Ford Bronco មួយប្រភេទ មានទំហំធំល្មមសម្រាប់មនុស្ស២នាក់សម្រាកលេង

November 14, 2020

រថយន្ត Ford Bronco ស៊េរីឆ្នាំ ២០២១ គឺជាប្រភេទរថយន្តដែលមានសមត្ថភាពខ្លាំងក្លាលើការបើកបរផ្លូវពិបាក ល្អសម្រាប់អ្នកចូលចិត្តធ្វើដំណើរផ្សងព្រេង ឬបោះបង់កម្សាន្តជាដើម។

សម្រាប់រថយន្ត Ford Bronco ប្រភេទទ្វារបួនគឺផ្នែកខាងក្រោយរបស់វាមានទំហំធំ ដែលអាចឲ្យមនុស្សពីរនាក់ស្នាក់ក្នុងរថយន្តបានយ៉ាងស្រួល ដោយមិនបាច់មានគ្រឿងបន្ថែមអ្វីឡើយ។ នៅផ្នែកខាងក្រោយនៃរថយន្តគឺមានទំហំប្រមាណ ១,៩ម៉ែត្រការ៉េ។

នៅពេលដែលទម្រេតកៅអីជួរក្រោយអស់ អ្នកនឹងបានកន្លែងទំនេរដែលមានប្រវែងជិតពីរម៉ែត្រ (១៩៨១ម.ម) និងមានទទឹង ១០៩២ម.ម។ នេះមានន័យថាមនុស្សធំពីរនាក់អាចគេងក្នុងរថយន្ត Ford Bronco ប្រភេទទ្វារបួនបានយ៉ាងស្រួលខ្លួន។ បន្ថែមពីនេះអតិថិជនក៏នឹងមានជម្រើសបន្ថែមទ្វារក្រោយដែលអាចទាញចេញក្រៅ ដែលនឹងបង្កើនប្រវែងរថយន្តបាន ៣០៥ម.ម បន្ថែមទៀត៕

ផ្ទាំងផ្សាយពាណិជ្ជកម្ម

Ford Everest BaseCamp ឆ្នាំ២០២១ ត្រៀមខ្លួនជាស្រេច សម្រាប់ដំណើរកម្សាន្តគ្រប់ទិសទី

November 14, 2020

ក្រុមហ៊ុន Ford បានប្រកាសចេញរថយន្ត Everest ប្រភេទ BaseCamp ស៊េរីឆ្នាំ២០២១ ថ្មី សម្រាប់ទីផ្សារប្រទេសអូស្ត្រាលី ដោយផលិតមានចំនួនកំណត់ ត្រឹមតែ ៤៥០គ្រឿងប៉ុណ្ណោះ។

រថយន្ត Everest BaseCamp ថ្មីនេះត្រូវបានផលិតផ្អែកតាមម៉ូដែល Trend 3.2L 4×4 និង Turbo 2.0L Bi-Turbo ដោយមានតម្លៃចាប់ពីខ្ទង់ ៤៧ ៣៥០ដុល្លារ ដល់ ៤៨ ៤៤០ដុល្លារ។

BaseCamp មានការតុបតែងខុសពី Everest ធម្មតាដូចជា បន្ថែមរបាំងការពារផ្នែកខាងមុខ ជាមួយរបាភ្លើង LED, ហឺយខ្យល់, រឺហ្គែរលើដំបូល, ប៉ាណាមុខពណ៌ប្រផេះ ព្រមទាំង បន្ទះការពារបាតមុខ និងក្រោយ ជាដើម។

រថយន្ត SUV ដែលត្រៀមខ្លួនរួចជាស្រេចសម្រាប់ដំណើរកម្សាន្តគ្រប់ទិសទីនេះ អាចអូសសណ្តោងបានទម្ងន់ ៣ ០០០គីឡូក្រាម សម្រាប់ប្រភេទម៉ាស៊ីន ៣,២លីត្រ និង ៣ ១០០គីឡូក្រាម សម្រាប់ប្រភេទម៉ាស៊ីន ២,០លីត្រ Bi-Turbo៕

ផ្ទាំងផ្សាយពាណិជ្ជកម្ម

Toyota និង Lexus ហៅឡានជិត ៦លានគ្រឿងទូទាំងពិភពលោកចូលវិញ ព្រោះបញ្ហាមួយនេះ

November 14, 2020

ថ្មីៗនេះ ក្រុមហ៊ុន Toyota បានពង្រីកការហៅប្រមូលទូទាំងពិភពលោក សម្រាប់រថយន្តដែលអាចមានបញ្ហាជាមួយនឹងបូមប្រេង (fuel pump)។

ជាសរុបរថយន្តចំនួន ៥,៨៤ លានគ្រឿងនៅទូទាំងពិភពលោក កំពុងត្រូវបានប្រមូលមកវិញ ដោយសារតែម៉ាស៊ីនបូមប្រេងអាចបញ្ឈប់ដំណើរការ ដែលបង្កឲ្យរថយន្តរលត់ និងមានន័យថា វាមិនអាចដំណើរការឡើងវិញបានទេ។ បញ្ហានេះក៏បង្កើនហានិភ័យនៃគ្រោះថ្នាក់នៅពេលបើកបរក្នុងល្បឿនលឿនដែរ។

ក្នុងចំណោមរថយន្តចំនួន ៥,៨៤ លានគ្រឿងដែលកំពុងត្រូវបានប្រមូលមកវិញនោះ មានប្រមាណ ៣,៣៤ លានគ្រឿងស្ថិតក្នុងសហរដ្ឋអាមេរិក។

គួរឲ្យដឹងថា ដំបូងឡើយក្រុមហ៊ុន Toyota បានប្រកាសប្រមូលរថយន្ត Toyota និង Lexus ចំនួន ៦៩៥ ៥៤១ គ្រឿង នៅថ្ងៃទី ១៣ ខែមករា ឆ្នាំ ២០២០ នៅសហរដ្ឋអាមេរិក ដោយសារតែបញ្ហាបូមប្រេង ហើយនៅក្នុងខែមីនា បានបន្ថែមរថយន្តចំនួន ១,១ លានគ្រឿងទៀត។ ក្រោយមក រថយន្តចំនួន ១,៥២ លានគ្រឿងផ្សេងទៀត ត្រូវបានបញ្ចូលទៅក្នុងការប្រមូលនៅសហរដ្ឋអាមេរិកនោះ។

ខាងក្រោមនេះគឺជាឈ្មោះរថយន្តដែលអាចជួបបញ្ហាខាងលើ៖

2013-15 Lexus LS460 និង GS350
2014 Toyota FJ Cruiser និង Lexus IS-F
2014-15 Toyota 4Runner, Land Cruiser, Lexus GX460, IS 350 និង LX570
2015 Lexus NX200t និង RC 350
2017 Lexus IS 200t, RC 200t, និង GS 200t
2017-2019 Toyota Highlander, Lexus GS 350
2017-2020 Toyota Sienna និង Lexus RX 350
2018-2019 Toyota 4Runner, Land Cruiser, Lexus GS 300, GX 460, IS 300, IS 350, LS 500h, LX 570, NX 300, RX 300, RC 350
2018-2020 Toyota Avalon, Camry, Corolla, Sequoia, Tacoma, Tundra, Lexus ES 350, LC 500, LC 500h, LS 500, RX 350L
2019 Toyota Corolla hatchback និង Lexus UX 200
2019-2020 Toyota RAV4

ផ្ទាំងផ្សាយពាណិជ្ជកម្ម

ឡានភីកអាប់អគ្គិសនី R1T បញ្ជាក់តម្លៃសម្រេចចុងក្រោយ នឹងមានចាប់ពី ៦៧ ៥០០ដុល្លារឡើង

November 13, 2020

ក្រុមហ៊ុន Rivian បានប្រកាសដំណឹងទាក់ទងនឹងរថយន្តភីកអាប់អគ្គិសនី R1T និងរថយន្តអគ្គិសនី R1S របស់ខ្លួន អំពីតម្លៃសម្រេចចុងក្រោយ ហើយវិបសាយសម្រាប់ជ្រើសរើសលក្ខណៈសម្បត្តិរថយន្តនឹងដាក់ដំណើរការនៅថ្ងៃទី២៣ ខែវិច្ឆិកា។

ចាប់ផ្ដើមជាមួយរថយន្ត Rivian R1S វានឹងមានដាក់លក់នូវប្រភេទ Launch Edition មុន ដែលនឹងចាប់ផ្ដើមដឹកជញ្ជូនជូនអតិថិជននៅខែសីហា ឆ្នាំ ២០២១ ដោយវាមានតម្លៃចាប់ពី ៧៧ ៥០០ដុល្លារ។ យ៉ាងណាក្ដីគេមិនច្បាស់ថាតម្លៃនេះបានរាប់បញ្ចូលប្រាក់ជំនួយចំនួន ៧ ៥០០ដុល្លារ ពីរដ្ឋាភិបាលហើយឬនៅនោះទេ។

រថយន្ត R1S ក៏មានប្រភេទ Adventure ដែលមានតម្លៃចាប់ពី ៧៧ ៥០០ដុល្លារ ដូចគ្នា ប៉ុន្តែនឹងចេញលក់នៅខែមករាឆ្នាំ ២០២២ ឯណោះ។ ចំពោះរថយន្ត R1S ប្រភេទ Explore ដែលជាប្រភេទ Base វិញនឹងមានតម្លៃចាប់ពី ៧០ ០០០ដុល្លារ ឡើងទៅ។

សម្រាប់រថយន្តភីកអាប់ R1T វានឹងមានដាក់លក់ជាប្រភេទ Launch Edition, Adventure និង Explore ដូចគ្នា ដោយតម្លៃរបស់ Launch Edition និង Adventure គឺមានចាប់ពី ៧៥ ០០០ដុល្លារ។ ចំណែកប្រភេទ Explore គឺមានតម្លៃចាប់ពី ៦៧ ៥០០ដុល្លារ។

Rivian R1T Launch Edition នឹងចេញលក់លើទីផ្សារមុនដោយរំពឹងថានឹងចេញលក់ចាប់ពីខែមិថុនា ឆ្នាំ ២០២១ ខណៈពីរប្រភេទទៀតនឹងចេញលក់នៅក្នុងខែមករា ឆ្នាំ ២០២២៕

ផ្ទាំងផ្សាយពាណិជ្ជកម្ម

ប្រទះឃើញ Honda Civic ឆ្នាំ ២០២២ ប្ដូររូបរាងថ្មី បើកសាកល្បងលើដងផ្លូវ

November 13, 2020

រថយន្ត Honda Civic ស៊េរីឆ្នាំ ២០២២ ដែលនឹងមានការផ្លាស់ប្ដូររូបរាងថ្មី ត្រូវបានគេប្រទះឃើញបើកបរសាកល្បងនៅក្នុងប្រទេសអាល្លឺម៉ង់ ដោយមានការឃ្លុំបេបិទបាំងការឌីហ្សាញយ៉ាងប្រុងប្រយ័ត្នបំផុត។

យ៉ាងណាក្ដីគេអាចឃើញថាផ្នែកខាងមានផ្ទាំងប៉ាណាដែលមានទទឹងវែង មានអមដោយអំពូលភ្លើងរាងទាញទៅខាងក្រោយ និងមានភ្លើងបំភ្លឺពេលថ្ងៃយ៉ាងទាក់ទាញ។ ចំណែកខាងក្រោយវិញមានបំពាក់អំពូលឲ្យសញ្ញាដែលមានរចនាបថខុសពីមុនផងដែរ។

គួរដឹងថារថយន្ត Civic ជំនាន់ថ្មីនេះ ធ្លាប់បានបង្ហាញរូបរាងម្ដងដែរ តាមរយៈរូបភាពប៉ាតង់ដែលបានលេចចេញកាលដើមឆ្នាំកន្លងទៅ។ រូបភាពប៉ាតង់ និងរូបភាពដែលគេថតបានពេលបើកបរសាកល្បងឃើញថាមានលក្ខណៈដូចគ្នាខ្លាំង។

Honda បានឲ្យដឹងថារថយន្ត Civic Prototype ដែលជាប្រភេទផលិតផលគំរូនៃរថយន្ត Civic ថ្ងៃអនាគតនឹងបង្ហាញវត្តមានជាផ្លូវការនៅថ្ងៃទី១៧ ខែវិច្ឆិកា ហើយផលិតផលសម្រេចនោះនឹងបញ្ចេញលក់លើទីផ្សារក្នុងអំឡុងឆ្នាំ ២០២១៕

ផ្ទាំងផ្សាយពាណិជ្ជកម្ម

Ford ចេញឡានសាកភ្លើង E-Transit ឆ្នាំ២០២២ ថ្មី តម្លៃជាង ៤ម៉ឺនដុល្លារ

November 13, 2020

ក្រុមហ៊ុន Ford បានប្រកាសចេញរថយន្ត E-Transit ស៊េរីឆ្នាំ២០២២ ជាផ្លូវការ ដែលវានឹងដំណើរការដោយថាមពលអគ្គិសនីសុទ្ធតែម្តង។

រថយន្ត Ford E-Transit ថ្មីនេះនឹងផ្តល់ជម្រើសចំនួន ៨ មូ៉ដែល នៅពេលចេញលក់នៅចុងឆ្នាំ២០២១ ដោយក្នុងនោះមាន ជម្រើសកម្ពស់ដំបូល៣, ជម្រើសប្រវែង៣ ក៏ដូចជា ជម្រើសតួខ្លួន៣ ផងដែរ។ គ្រប់ម៉ូដែលទាំងអស់នឹងដំណើរការប៉ុងមួយវិលកង់ក្រោយ RWD។

កញ្ចប់អាគុយកម្លាំង ៦៧គីឡូវ៉ាត់ម៉ោង ដែលស្ថិតនៅបាតរថយន្ត នឹងផ្តល់ថាមពលដល់ម៉ូទ័រមួយ ដែលបង្កើតកម្លាំងបាន ២៦៦សេះ។ បើតាម EPA បានឲ្យដឹងថា រថយន្តនេះនឹងមានចម្ងាយបើកបរចន្លោះពី ២០០គីឡូម៉ែត្រ ទៅ ៣៥០គីឡូម៉ែត្រ រាល់ពេលសាកភ្លើងពេញម្តង។

Ford E-Transit មានបំពាក់លក្ខណៈពិសេសមកជាច្រើនដូចជា ប្រព័ន្ធកម្សាន្ត SYNC 4 នៅលើអេក្រង់ Touchscreen ទំហំ ១២អ៊ីញ, មុខងារបញ្ជាដោយសំឡេង, ប្រព័ន្ធ Ford Co-Pilot360 ដែលរួមមានមុខងារ Lane-Keeping System, Pre-Collision Assist with Automatic Emergency Braking, Intelligent Adaptive Cruise Control with Speed Sign Recognition, Intelligent Speed Assist, Blind Spot Information System with Blind Spot Assist, Reverse Brake Assist និងកាមេរ៉ា ៣៦០ដឺក្រេ។

Ford នឹងដាក់លក់រថយន្តនេះក្នុងតម្លៃចាប់ពី ៤៥ ០០០ដុល្លារ សម្រាប់ទីផ្សារសហរដ្ឋអាមេរិក៕

ផ្ទាំងផ្សាយពាណិជ្ជកម្ម

Ferrari ចេញឡានបើកដំបូល កម្លាំង១០០០សេះថ្មី

November 13, 2020

Ferrari បានប្រកាសចេញរថយន្តម៉ូដែល SF90 Spider ដែលជារថយន្តបើកដំបូលដំបូងបង្អស់របស់ក្រុមហ៊ុនអ៊ីតាលីនេះ ដែលដំណើរការដោយម៉ាស៊ីន Plug-in Hybrid។

រថយន្ត Ferrari SF90 Spider មានបំពាក់ម៉ាស៊ីន twin-turbo V8 មានកម្លាំង ៧៦៩សេះ ដំណើរការជាមួយម៉ូទ័រអគ្គិសនី៣ មានកម្លាំង ២១៧សេះទៀត។ វាដំណើរការដោយប្រព័ន្ធប៉ុងពីរ AWD និងប្រអប់លេខអូតូ ៨វគ្គ ប្រភេទ dual-clutch។

Ferrari អះអាងថា SF90 Spider អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ២,៥វិនាទីប៉ុណ្ណោះ ហើយអាចរត់ដល់ល្បឿនអតិបរមា ៣៤០គីឡូម៉ែត្រក្នុងមួយម៉ោង។ យ៉ាងណា រថយន្តបើកដំបូលនេះមានទម្ងន់ធ្ងន់ជាងម៉ូដែល SF90 Stradale ដែលមានដំបូលពេញ ១០០គីឡូក្រាមឯណោះ។

គួរឲ្យដឹងថា រថយន្តស្ព័រកំពូលកម្លាំងនេះ នឹងអាចបើកដំបូលបានក្នុងរយៈពេល ១៤វិនាទី៕

ផ្ទាំងផ្សាយពាណិជ្ជកម្ម

ប្រភេទម៉ាស៊ីន Hybrid ទើបមានលើ Ford F-150 ស៊េរីឆ្នាំ ២០២១ សន្សំសាំងកម្រិតណា?

November 12, 2020

រថយន្ត Ford F-150 ស៊េរីឆ្នាំ ២០២១ បានបង្ហាញខ្លួនជាមួយមុខមាត់ដែលមានផ្លាស់ប្ដូរការឌីហ្សាញបន្តិចបន្តួច ហើយវាក៏មានបន្ថែមនូវជម្រើសម៉ាស៊ីន Hybrid មកជាលើកដំបូងផងដែរ។

ពេលនេះតួលេខផ្លូវការពីស្ថាប័ន EPA ដែលវាយតម្លៃលើកម្រិតស៊ីសាំងរបស់ Ford F-150 បានបញ្ចេញជាផ្លូវការ។ បើតាមតួលេខបានបង្ហាញថារថយន្ត F-150 ឆ្នាំ ២០២១ ប្រភេទ Hybrid ដែលប្រើមានម៉ូទ័រអគ្គិសនីគួបផ្សំនឹងម៉ាស៊ីនសាំងប្រភេទ PowerBoost Full ចំណុះ ៣,៥លីត្រ មានកម្រិតស៊ីប្រេងជាមធ្យម ៩,៨លីត្រ សម្រាប់ការបើកចម្ងាយ ១០០គីឡូម៉ែត្រ។ នេះគឺជាកម្រិតស៊ីប្រេងដែលទាបជាងគេក្នុងចំណោមរថយន្ត F-150 ឆ្នាំ ២០២១ គ្រប់ប្រភេទ។

ដោយឡែកប្រភេទម៉ាស៊ីន ២,៧លីត្រ ៦ស៊ីឡាំងវិញ មានកម្រិតស៊ីប្រេងជាមធ្យម ១០,៦៩លីត្រ។ ចំណែកឯប្រភេទម៉ាស៊ីន ៥,០លីត្រ ៨ស៊ីឡាំង ដែលជាម៉ាស៊ីនធំជាងគេបំផុតមានកម្រិតស៊ីប្រេងជាមធ្យម ១១,៧លីត្រ ចំពោះប្រភេទប្រើប្រព័ន្ធ RWD និងស៊ីប្រេង ១២,៣៧លីត្រ សម្រាប់ប្រភេទ AWD៕

ផ្ទាំងផ្សាយពាណិជ្ជកម្ម

ទីបំផុតចេញមុខហើយ ឡាន SUV អគ្គិសនីដំបូងគេរបស់ BMW

November 12, 2020

រថយន្ត SUV អគ្គិសនីដំបូងគេរបស់ BMW បានបង្ហាញវត្តមានជាផ្លូវការ ដែលជាម៉ូដែល BMW iX ដោយវាមានសមត្ថភាពពិសេសៗជាច្រើន ដោយសារ BMW ចាត់ទុកវាថាជារថយន្តដែលមានបច្ចេកវិទ្យាទំនើបជាងគេរបស់ខ្លួន។

រថយន្ត BMW iX មានបំពាក់ដោយបច្ចេកវិទ្យា BMW eDrive ជំនាន់ទីប្រាំ ដែលវាមានម៉ូទ័រអគ្គិសនីចំនួនពីរ អាចផលិតកម្លាំងសរុបបាន ៤៩៦សេះ។ BMW បាននិយាយថាម៉ូទ័រអគ្គិសនីនេះអាចឲ្យរថយន្ត BMW iX បង្កើនសន្ទុះពី ០-១០០គ.ម/ម៉ ដោយប្រើពេលមិនដល់ ៥វិនាទីឡើយ។

ម៉ូទ័ររបស់រថយន្តទទួលបានថាមពលពីអាគុយមួយដែលអាចផ្ទុកថាមពលបានជាង ១០០គីឡូវ៉ាត់ម៉ោង។ អាគុយទំហំធំនេះអាចឲ្យរថយន្តបើកបរបានរយៈចម្ងាយជាង ៦០០គីឡូម៉ែត្រ ពេលសាកភ្លើងពេញម្ដង។

ចំពោះការសាកភ្លើងវិញ បច្ចេកវិទ្យាថ្មីរបស់រថយន្ត iX អាចសាកភ្លើងល្បឿនលឿនបានកម្លាំងរហូតដល់ ២០០គីឡូវ៉ាត់ ដែលមានន័យថាអាចសាកភ្លើងបានពី ១០% ឡើងដល់ ៨០% ក្នុងពេលមិនដល់ ៤០នាទី។ បន្ថែមពីនេះការសាកភ្លើង ១០នាទី អាចឲ្យរថយន្តបើកបរបានចម្ងាយជាង ១២០គីឡូម៉ែត្រឯណោះ។

រថយន្ត BMW iX ក៏មានគាំទ្រនូវបច្ចេកវិទ្យា 5G ផងដែរ ដែលវាអាចផ្ដល់ជូននូវការបើកបរស្វ័យប្រវត្តិ និងមុខងារជំនួយការចូលចតបានយ៉ាងល្អប្រសើរ។ BMW នឹងចាប់ផ្ដើមផលិតរថយន្ត iX នៅពាក់កណ្ដាលឆ្នាំ ២០២១ និងចេញលក់នៅសហរដ្ឋអាមេរិកនៅដើមឆ្នាំ ២០២២ ខាងមុខ៕

ផ្ទាំងផ្សាយពាណិជ្ជកម្ម

ឡានមួយម៉ូដែលទៀតហើយ ធ្វើតេស្តបុកបានលទ្ធផល “ផ្កាយ០”

November 12, 2020

រថយន្ត Suzuki S-Presso ដែលកំពុងដាក់លក់នៅក្នុងប្រទេសឥណ្ឌា បានទទួលលទ្ធផលអាក្រក់បំផុត គឺ “ផ្កាយ០” ក្នុងការធ្វើតេស្តសុវត្ថិភាព សម្រាប់ការការពារមនុស្សពេញវ័យ ដោយ Global NCAP។

រថយន្ត Suzuki S-Presso ដែលយកមកធ្វើតេស្តខាងលើ ជាប្រភេទ Base Model ដែលមានបំពាក់ពោងសុវត្ថិភាពតែ ១ ប៉ុណ្ណោះ ហើយខ្សែក្រវ៉ាត់ក្បាល៣ មិនត្រូវតាមស្តង់ដារ ហើយក៏គ្មានរន្ធ ISOFIX សម្រាប់ដាក់កៅអីកូនក្មេងដែរ។

មិនតែប៉ុណ្ណោះ គ្រោងឆ្អឹងរបស់រថយន្តត្រូវបានចាត់ទុកថា “គ្មានស្ថេរភាព” ដោយ Global NCAP អះអាងថា វាត្រូវការធ្វើឲ្យប្រសើរឡើងវិញ។

គួរឲ្យដឹងដែរថា រថយន្តដែលមានលក់សម្រាប់ទីផ្សារឥណ្ឌានេះ បានឆ្លងកាត់តែការធ្វើតេស្តបុកខាងមុខប៉ុណ្ណោះ ខណៈការតេស្តបុកផ្នែកចំហៀង និងការពារអ្នកដំណើរថ្មើរជើង មិនស្ថិតនៅក្នុងបែបបត់របស់ពួកគេនៅឡើយទេ៕

ចង់ដឹងយ៉ាងណា សូមទស្សនាវីដេអូខាងក្រោម៖