ផ្ទាំងផ្សាយពាណិជ្ជកម្ម
Facebook Youtube
ទំព័រដើម កំណត់​ហេតុ​បណ្ដាញ ទំព័រ 839

Mitsubishi Outlander PHEV ឆ្នាំ២០២១ សាកភ្លើងពេញជិះបានកាន់តែឆ្ងាយ តម្លៃជាង ៣ម៉ឺនដុល្លារ

ក្រុមហ៊ុន Mitsubishi បានប្រកាសចេញរថយន្ត Outlander PHEV ស៊េរីឆ្នាំ២០២១ ជាផ្លូវការ ដែលទទួលបានការអាប់ដេតលើផ្នែកម៉ាស៊ីនគួរឲ្យកត់សម្គាល់។

រថយន្ត Mitsubishi Outlander PHEV ឆ្នាំ២០២១ ថ្មី បំពាក់ម៉ាស៊ីនប្រភេទ Plug-in Hybrid ដោយគួបផ្សំម៉ាស៊ីនសាំងចំណុះ ២,២លីត្រ ទំហំ ៤ស៊ីឡាំង មានកម្លាំង ១២៦សេះ (ខ្លាំងជាងមុន ៩សេះ) ជាមួយនឹងម៉ូទ័រអគ្គិសនីមួយកម្លាំង ៩៤សេះទៀត (ខ្លាំងជាងមុន ១៣សេះ)។

អរគុណទៅដល់ការអាប់ដេតលើម៉ាស៊ីន និងម៉ូទ័រអគ្គិសនីថ្មី រថយន្ត Outlander PHEV ឆ្នាំ២០២១ មានកម្លាំងសរុបដល់ ២២១សេះ។ មិនតែប៉ុណ្ណោះ កញ្ចប់អាគុយអគ្គិសនីថ្មីទំហំ ១៣,៨គីឡូវ៉ាត់ម៉ោង អាចឲ្យវាបើកបរបានឆ្ងាយជាងមុន សរុប ៤០គីឡូម៉ែត្រ រាល់ពេលសាកភ្លើងពេញម្តង ហើយអាចបើកដល់ល្បឿន ១៣៤គីឡូម៉ែត្រក្នុងមួយម៉ោង ដោយប្រើថាមពលអគ្គិសនីសុទ្ធ។

ថ្វីបើទទួលបានការអាប់ដេតច្រើនមែន ប៉ុន្តែតម្លៃរបស់វាមិនត្រូវបានផ្លាស់ប្តូរឡើយ ដោយរថយន្ត Outlander PHEV ឆ្នាំ២០២១ មានតម្លៃចាប់ពី ៣៦ ២៩៥ដុល្លារ សម្រាប់ទីផ្សរាបរទេស៕

ផ្ទាំងផ្សាយពាណិជ្ជកម្ម

មកមើលឡាន McLaren Artura ឆ្នាំ២០២២ ខាងក្រៅផ្ទាល់បែបនេះ ទើបដឹងថាកប់ខ្លាំង (មានវីដេអូ)

កាលពីពេលថ្មីៗកន្លងទៅនេះ ក្រុមហ៊ុន McLaren បានប្រកាសចេញរថយន្តស្ព័រប្រភេទ Plug-in Hybrid (អាចសាកភ្លើងបាន) ម៉ូដែល Artura ដែលមានកម្លាំងដ៏ខ្លាំងក្លា ប៉ុន្តែមានសមត្ថភាពអាចសន្សំសំចៃប្រេងឥន្ធនៈបានល្អបំផុត។

ឥឡូវនេះរថយន្តស្ព័ររបស់ចក្រភពអង់គ្លេសខាងលើ បានបង្ហាញខ្លួនជាផ្លូវការលើទឹកដីសហរដ្ឋអាមេរិក ពោលគឺនៅក្រុមហ៊ុន McLaren North Jersey ហើយវាក៏ជារថយន្ត McLaren Artura មួយគ្រឿងដំបូងផងដែរ សម្រាប់ទីផ្សារមួយនេះ។

ម៉ូទ័រអគ្គិសនី និងអាគុយដែលបានបំពាក់លើរថយន្ត McLaren Artura នេះអាចឲ្យរថយន្តបើកបរទៅមុខដោយប្រើថាមពលអគ្គិសនីសុទ្ធបានចម្ងាយប្រមាណ ៣០គីឡូម៉ែត្រ ហើយអាចឲ្យរថយន្តនេះស៊ីប្រេងឥន្ធនៈជាមធ្យមត្រឹមតែ ៤,៧លីត្រ ពេលបើកបរចម្ងាយ ១០០គីឡូម៉ែត្រ ដោយពឹងផ្អែកលើប្រព័ន្ធ Hybrid។

ត្បិតថាសន្សំសំចៃប្រេងឥន្ធនៈមែន ប៉ុន្តែរថយន្តនេះអាចផលិតកម្លាំងសរុប ៦៧១សេះ ដោយមានបំពាក់មកជាមួយនូវម៉ាស៊ីនចំណុះ ៣,០លីត្រ ៦ស៊ីឡាំង ប្រភេទ Turbo ដែលម៉ាស៊ីននេះផលិតកម្លាំងបាន ៥៧៧សេះ គួបផ្សំនឹងម៉ូទ័រអគ្គិសនីបានកម្លាំងសរុប ៦៧១សេះ។ កម្លាំង ៦៧១សេះនេះ អាចឲ្យរថយន្ត McLaren ស្ទុះពី ០ ដល់ ៩៦គ.ម/ម៉ ដោយប្រើតែ ៣,០វិនាទី ប៉ុណ្ណោះ និងមានល្បឿនអតិបរមាដល់ ៣៣០គ.ម/ម៉។

McLaren បាននិយាយថាអាគុយរបស់ Artura នេះអាចសាកថ្មបានដល់ ៨០% ដោយប្រើពេល ២,៥ម៉ោង តាមរយៈការខ្សែសាកស្តង់ដារ EVSE ហើយវាក៏អាចសាកបញ្ចូលថាមពលដោយពឹងផ្អែកលើម៉ាស៊ីនប្រេងឥន្ធនៈដែលសាកភ្លើងអំឡុងពេលបើកបរអាស្រ័យលើប្រភេទបើកបរដែលជ្រើសរើស។ រថយន្ត McLaren Artura នេះគឺមានតម្លៃចាប់ពី ២២៥ ០០០ដុល្លារ សម្រាប់ទីផ្សារបរទេស៕

ចង់ដឹងថារថយន្ត McLaren Artura ស្រស់ស្អាតយ៉ាងណា សូមទស្សនាវីដេអូខាងក្រោម៖

 

ផ្ទាំងផ្សាយពាណិជ្ជកម្ម

ក្តៅៗ! Mercedes C-class សេរ៊ីឆ្នាំ២០២២ ចេញជាផ្លូវការហើយ

ក្រុមហ៊ុន Mercedes បានប្រកាសចេញជាផ្លូវការនូវរថយន្ត Mercedes C-class សេរ៊ីឆ្នាំ២០២២ ដែលជាម៉ូដែលមួយដែលទទួលបានជោគជ័យបំផុតរបស់ Mercedes ដែលលក់បានជាង ១០,៥ លានគ្រឿង គិតចាប់ពីតាំងពីឆ្នាំ ១៩៨២មក។ បន្ទាប់មានការផ្លាស់ប្តូរជាច្រើនក្នុងពេលប៉ុន្មានឆ្នាំថ្មីនេះ C-class ក៏បានទទួលការអាប់ដេតអោយកាន់តែប្រសើរដូចបងប្អូន E-class និង S-class របស់ខ្លួនផងដែរ។

Mercedes C-class Estate
Mercedes C-class Sedan

រថយន្ត Mercedes C-class សេរ៊ីឆ្នាំ២០២២ បានចែកតួខ្លួនជា ២ប្រភេទគឺ Sedan និង Estate។ វាមានប្រវែងតួរខ្លួនសរុប ៤,៧៥០មីលីម៉ែត្រ, ទទឹង ១,៨២១មីលីម៉ែត្រ និងកម្ពស់ ១​,៤៣៨មីលីម៉ែត្រ បើប្រៀបធៀបទៅនឹងម៉ូឌែលមុនវាប្រវែងវែងជាង ៦៣មីលីម៉ែត្រ។

ចំពោះចំណុចដែលចាប់អារម្មណ៍នៃម៉ូឌែលឆ្នាំ២០២២នេះ គឺផ្នែកខាងក្រៅ និងផ្នែកខាងក្នុងបានអាប់ដេតថ្មីប្លែកពីម៉ូឌែលមុន ដោយភាគច្រើននៃរថយន្តកាត់តាម S-class តួរយ៉ាងដូចជាបានបំពាក់ជាមួយអេក្រង់កម្សាន្តបញ្ឃរទំហំ ១១,៩អ៊ីញ, អេក្រង់បង្ហាញព័ត៌មានទំហំ ១២,៣អ៊ីញ, ប៉ាណាក្រូម អាប់ដេតថ្មី និងចង្កៀងក្រោយស្រដៀង S-class ផងដែរ។

សម្រាប់ C-class សេរ៊ីឆ្នាំ២០២២ បានបំពាក់ជាមួយម៉ាស៊ីនសាំងចំណុះ ២,០លីត្រ turbocharged ផ្គួបជាមួយម៉ូទ័រអគ្គិសនីកម្លាំង ៤៨វ៉ុល ដែលបង្កើតបានកម្លាំងសរុប ២៥៥សេះ ប្រើប្រាស់ប្រអប់លេខ 9G ៩វគ្គអូតូ 4WD។

Mercedes C-class សេរ៊ីឆ្នាំ២០២២ នឹងចេញលក់ផ្លូវការនៅសហរដ្ឋអាមេរិចចាប់ពីដើមឆ្នាំ ២០២២ ដោយតម្លៃនឹងនៅពេលនោះជាមួយគ្នា៕

ផ្ទាំងផ្សាយពាណិជ្ជកម្ម

បើមានលក្ខណៈពិសេសៗទាំងនេះ តើគិតយ៉ាងណាដែរចំពោះ Mazda BT-50 ស៊េរីថ្មីនេះ?

យោងតាមទំព័រហ្វេសប៊ុកផ្លូវការរបស់ក្រុមហ៊ុន Mazda ប្រចាំនៅកម្ពុជា បានធ្វើការប្រកាសចេញនៅរថយន្ត Pickup ថ្មីរបស់ខ្លួនដែលបានធ្វើការផ្លាស់ប្តូររូបរាងថ្មីទាំងស្រុង គឺម៉ូឌែល BT-50 ឆ្នាំ២០២២។ ជាមួយគ្នានេះដែរយើងក៏មិនទាន់ដឹងថាតើលក្ខណៈពិសេសៗ ដែលក្រុមហ៊ុននាំចូលយកលក់នោះយ៉ាងណានោះទេ ប៉ុន្តែថ្ងៃនេះយើងនឹងនាំបងប្អូនទាំងអស់គ្នាមកស្គាល់ពីចំណុចពិសេសៗ ដែលក្រុមការងារយើងបានដកស្រង់ពីគេហទំព័រផ្លូវការរបស់ Mazda ប្រទេសអូស្រ្តាលី ហើយចំណុចទាំងអស់នោះរួមមាន៖

  • ការរចនាផ្នែកខាងក្រៅ គឺត្រូវបានផ្លាស់ប្តូរថ្មីទាំងស្រុង ទាំងមុខ ចំហៀង និងក្រោយ ជាពិសេសគឺផ្នែកខាងមុន ដោយបានយកលំនាំតាមត្រកូល SUV របស់ខ្លួន មកបំពាក់លើប្រភេទ Pickup នេះតែម្តង។ ថាសកង់វិញក៏ផ្តល់នូវការទាក់ទាញមួយកំរឹតទៀតដែរ

  • ការរចនាផ្នែកខាងក្នុង

    • កុងទ័រប្រភេទ LCD
    • ប្រព័ន្ធកំសាន្តទំហំរហូតដល់ ៩អុីញ មានមុខងារ Apple CarPlay និង Android Auto
    • កៅអីស្បែក ភ្ជាប់ដោយមុខងារកម្តៅ
    • ឧបករណ៍បំពងសំឡេង ៨ចំណុច
  • ប្រព័ន្ធសុវត្ថិភាពថ្មី ដែលមានដូចជា៖
    • ប្រព័ន្ធគ្រប់គ្រងការអូសសណ្តោង TSC
    • ប្រព័ន្ធផ្តល់សញ្ញា ពេលចេញពីចំណត RCTA
    • ប្រព័ន្ធរក្សាគន្លងផ្លូវ ពេលកំពុងបើកបរ LDW
    • ប្រព័ន្ធផ្តល់សញ្ញានៅផ្នែកចំហៀង BSM
    • ប្រព័ន្ធកំណត់ល្បឿនថេស្វ័យប្រវិត្ត ACC
    • ប្រព័ន្ធគ្រប់ការការចុះចំណោត HDC
    • កាំម៉េរាមើលក្រោយ និងសេនស័រជំនួយពេលចូលចំណត ឬថយក្រោយ
  • ប្រព័ន្ធបញ្ឆេះរថយន្តពីចម្ងាយ Remote Engine Start
  • ម៉ាស៊ីនម៉ាស៊ូតថ្មី ចំណុះ ៣,០លីត្រ ៤សុីឡាំង កម្លាំង ១៤០គីឡូវ៉ាត់ (ប្រហែល ១៨៨សេះ) កម្លាំងរមូល ៤៥០ញ៉ូតុនម៉ែត្រ កំរឹតស៊ីប្រេងឥន្ធនៈប្រហែល ៧,៧លីត្រជាមធ្យម។

សម្រាប់កម្ពុជាវិញ ក្រុមហ៊ុនផ្លូវការបានធ្វើការប្រកាសចេញតម្លៃពិសេសគឺ ៤៥ ០០០ដុល្លារ ប៉ុន្តែយើងនៅតែមិនទាន់ដឹងអំពីលក្ខណៈលម្អឹតនៃរថយន្តនោះនៅឡើយ​។ ប្រសិនបើលក្ខណៈពិសេសៗប៉ុណ្ណឹង តើបងប្អូនយល់យ៉ាងណាដែរ?

ផ្ទាំងផ្សាយពាណិជ្ជកម្ម

Hyundai ប្រកាសចេញរថយន្តអគ្គសនីសុទ្ធ ជិះបានឆ្ងាយ ៤៨០គ.ម ផ្លូវការ

រថយន្ត Hyundai Loniq 5 គឺជារថយន្តប្រភេទ SUV អគ្គិសនីសុទ្ធដែលផលិតឡើងដោយផ្អែកលើរថយន្ត Hyundai 45 ដែលបានដាក់បង្ហាញកាលពីឆ្នាំ ២០១៩ ក្នុងកម្មវិធីពិពណ៌រថយន្ត Frankfurt Motor Show។ Loniq 5 គឺជាផលិតផលដំបូងបង្អស់របស់ Loniq ដែលជាយីហោមួយដែលមានឯកទេសក្នុងការផលិតរថយន្តអគ្គិសនី ដែលស្ថិតក្រោមក្រុមហ៊ុន Hyundai ប៉ុន្តែរថយន្តនៅតែប្រើប្រាស់ឡូហ្គោរបស់ Hyundai ដដែល។

ប្រៀបធៀបជាមួយ Hyundai 45 រថយន្ត Loniq 5 គឺពុំមានភាពខុសគ្នាខ្លាំងនោះឡើយ ក្នុងការឌីស្សាញ។ ដោយនៅតែបំពាក់ជាមួយចង្កៀងក្រោយរូបរាងជា Pixel-shaped, អំពូលបំភ្លឺពេលថ្ងៃ រាងជាការ៉េ និង ថាសកង់ទំហំ ២០អ៊ីញ ដែលស្រដៀងទៅនឹង Hyundai 45។

ដូចរថយន្ត Sonata Hybrid D-class Sedan ដំបូលរថយន្ត Hyundai Loniq 5 អាចស្រូបយកថាមពលពន្លឺព្រះអាទិត្យដើម្បីសាកអាគុយ។ លើសពីនេះទៀតនៅតាមទីផ្សារមួយចំនួនអ្នកប្រើប្រាស់ក៏មានជម្រើសក្នុងការជ្រើសរើសកញ្ចក់មើលខាងក្រោយប្រភេទកាមេរ៉ា និងអេក្រង់ OLED ខាងក្នុងផងដែរ។

រីឯតាប្លូវិញ បានទទួលការឌីស្សាញតាមបែប Tech-rich ដែលភ្ជាប់គ្នាជាមួយអេក្រង់ទំហំ ១២អ៊ីញ និងប្រព័ន្ធបង្ហាញព័ត៍មានលើកញ្ជក់ HUD។ កៅអីខាងបញ្ជារុញទៅមុខ និងទៅក្រោយបានផងដែរ។

Hyundai Loniq 5 ផ្តល់នូវជម្រើសកញ្ចប់អាគុយអគ្គិសនី២ប្រភេទគឺ កញ្ចប់អាគុយអគ្គិសនី ៥៨ គីឡូវ៉ាត់ម៉ោង និងកញ្ចប់អាគុយអគ្គិសនី ៧២,៦ គីឡូវ៉ាត់ម៉ោង។

  • សម្រាប់ប្រភេទ Entry-level នៃរថយន្ត Loniq 5 បំពាក់ជាមួយកញ្ចប់អាគុយអគ្គិសនី ៥៨ គីឡូវ៉ាត់ម៉ោង និងម៉ូទ័រអគ្គិសនីចំនួន១ បង្កើតបានកម្លាំងសរុប ១៦៧សេះ ប្រើប្រាស់ប្រព័ន្ធបើកបរRWD។ និងអាចស្ទុះពីល្បឿនកុងទ័រ ០-១០០ ប្រើពេល ៨,៥វិនាទី ។
  • ប្រភេទខ្លាំងបំផុត បំពាក់ជាមួយកញ្ចប់អាគុយអគ្គិសនី ៧២,៦ គីឡូវ៉ាត់ម៉ោង និងម៉ូទ័រអគ្គិសនី ចំនួន ២ កម្លាំង ៣០២សេះ ប្រើប្រាស់ប្រព័ន្ធបើកបរ AWD និងអាចស្ទុះពីល្បឿនកុងទ័រ ០-១០០ ប្រើពេល ៥,២វិនាទី ។
  • និងប្រភេទដែលអាចបើកបរបានយូរ បំពាក់ជាមួយកញ្ចប់អាគុយអគ្គិសនី ៧២,៦ គីឡូវ៉ាត់ម៉ោង និងម៉ូទ័រអគ្គិសនីធំចំនួន ១ កម្លាំង ២១៤សេះ អាចបើកបរបានចម្ងាយប្រហែល ៤៨០គ.ម ពេលសាកថ្មពេញម្តង៕

ផ្ទាំងផ្សាយពាណិជ្ជកម្ម

ចង់សាកឡាន Tesla ឲ្យពេញ ត្រូវចាយថ្លៃភ្លើងជិត ១ពាន់ដុល្លារ នៅតិចសាស់

ព្យុះទឹកកកដែលបានកើតមានឡើងក្នុងរដ្ឋតិចសាស់សហរដ្ឋអាមេរិក បានបន្តផ្ដល់ផលប៉ះពាល់ដល់មនុស្សជាច្រើនរស់នៅក្នុងរដ្ឋមួយនេះ។

ព្យុះទឹកកកនេះបានធ្វើឲ្យតម្រូវការនៃថាមពលអគ្គិសនីមានការកើនឡើងខ្លាំង ដែលធ្វើឲ្យថ្លៃភ្លើងឡើងថ្លៃទៅតាមនោះ។ នេះក៏ដោយសារផែនការទាក់ទងនឹងតម្លៃអគ្គិសនី ដែលបានគិតអត្រាផ្អែកលើតម្រូវការលើទីផ្សារ។ ក្នុងករណីនៅរដ្ឋតិចសាស់ បើផ្អែកតាមការចុះផ្សាយរបស់ NBC News អត្រាតម្លៃអគ្គិសនីបានកើនឡើងដល់ទៅជាង ៩ពាន់ដុល្លារ ក្នុងមួយមេហ្គាវ៉ាត់ម៉ោង ដែលកើនឡើង ១៧ ៩០០% ធៀបនឹងអត្រាធម្មតាដែលមានត្រឹម ៥០ដុល្លារប៉ុណ្ណោះ។

ការឡើងថ្លៃថាមពលអគ្គិសនីនេះមានន័យថាការប្រើអគ្គិសនីនឹងត្រូវចំណាយថវិកាអស់ច្រើនខុសពីធម្មតា។ នេះមានន័យថាអ្នកប្រើប្រាស់រថយន្តអគ្គិសនីនឹងត្រូវចំណាយថវិកាច្រើនពេលសាកថាមពលម្ដងៗសម្រាប់ការធ្វើដំណើរ។

ចំពោះរថយន្ត Nissan Leaf ដែលអាគុយមានទំហំ ៤០គីឡូវ៉ាត់ម៉ោង ម្ចាស់រថយន្តនឹងត្រូវចំណាយដល់ ៣៦០ដុល្លារដើម្បីសាកថាមព្យពេញ។ ចំណែករថយន្ត Audi e-tron នឹងត្រូវចំណាយ ៨៥៥ដុល្លារ ហើយរថយន្ត Tesla ដែលមានអាគុយទំហំ ១០០គីឡូវ៉ាត់ម៉ោងត្រូវចំណាយអស់ ៩០០ដុល្លារ៕

ផ្ទាំងផ្សាយពាណិជ្ជកម្ម

Lexus IS 500 បំពាក់ម៉ាស៊ីន ៨ស៊ីឡាំង ចេញជាផ្លូវការ

រថយន្ត Lexus IS 500 F Sport Perfomance ដែលជាស៊េរីឆ្នាំ ២០២២ បានបង្ហាញវត្តមានជាផ្លូវការនៅលើទីផ្សារសហរដ្ឋអាមេរិក ដោយមានការនាំយកត្រឡប់មកវិញនូវម៉ាស៊ីន ៨ស៊ីឡាំង ដែលអ្នកប្រើប្រាស់ភាគច្រើនបានស្នើសុំ។

Lexus IS 500 F SPORT Performance

IS 500 F Sport Perfomance មានបំពាក់ម៉ាស៊ីនចំណុះ ៥,០លីត្រ ៨ស៊ីឡាំង ដែលផលិតកម្លាំងបាន ៤៧២សេះ ភ្ជាប់នឹងប្រអប់លេខអូតូចំនួន ៨វគ្គ។ វាមានសមត្ថភាពអាចស្ទុះពី ០ ដល់ ៩៦គ.ម/ម៉ បានដោយប្រើពេលត្រឹម ៤,៥វិនាទី និងមានកម្រិតស៊ីសាំង ៩,៨លីត្រ ពេលបើក ១០០គីឡូម៉ែត្រលើផ្លូវលាតក្រៅក្រុង។

IS 500 F Sport Perfomance នេះមានទម្ងន់ធ្ងន់ជាង IS 350 F Sport Perfomance តែប្រមាណ ៦៥គីឡូក្រាមប៉ុណ្ណោះ ដោយទម្ងន់សរុបរបស់វាគឺ ១ ៧៦៥គីឡូក្រាម។

រថយន្តនេះមានមកជាស្តង់ដារនូវកញ្ចប់ Dynamic Handling Package ដែលក្នុងនោះមានប្រព័ន្ធបូមដែលអាចបត់បែនបានតាមសភាពការ និងមុខងារមួយចំនួនទៀតដែលជំនួយដល់ការបើកបរកាន់តែប្រសើរ។ បន្ថែមពីនេះវាក៏មាននូវកញ្ចប់ Lexus Safety System+ 2.5 ផងដែរ។

រថយន្ត Lexus IS 500 F Sport Perfomance ឆ្នាំ ២០២២ មួយនេះ នឹងចេញលក់ជាផ្លូវការនៅអំឡុងចុងឆ្នាំ ២០២១ ដោយខាងក្រុមហ៊ុនមិនទាន់បានប្រាប់អំពីតម្លៃលក់នៅឡើយទេ៕

ផ្ទាំងផ្សាយពាណិជ្ជកម្ម

Tesla ឈប់ផលិតឡានម៉ូដែលនេះហើយ ក្រោយបញ្ចុះតម្លៃបានប៉ុន្មានថ្ងៃ

រថយន្ត Tesla Model Y ប្រភេទ Standard Range RWD ដែលជា Base Model នោះ ត្រូវបានដកចេញពីវេបសាយរបស់ក្រុមហ៊ុនផលិតរថយន្តអគ្គិសនីនេះ ដែលបញ្ជាក់ថាវានឹងលែងមានលក់ទៀតហើយ។

គួររំលឹកឲ្យដឹងថា ក្រុមហ៊ុន Tesla បានប្រកាសចេញរថយន្ត Model Y ប្រភេទ Base Model នេះ កាលពីខែមករា។ វាមានចម្ងាយបើកបរ ៣៩០គីឡូម៉ែត្រ។

មិនតែប៉ុណ្ណោះ Tesla ទើបតែបានធ្វើការបញ្ចុះតម្លៃលើរថយន្ត Model Y Standard Range RWD ពី ៤១ ៩៩០ដុល្លារ នៅសល់ត្រឹម ៣៩ ៩៩០ដុល្លារប៉ុណ្ណោះ ប៉ុន្តែមិនទាន់បានប៉ុន្មានថ្ងៃផង ក៏ស្រាប់តែឈប់ដាក់លក់វិញ។

ទោះជាយ៉ាងណាក៏ដោយ Tesla មិនបានធ្វើការបកស្រាយជុំវិញករណីនេះឡើយ។ យ៉ាងណាមិញ គេហទំព័រ Engadget បាននិយាយថា Tesla ប្រហែលជាផ្អាកការលក់មួយរយៈសិន ដោយមូលហេតុអាចមកពីមានគេបញ្ជាទិញច្រើនពេក ក្រោយពេលដាក់លក់បញ្ចុះនោះ៕

ផ្ទាំងផ្សាយពាណិជ្ជកម្ម

Ford ហៅឡានភីកអាប់ F-150 ឆ្នាំ២០២១ ចូលរោងចក្រវិញ ព្រោះមានបញ្ហាកញ្ចក់មុខ

ក្រុមហ៊ុន Ford បានប្រកាសហៅរថយន្តភីកអាប់ F-150 ស៊េរីឆ្នាំ២០២១ មួយចំនួន ចូលមករោងចក្រវិញ ដោយសារតែកញ្ចក់មុខរបស់វាមិនបានតម្លើងឲ្យត្រឹមត្រូវ។

ជាលទ្ធផល កញ្ចក់មុខរបស់វាអាចនឹងហោះចេញពីរថយន្ត នៅពេលជួបគ្រោះថ្នាក់ ដែលបង្កើនហានិភ័យនៃការរងរបួសដល់អ្នកប្រើប្រាស់។ ទោះជាយ៉ាងណាក៏ដោយ Ford មិនទាន់បានឮដំណឹងអំពីគ្រោះថ្នាក់ណាមួយ ពាក់ព័ន្ធនឹងបញ្ហានេះឡើយ។

គួរឲ្យដឹងថា ក្រុមហ៊ុន Ford បានហៅរថយន្ត F-150 ឆ្នាំ២០២១ ដែលផលិតនៅរោងចក្រ Dearborn ពីថ្ងៃទី២៧ ខែតុលា ឆ្នាំ២០២០ ដល់ ថ្ងៃទី៣ ខែកុម្ភៈ ឆ្នាំ២០២១ និង រថយន្ត F-150 Super Duty ឆ្នាំ២០២០-២០២១ ដែលផលិតនៅរោងចក្រ Kentucky ចន្លោះថ្ងៃទី១៣ ខែតុលា ឆ្នាំ២០២០ និង ថ្ងៃទី២៣ ខែមករា ឆ្នាំ២០២១។

សរុបមក វាមានចំនយន ៧៩ ០១៧គ្រឿងនៅសហរដ្ឋអាមេរិក, ៦ ៩៨៦គ្រឿងនៅកាណាដា និង ១ ៣៤៧គ្រឿងនៅម៉ិចស៊ីកូ៕

ផ្ទាំងផ្សាយពាណិជ្ជកម្ម

ឡូយមែន! Ford ប្រើ F-150 ស៊េរី ២០២១ ជាម៉ាស៊ីនភ្លើង

រដ្ឋ Texas សហរដ្ឋអាមេរិកបានរងការវាយប្រហារយ៉ាងខ្លាំងដោយសារខ្យល់ព្យុះកាលពីសប្តាហ៍មុនដែលបណ្តាលឱ្យមានការដាច់ចរន្តអគ្គិសនី និងកង្វះទឹក។ ដើម្បីជួយមនុស្សឱ្យជំនះអាកាសធាតុត្រជាក់ Ford បាននិយាយទៅកាន់អ្នកចែកចាយនៃរដ្ឋតិចសាសអោយខ្ចី F-150 Hybrid ស៊េរី ២០២១ សំរាប់ប្រើជាម៉ាស៊ីនភ្លើង។

ក្រុមហ៊ុនផលិតរថយន្តអាមេរិចនេះនឹងផ្តល់ការលើកទឹកចិត្តដល់អ្នកចែកចាយនៃរដ្ឋតិចសាស ក្នុងការជួលរថយន្ត F-150 PowerBoost Hybrid របស់ពួកគេ។ ទន្ទឹមនឹងនេះម៉ូដែលទាំងនេះបន្ទាប់ពីបញ្ចប់កិច្ចសន្យាជួល នឹងត្រូវបាន Promotion សម្រាប់លក់ឡើងវិញនៅខែមីនា។

យោងតាមសារព័ត៌មាន Automotive News បានអោយដឹងថានៅរដ្ឋ Texas មានរថយន្ត Ford F-150 Hybrid ជាង ៤០០ គ្រឿងដែលអាចចូលរួមក្នុងយុទ្ធនាការនេះ។ ចំនួននេះមិនច្រើននោះឡើយ ប៉ុន្តែអាចជួយជនជាតិតិចសាសក្នុងគ្រាលំបាកដែលបង្កឡើងដោយគ្រោះមហន្តរាយធម្មជាតិនេះបាន។

មុនពេលដែលក្រុមហ៊ុន Ford បានធ្វើការប្រកាសជួយប្រជាពលរដ្ឋ Texas ម្ចាស់រថយន្ត F-150 ឈ្មោះ Randy Jones បានប្រើប្រាស់ F-150 Hybrid របស់គាត់ដើម្បីផ្តល់ថាមពលដល់ឧបករណ៍ប្រើប្រាស់ក្នុងផ្ទះនៅពេលដែលបណ្តាញអគ្គិសនីត្រូវបានកាត់ផ្តាច់។

មុខងារផលិតថាមពលនៅលើរថយន្ត Ford F-150 Hybrid ២០២១ មានឈ្មោះថា Pro Power Onboard។ ជាមួយនឹងម៉ូឌែល F-150 ២០២១ ប្រភេទ hybrid ក្រុមហ៊ុន Ford ផ្តល់នូវជម្រើស ៣ សម្រាប់ប្រព័ន្ធ Pro Power Onboard ដែលមានកម្រិតថាមពលចាប់ពី ២ kW ទៅ ៧,២ kW ។ ជាមួយនឹងប្រព័ន្ធ Pro Power Onboard ដែលទំនើបបំផុត F-150 អាចផ្តល់ថាមពលបាន ៣៥ ម៉ោងជាមួយនឹងប្រេងពេញ៕

ផ្ទាំងផ្សាយពាណិជ្ជកម្ម
1...838839840...1,082ទំព័រ 839 នៃ 1,082

បច្ចេកវិទ្យា

គន្លឹះសំខាន់ៗ

REVIEW+

© ២០២២ រក្សាសិទ្ធិគ្រប់យ៉ាង​ ហាមដាច់ខាតយកព័ត៌មានទៅផ្សាយបន្ត ដោយគ្មានការអនុញ្ញាត | www.camboauto.com