ដដែល។

តែសម្រាប់អ្វីដែលបានផ្លាស់ប្តូរគឺ ផ្នែកខាងក្រោយនៃរថយន្ត ប្រវែងទ្រុងក្រោយត្រូវបានកើនឡើងរហូតដល់ ២,៤៤ ម៉ែត្រ ព្រមជាមួយការបំពាក់ដោយថាសកង់ទំហំ ២០អ៊ីញ, ប៊ូមប្រភេទ Fox High Performanceថ្មី និងGear Ratio លេខ ៤,៨៨ ផងដែរ។ បន្ថែមពីនេះ អតិថិជនក៏អាចបន្ថែមជាមួយ ដែកសណ្តោងខាងមុខ, ចង្កៀង LED និងបរិក្ខាផ្នែកខាងក្នុងផងដែរ។

រីឯកម្លាំងម៉ាស៊ីនវិញ គឺមានចំនួន ៣ជម្រើសដូចជា ម៉ាស៊ីន ២,០ លីត្រ Turbo-four ឬ ម៉ាស៊ីន ៣,៦លីត្រ V6 កម្លាំង ២៧០សេះ និងកម្លាំងរមួល ៣៩៣Nm និងជម្រើសម៉ាស៊ីន ៣,០លីត្រ Turbodiesel V6 កម្លាំង ៣៧៥សេះ និងកម្លាំងរមួល ៦៣៧Nm។ Jeep Gladiator 6×6 ដំណើរការដោយប្រអប់លេខ ៨វគ្គអូតូ ជម្រើសនៃការបើកបរចំនួន ៥ជម្រើស រួមជាមួយ ជម្រើស Off-road៕

ផ្ទាំងផ្សាយពាណិជ្ជកម្ម

Toyota ប្រកាសចេញ Toyota Crown Kluger ជាផ្លូវការ ក្នុងកម្មវិធីពិព័រណ៍រថយន្តទីក្រុងសៀងហៃ ២០២១

April 24, 2021

បន្ទាប់ពីបានបង្ហាញរូបរាងជាផ្លូវការកាលពីប៉ុន្មានសប្តាហ៍មុនកន្លងទៅ នាពេលនេះរថយន្ត Toyota Crown Kluger ២០២១ រួមជាមួយ Toyota Highlander ជំនាន់ទី៤ ត្រូវបានក្រុមហ៊ុន Toyota បានធ្វើការប្រកាសចេញជាផ្លូវការ នៅក្នុងកម្មវិធីពិព័រណ៍រថយន្តទីក្រុងសៀងហៃ ២០២១។

រថយន្តនេះមានប្រវែងសរុប ៥០១៥ម.ម, ប្រវែងទទឹង ១៩៣០ម.ម, មានកម្ពស់ ១៧៥០ម.ម, ប្រវែងពីកង់មុខដល់កង់ក្រោយ ២ ៨៥០ម.ម និងបំពាក់ជាមួយជម្រើសថាសកង់ទំហំ ១៨អ៊ីញ និង ២០អ៊ីញផងដែរ។

សម្រាប់រូបរាងផ្នែកខាងមុខរបស់វា គឺបានប្រើប្រាស់នូវចង្កៀងមុខដូចទៅនឹងរថយន្ត Highlanderដែរ ប៉ុន្តែសម្រាប់ឡូហ្គូខាងមុខរថយន្ត Highlander មានបំពាក់ជាមួយឡូហ្គូរបស់ Toyota នៅចំកណ្តាលប៉ាណាក្រូម រីឯរថយន្ត Crown Kluger បំពាក់ជាមួយឡូហ្គូម្កុដ រួមជាមួយថាសកង់ ត្រូវបានរចនាខុសគ្នាផងដែរ។

Toyota Crown Kluger ដំណើរការដោយម៉ាស៊ីន Hybrid ចំណុះ ២,៥លីត្រ កម្លាំង ១៨៩សេះ និងប្រព័ន្ធប៉ុង២ E-Four AWD។ បន្ថែមពីនេះ វានឹងបំពាក់ជាមួយកញ្ចប់ប្រព័ន្ធសុវត្តិភាព TSS 2.0 ដែលមានមុខងារ Radar-Active Cruise Control, Lane Departure Warming, Automatic Headlight, Lane Keeping Assist និងRoad and Traffic Sign Recognition ផងដែរ។

រថយន្ត Toyota Crown Kluger នឹងត្រូវចេញលក់នៅលើទីផ្សារប្រទេសចិន នៅពាក់កណ្តាលឆ្នាំ ២០២១ នេះដូចរថយន្ត Toyota Highlander ចំពោះតម្លៃក្រុមហ៊ុននឹងប្រកាសនៅពេលក្រោយ៕

ផ្ទាំងផ្សាយពាណិជ្ជកម្ម

Honda HR-V 2022 រូបរាងថ្មី ប្រកាសចេញសម្រាប់ទីផ្សារអឺរ៉ុប

April 24, 2021

រថយន្ត Honda HR-V ជំនាន់ថ្មីដែលបានប្រលប្រាស់រចនាបថថ្មីបានប្រកាសចេញដំបូងគេនៅទីផ្សារប្រទេសជប៉ុនកាលពីខែកុម្ភៈកន្លងទៅ ដែលក្នុងប្រទេសជប៉ុនរថយន្តនេះត្រូវបានគេស្គាល់ឈ្មោះថា Honda Vezel។

នៅពេលនេះរថយន្ត HR-V ជំនាន់ថ្មីសម្រាប់លក់លើទីផ្សារអឺរ៉ុបបានបង្ហាញរូបរាងជាផ្លូវការ ដែលវានៅបន្តប្រើប្រាស់ការឌីហ្សាញរូបរាងដ៏ទាក់ទាញដូចជារថយន្ត Honda Vezel ដែរ។ វាមានអំពូលភ្លើង LED រាងស្លីម, មានផ្ទាំងប៉ាណាក្រោមលេចធ្លោ និងមានបំពាក់នូវកង់ទំហំ ១៨អ៊ីញមកជាស្តង់ដារផងដែរ។

រថយន្ត HR-V ស៊េរីឆ្នាំ២០២២ ដែលលក់នៅអឺរ៉ុបគឺមានផ្ដល់ជូនតែជម្រើសម៉ាស៊ីនមួយប៉ុណ្ណោះគឺប្រភេទ e:HEV ដែលមានគួបផ្សំម៉ូទ័រអគ្គិសនីពីរ ជាមួយម៉ាស៊ីន i-VTEC ចំណុះ ១,៥លីត្រ គួបផ្សំគ្នាផលិតកម្លាំងបាន ១២៩សេះ។

រថយន្ត Honda HR-V ថ្មីនេះនឹងចេញលក់នៅចុងឆ្នាំនេះ ជាមួយតម្លៃលក់នឹងត្រូវបញ្ជាក់នៅមុនពេលការចេញលក់កាន់តែខិតចូលមកដល់៕

ផ្ទាំងផ្សាយពាណិជ្ជកម្ម

២០ឆ្នាំទៀត Honda នឹងមានលក់តែឡានអគ្គិសនីសុទ្ធ

April 24, 2021

Honda បានប្រកាសអំពីផែនការប្រែក្លាយខ្លួនទៅជាក្រុមហ៊ុនផលិតរថយន្តអគ្គិសនីសុទ្ធ ដោយដាក់គោលដៅថាធ្វើឲ្យបាននៅត្រឹមឆ្នាំ ២០៤០ ជាលក្ខណៈសកលលោកតែម្ដង។

ផែនការថ្មីរបស់ Honda គឺចង់ឲ្យរថយន្តអគ្គិសនីប្រើអាគុយ និងរថយន្តអគ្គិសនីដើរដោយឧស្ម័នមានចំណែក ៤០% នៃចំនួនលក់សរុបនៅអាមេរិកខាងជើង ដែលចង់សម្រេចឲ្យបាននៅត្រឹមឆ្នាំ ២០៣០ បន្ទាប់មកឡើងដល់ ៨០% នៅឆ្នាំ ២០៣៥ និងឡើងដល់ ១០០% ជាលក្ខណៈសកលលោកនៅក្នុងឆ្នាំ ២០៤០។

ដើម្បីសម្រេចគោលដៅនេះ Honda នឹងប្រកាសចេញរថយន្តអគ្គិសនីថ្មីជាច្រើនដែលប្រើប្រាស់គ្រោងឆ្អឹងថ្មីផលិតឡើងសម្រាប់រថយន្តអគ្គិសនី មានឈ្មោះថា e:Architecture។ រថយន្តដំបូងដែលប្រើគ្រោងឆ្អឹងនេះនឹងប្រកាសចេញនៅទីផ្សារអាមេរិកខាងជើងនៅដើមទសវត្សនេះ បន្ទាប់មកបញ្ចេញលក់នៅទូទាំងពិភពលោក។

សម្រាប់ប្រទេសចិន Honda គ្រោងបញ្ចេញលក់រថយន្តអគ្គិសនីម៉ូដែលថ្មីមិនឲ្យតិចជាង ១០គ្រឿងឡើយ ក្នុងរយៈពេល ៥ឆ្នាំខាងមុខ ចាប់ផ្ដើមជាមួយផលិតផលសម្រេចនៃរថយន្ត e:prototype ដែលធ្លាប់បានបង្ហាញរូបរាងក្នុងកម្មវិធី Shanghai Auto Show ដែលរថយន្តនេះនឹងចេញលក់នៅអំឡុងឆ្នាំ ២០២២៕

ផ្ទាំងផ្សាយពាណិជ្ជកម្ម